وتكەن جىلعى 22 قازاندا «تەمىربانك» اق عيماراتىنان 37 ملن. 200 مىڭ تەڭگە ۇرلانعان بولاتىن. ەندى, مىنە, ارادا جارتى جىل وتكەننەن كەيىن وسىنشالىقتى مول اقشانى كىمدەردىڭ قولدى ەتكەنى بەلگىلى بولىپ وتىر.
جۇرگىزىلگەن تەرگەۋ بارىسى قىلمىستى بانكتىڭ قاۋىپسىزدىك قىزمەتىنىڭ قىزمەتكەرى مەن ونىڭ سىبايلاسى جاساعانىن انىقتادى. الماتى قالاسى ىشكى ىستەر دەپارتامەنتى قىلمىستىق پوليتسيا باسقارماسىنىڭ باستىعى جانبولات ءزياديننىڭ ايتۋىنشا, جەدەل قىزمەتكەرلەر دەرەۋ قىلمىسكەرلەردىڭ كاسسا عيماراتىنا كىرۋ جولىن انىقتاعان. قىلمىس جاساۋشىلار بانك عيماراتىنا تەرەزە اقىلى كىرگەن ەكەن. بۇل ءۇشىن ولار تەرەزەنىڭ تورىن الدىن الا كەسىپ, دايىنداپ الىپتى.
كەيىننەن جەدەل قىزمەتكەرلەر 1977 جىلى تۋعان بانك قاۋىپسىزدىك قىزمەتىنىڭ قىزمەتكەرى مەن ونىڭ 32 جاستاعى سىبايلاسىن تاپ باستىرماي تاپتى. ولاردىڭ ەكەۋى دە جامبىل وبلىسى شۋ اۋدانىنىڭ تۋمالارى بولىپ شىقتى.
«نەگىزگى كۇدىكتىنى ءبىز شىمكەنت قالاسىندا قولعا تۇسىردىك. ول ۇرلانعان اقشانىڭ ءبىر بولىگىن جۇمساپ ۇلگەرىپتى. قالعان بولىگى تاركىلەنىپ, قىلمىستىق ءىس ماتەريالىنا قوسا تىركەلدى. كۇدىكتىلەر ايىپتارىن مويىندادى. ولارعا قاتىستى قىلمىستىق ءىس قوزعالدى», – دەگەندى ايتتى ج.زيادين سوڭىندا.
قۇرىش نۇرىمبەت.