پەتروپاۆل. 22 ءساۋىر. مۇگەدەكتەر ارباسىنا يەك ارتقان پەتروپاۆلدىق قىز – ەلەنا شالاموۆا دەنى-باسى ساۋ, اياق-قولى ءبۇتىن زامانداستارى ءتارىزدى ەڭبەك ەتكەندى قالايدى. ول جۋىقتا حالىققا سۋرەت كورمەسىن ۇسىندى. بۇل تۋرالى «ەكسپرەسس ك» حابارلادى.
ەلەنا ءوزىنىڭ كورمەسىنە ونداعان كەسكىندەمەسىن قويدى. ونەرلى قىز بۇل سۋرەتتەرىن سالعاندا اكۆارەل, گۋاش, اكريل جانە قارانداش ءتارىزدى قۇرالداردى پايدالانعان.
ەلەنانىڭ, اسىرەسە, كىشكەنتاي قىزدىڭ مىسىعىمەن بىرگە مىنا جارىق دۇنيەگە زەر سالا قاراپ وتىرعانى بەينەلەنگەن ەڭبەگى ءساتتى شىققان.
سۋرەتشى قىز 4 جاسىنا دەيىن كادىمگىدەي قالىپتى جاعدايدا وسكەن. ال ودان كەيىن تانىنە اۋىر دەرت جابىسادى. ياعني, دارىگەرلەر ونىڭ اسا قاۋىپتى بۋىن اۋرۋىنا شالدىققانىن انىقتايدى.
ەلەنا 3-سىنىپتان باستاپ وقۋىن ۇيىندە جالعاستىرىپ, مەكتەپتى ۇزدىك ءبىتىرىپ شاعادى. بۇدان كەيىن بۋحگالتەر-ەكونوميست ماماندىعى بويىنشا ۋنيۆەرسيتەتكە ءتۇسىپ, ونى قاشىقتىقتان وقىتۋ ءادىسى نەگىزىندە اياقتايدى. بىلدەي ديپلومى بار ەلەناعا لايىقتى جۇمىس تابىلا قويمايدى. سودان ول ىزدەنە ءجۇرىپ, اقىرى ءوزىنىڭ قولىنان كەلەتىن ءىستىڭ تىزگىنىن ۇستايدى. تالاپتى قىز بۇگىندە ماسكەۋدەگى ءبىر باسپامەن بايلانىسىپ, ولاردىڭ تاپسىرمالارىن ورىندايدى. ياعني, ءباسپاسوز-ءماسليحاتتارىنان, «دوڭگەلەك ۇستەلدەردەن» تاسپاعا تۇسىرىلگەن جازبالاردى وڭدەپ, ونى اۋديوفايلدارعا ورنالاستىرادى جانە باسقا دا وسى ىسپەتتەس جۇمىستار اتقارادى. ەلەنا بۇل ەڭبەگى ءۇشىن ايىنا 300 دوللارعا جۋىق اقى الادى ەكەن.
دەرتتى بولسا دا ەڭسەسىن تۇسىرمەي العا ۇمتىلعان ەڭبەكقور قىزدىڭ قولىنان كوپ ءىس كەلەدى. ول قوسىمشا مونشاقتار تىزۋمەن, تىگىنشىلىكپەن اينالىسادى. ال سوڭعى كەزدەردە سۋرەت ونەرىمەن بەرىلە شۇعىلدانىپ ءجۇر. قازىر ەلەنانىڭ ءوزى سالعان 60-تان استام سۋرەتى بار.
جولدىباي بازار.
دەرەككوز: «ەكسپرەسس ك».
فوتو: express-k.kz.