شىمكەنت. 23 ءساۋىر. وڭتۇستىك قازاقستان وبلىسىندا «بالاپان» باعدارلاماسىنا قاتىستى كوپتەگەن زاڭ بۇزۋشىلىققا جول بەرىلگەن. وبلىستىق پروكۋراتۋرا قىزمەتكەرلەرى انىقتاعانداي, بيۋدجەت قارجىسى, دۇنيە-م ۇلىك تالان-تاراجعا تۇسكەن. بۇل تۋرالى «ەكسپرەسس ك» حابارلادى.
وبلىستىڭ ماقتاارال, سايرام جانە سارىاعاش اۋداندارىنا جۇرگىزىلگەن تەكسەرۋلەر بارىسى مەكتەپكە دەيىنگى دايارلاۋ مەكەمەلەرىندە اتى-ءجونى تىركەلگەن, بىراق ءوزى «كورىنبەيتىن» بالالاردىڭ بار ەكەنى بەلگىلى بولدى. ماسەلەن, ماقتاارال اۋدانىنداعى «اليزا-ايان» بالاباقشاسىندا 2012-2013 جىلدارى قۇرالتاي اتتى ۇل بالا مەكەمە ەسەبىنە الىنىپ, سول ءۇشىن مەملەكەت تاراپىنان 206 مىڭ تەڭگە بولىنگەن. ال شىن مانىندە ونداي بالا بالالار باقشاسىنىڭ تابالدىرىعىنان دا اتتاماعان. وسىلايشا, قۇرالتايدىڭ قاجەتىنە جۇمسالۋى ءتيىس قارجىنى مەكەمە باسشىسى يمەنبەي يەمدەنگەن ءتارىزدى. ءدال وسىعان ۇقساس جاعدايلار بىرنەشە بالالار مەكەمەسىندە كەزدەسكەن.
ەندى ءتيىستى ورىندار وسى كەلەڭسىز ارەكەتتەرگە بايلانىستى تۇبەگەيلى تەكسەرۋ جۇرگىزىپ, كۇدىكتىلەردىڭ ۇستىنەن قىلمىستىق ءىس قوزعاماق.
ال تولە بي اۋدانىنداعى «الاتاۋ» اتتى مەكتەپتىڭ جانىنداعى شاعىن ورتالىقتىڭ قىزمەتكەرلەرى اراسىنان ۇيىندە جاتىپ ەڭبەك اقى الاتىن پىسىقاي تابىلعان. ماسەلەن, شاعىن ورتالىقتا جۇمىس ىستەيتىن يساتاەۆ دەگەن ازامات ديرەكتوردىڭ «مىرزالىعى» ارقاسىندا شىبىق باسىن سىندىرماي-اق وسى ۋاقىتقا دەيىن بارلىق جيىنتىعى 311 مىڭ تەڭگە جالاقى العان. تەكسەرىستەن كەيىن ىلە مەكەمە جەتەكشىسىنىڭ ۇستىنەن قىلمىستىق ءىس قوزعالدى. ال كورسەتىلگەن, ياعني, زاڭسىز تولەنگەن قارجى تۇگەلدەي مەملەكەت ەسەبىنە قايتارىلدى.
ورداباسى اۋدانىنداعى «راۋشان» بالا-باقشاسىن تەكسەرگەندە, قۇنى 3 ملن. تەڭگەنى قۇرايتىن دۇنيە-م ۇلىكتىڭ جوق ەكەنى انىقتالعان. ياعني, ارنايى بولىنگەن قارجىعا قاجەتتى جابدىقتار ساتىلىپ الىنباعان نەمەسە مەكەمە باسشىلىعى يەمدەنگەن. وسى زاڭسىز تىرلىگى ءۇشىن «راۋشان» بالا-باقشاسىنىڭ مەڭگەرۋشىسى شارتتى تۇردە 2 جىلعا باس بوستاندىعىنان ايىرىلدى.
جولدىباي بازار.
دەرەككوز: «ەكسپرەسس ك».
فوتو: Oo.ss.kz.