بەلگىلى ءدىنتانۋشى ابۋلاحاد سمانوۆ تا وقۋشى قىزداردىڭ مەكتەپتە ورامال تاققانىن قۇپ كورەتىنىن ايتتى. بۇل تۋرالى ول facebook جەلىسىندەگى پاراقشاسىندا جازدى, دەپ حابارلايدى Egemen.kz.
«اللاعا سانسىز شۇكىرلەر بولسىن! 3-4 كۇن بۇرىن بۇكىل قازاقستان حالقىنا تاريحي ءسات سانالاتىن رەسپۋبليكالىق كونستيتۋتسيالىق رەفەرەندۋم ءوتتى. مەملەكەت باسشىمىز حالىققا جاڭا, ادىلەتتى قازاقستاندى قۇرامىن دەپ ۇندەۋ تاستاپ ەدى. باسىم كوپشىلىك ادام قولداپ داۋىس بەردى. ءيا, جاڭا قازاقستاننىڭ نەگىزگى ماقساتى - ادىلەتتى قوعام قۇرۋ. سول رەفەرەندۋمنىڭ ارتىنان ادىلەتتىلىكتىڭ العاشقى نىشاندارى كورىنىپ, ءبىلىم جانە عىلىم ءمينيسترى اسحات ايماعامبەتوۆ مەكتەپتە, باليعات جاسىنا تولعان قىزدارعا كيمەشەك كيۋگە رۇقسات بەرىلۋى مۇمكىن ەكەنىن ايتتى. بۇل قازاق قىزدارىنىنىڭ, انا, اجەلەرىمىزدىڭ سان عاسىرلاردان بەرى كيىپ كەلگەن كيىمى.
مۇنى ادىلەتتىلىكتىڭ بەلگىسى سانايتىنىم, بۇلدىرشىندەي قىزدىڭ باسىنداعى ءبىر جاپىراق ورامالعا بولا داۋ تۋىنداتىپ, مەيلى, ول قىز مەكتەپتى ۇزدىك باعاعا وقىپ جاتسا دا, مەكتەپتە وعان قىسىم جاسالىپ, پسيحولوگيالىق سوققى الۋىنا سەپتەسىپ جاتقان شەشىمنىڭ كۇشى جويىلعالى جاتىر.
ەگەر ءبىز زايىرلى بولۋدىڭ شىن ماعىناسىن تۇسىنسەك, مەكتەپتەردە بۇلدىرشىندەرىمىزدىڭ ءدىني-سەنىمى تالاپ ەتكەنىندەي كيىنۋىنە قارسى بولماس ەدىك. ويتكەنى زايىرلى مەملەكەتتە ءاربىر ادامنىڭ ءدىن ۇستانۋ ەركىندىگى بار, ول ەركىندىكتى مەملەكەت قورعايدى.
ءبىز قالاي قاراساق تا, باليعات جاسىنا تولعان قىزداردىڭ اۋرەتىن جابۋى - اللا تاعالا قۇراندا بۇيىرعان بۇيرىق بولىپ سانالادى. سوندىقتان بۇل ماسەلە ءدىنىن بەكەم ۇستايتىن ءاربى اتا-انانى بەي-جاي قاراتا المايدى.
ءدۇيىم جۇرتتىڭ ءوتىنىش-تىلەگىن باس ءمۇفتي ناۋرىزباي قاجى تاعان ۇلى مەملەكەت باسشىسىنا جەتكىزىپ, پرەزيدەنتىمىز دە ەلدەگى دىنىنە بەكەم, مۇسىلمان جۇرتشىلىعىنىڭ ءوتىنىشىن قابىل الىپ, وسىنداي ادىلەتتى شەشىم قابىلداپ جاتىر ەكەن. قۋانىشىمىز ۇزاعىنان بولعاي!
ءسوز سوڭىندا ايتارىم, ەرتە مە, كەش پە ادىلەت ورنايتىنى اقيقات. بىراق سول ادىلەتتى مەملەكەت باسشىسىنا جەتكىزگەن ءمۇفتيدىڭ دە, ادىلەتتى شەشىم قابىلداعان مەملەكەت باسشىسىنىڭ دا اتى تاريحتا التىن ارىپتەرمەن جازىلىپ, مۇسىلمان جۇرتشىلىعى ەشقاشان ۇمىتپايتىن بولادى», دەيدى ابدۋلاحاد سمانوۆ.
ەسكە سالا كەتەيىك, ءبىلىم جانە عىلىم ءمينيسترى اسحات ايماعامبەتوۆ مەكتەپ جاسىنداعى وقۋشىلاردىڭ حيدجاپ كيۋى ماسەلەسى جايلى ايتقان بولاتىن.