اسىرەسە جاس بۋىن ۇلتتىق ويىنداردىڭ ءمانىن, ماقساتىن تەوريالىق جانە ءىس جۇزىندە تەرەڭ ۇعىنۋعا مۇمكىندىك الدى. تۇركىستان وبلىسىنىڭ 14 پەن 29 جاس ارالىعىنداعى اۋدان, قالا جاستارى اراسىندا وتكەن «كوشپەندىلەر ويىنى» اتتى وبلىستىق سايىس كەزىندە.
ۇلتتىق ويىندار ارقىلى جاستاردى بەلسەندىلىككە, تاپقىرلىققا, دالدىككە, كورەگەندىلىككە جانە كۇشتىلىككە تاربيەلەۋدى, پاتريوتتىق سەزىم قالىپتاستىرىپ, سالت-ءداستۇر, ادەت-عۇرىپتى دارىپتەۋدى ماقسات ەتكەن سايىس تولەبي اۋدانىندا ءوتتى.
اۋدان اكىمدىگى ۇيىتقى بولعان, جەرگىلىكتى ءماسليحات قولداعان, ىشكى ساياسات ءبولىمى, «جاستار رەسۋرستىق ورتالىعىنىڭ» قىزمەتكەرلەرى بەلسەنە قاتىسقان وبلىستىق «كوشپەندىلەر ويىنىنا» جاستاردان 13 كوماندا جاساقتالىپ, 200-گە جۋىق سپورتشى قاتىستى. جامبى اتۋ, تەڭگە ءىلۋ, وگىز كوتەرۋ, اۋدارىسپاق, توعىزقۇمالاق, قازاق كۇرەسى جانە ارقان تارتۋدان سىنعا تۇسكەندەر اراسىندا جەڭىمپازدار كوماندالىق ەسەپپەن انىقتالدى. ءبىرىنشى ورىندى تولەبي اۋدانىنىڭ سپورتشىلارى جەڭىپ الىپ, 300 مىڭ تەڭگە اقشالاي سىيلىقتى قانجىعالارىنا بايلادى. ەكىنشى ورىنعا كوتەرىلگەن سارىاعاش اۋدانىنىڭ كومانداسىنا 200 مىڭ تەڭگە بۇيىردى. ۇزدىك ۇشتىكتى جەتىساي اۋدانىنىڭ سپورتشىلارى تۇيىندەدى. ولار 150 مىڭ تەڭگە يەلەندى. سونداي-اق سايىسقا قاتىسقان بارلىق كومانداعا ىنتالاندىرۋ سىيلىعى تابىس ەتىلدى. سپورتتىڭ جەكەلەگەن تۇرلەرى بويىنشا جەڭىمپاز اتانعاندار دا ماراپاتتالدى. اتالمىش سايىس جىل سايىن تولەبي اۋدانىندا تۇراقتى وتەتىن بولادى.
تۇركىستان وبلىسى