بالالاردىڭ قاۋىپسىز ءارى كوڭىلدى دەمالىسىن ۇيىمداستىرۋ ماقساتىندا قالالىق اكىمدىك ماماندارى كەشەندى جوسپار قۇرىپ وتىر. وڭىرلىك كوممۋنيكاتسيالار الاڭىنداعى بريفينگتە الماتى قالاسى ءبىلىم باسقارماسى باسشىسىنىڭ ورىنباسارى قايرات جۇمانوۆ جانە «جاستار ساياساتىن دامىتۋ» مەملەكەتتىك قورىنىڭ باسشىسى الما اۋعانباەۆا اتاپ وتكەندەي جازعى كانيكۋل بالالار ءۇشىن مازمۇندى ءارى قاۋىپسىز ورتادا وتۋگە ءتيىس.
بالالار جىلىنا وراي «الماتى بالالارىنىڭ جازى – ۇلكەن ارمانعا جاسالعان شاعىن قادام!» تۇجىرىمداماسى قابىلدانىپ, مەكتەپتەر جانىنداعى جازعى لاگەر جۇمىسىنا ەرەكشە ءمان بەرىلۋدە. بالالار مەن جاسوسپىرىمدەردىڭ قاداعالاۋسىز, باقىلاۋسىز قالۋىنا جول بەرمەۋ اتا-انالاردىڭ عانا ەمەس, بارلىق ورتا ءبىلىم بەرۋ ۇيىمدارى ماماندارىنىڭ جاۋاپكەرشىلىگىندە. وسى ورايدا جازعى مەكتەپتەر جۇمىسى وقۋشىلار بىلىمىندەگى ولقىلىقتاردى تولتىرۋعا ىقپال ەتەدى. ۇزدىكسىز ءبىلىم بەرۋ جۇيەسى بالالار مەن جاسوسپىرىمدەردىڭ دامۋى, تاربيەسى مەن دەنساۋلىعىن نىعايتۋدا, كەلەسى وقۋ جىلىنا سەرگەك قاراۋىنا ىقپال ەتەتىن بولسا, بالالاردىڭ جاراقات الۋىنا, قۇقىق بۇزۋشىلىقتارعا جول بەرمەۋگە پەداگوگتەر عانا ەمەس, ءتيىستى ورگان ماماندارى دا جول بەرمەۋگە تىرىسادى. پەداگوگتەر بالالارمەن كوشە, جول جانە سۋدان دا قاۋىپ بار ەكەنىن ەسكەرە وتىرىپ, قاۋىپسىز ءجۇرىس-تۇرىس داعدىلارىن جەتىلدىرۋ, ءورت قاۋىپسىزدىگى ەرەجەلەرىن ساقتاۋ, بالالاردىڭ جول-كولىك وقيعالارىندا جاراقات الۋىنىڭ الدىن الۋ, سونداي-اق وقىس وقيعالار كەزىندە العاشقى مەديتسينالىق كومەك كورسەتۋ جۇمىستارىنا ەرەكشە كوڭىل بولۋدە. بۇل كانيكۋل بالالاردىڭ ەسىندە جات ادەتتەردەن ادا, ادامگەرشىلىك پەن رۋحانياتقا ەرەكشە كوڭىل بولەتىن كەزەڭ رەتىندە قالۋعا ءتيىس.
جازعى مەكتەپتە وقىتۋ ساباقتارىنان باسقا, دەنە شىنىقتىرۋ, قوزعالىس ويىندارى, فلەشموبتار ءوتىپ, 26 مامىر مەن 17 ماۋسىم ارالىعىنداعى لاگەرگە 1-8 سىنىپ وقۋشىلارى بارادى. ال 7-13 جاس ارالىعىنداعى وقۋشىلاردىڭ قاتىسۋ مەرزىمى: ماۋسىم ايى مەن 27 تامىز ارالىعى. وسى ورايدا ءبىلىم بەرۋ ۇيىمدارىندا بارلىعى 1 150 ۇيىرمە, اتاپ ايتقاندا سپورت سەكتسيالارى, كلۋبتار, ستۋديالار, مەكتەپ كىتاپحانالارىنداعى وقۋ ۇيىرمەلەر جۇمىس ىستەيدى. وقۋشىلار سارايى جانە 6 وقۋشىلار ۇيىندە, 44 جەكەمەنشىك قوسىمشا ءبىلىم بەرۋ ۇيىمدارىندا 1 200-گە جۋىق ۇيىرمە مەن سەكتسيا جۇمىسى جاندانسا, بالالار قالاىشىلىك جانە قالا سىرتىنداعى جازعى لاگەرلەرگە بيۋدجەت قاراجاتى, سونداي-اق كوممەرتسيالىق نەگىزدە بارىپ دەمالۋ مۇمكىندىگى قاراستىرىلعان. ساۋىقتىرۋ دەمالىسىنا, ەڭ الدىمەن, حالىقتىڭ الەۋمەتتىك وسال ساناتىنداعى بالالار قامتىلادى.
ال بيىل ۇلكەن ومىرگە قادام باسقالى وتىرعان تۇلەكتەر ءۇشىن بىرقاتار ەسكەرتۋ بار. ولارعا مەكتەپ ءبىتىرۋ كۋالىگى 16-17 ماۋسىمدا سالتاناتتى جاعدايدا تابىس ەتىلەدى. وسى ورايدا كۇندىزگى مەزگىلدە مەكتەپ قابىرعاسىندا پەداگوگيكالىق ۇجىمنىڭ, اتا-انالاردىڭ, ەڭبەك ارداگەرلەرى, قامقورشىلىق كەڭەس مۇشەلەرىنىڭ قاتىسۋىمەن وتەتىن يگى ءداستۇر قالىپتاسقان. تۇلەكتەردىڭ قايىرىمدىلىق باستامالارىنىڭ قاتارىندا «مەكتەپكە كىتاپ سىيلا», الەۋمەتتىك وسال وتباسىلار مەن بالالارعا كومەك كورسەتۋ ماقساتىندا «مەيىرىمدى جۇرەكتەن بالالارعا», اعاش ەگۋ بويىنشا «مەكتەپكە سىي», «تۋعان جەرگە تاعزىم» اكتسيالارىنىڭ ماڭىزدى ەكەنىن ايتا كەتكەن ابزال.
پەداگوگيكالىق ادەپتى ساقتاۋ, سىبايلاس جەمقورلىققا قارسى جانە قۇقىق بۇزۋشىلىقتاردىڭ الدىن الۋ ماقساتىندا مەكتەپ ءبىتىرۋ ءىس-شارالارىنا دايىندىق كەزىندە بىتىرۋشىلەردىڭ اتا-انالارىمەن كيىم-كەشەككە قاراجات جۇمساۋدىڭ ورىنسىزدىعىنا بايلانىستى تۋرالى ءتۇسىندىرۋ جۇمىستارى جۇرگىزىلىپ, مەرەكەلىك داستارقان ۇيىمداستىرۋ, اگەنتتىكتەردى شاقىرۋ, اۆتوكولىك جالداۋ, قالا بويىنشا ەكسكۋرسيالار وتكىزۋ, اكىمشىلىك پەن مۇعالىمدەرگە سىيلىققا قاراجات جيناۋعا قاتاڭ ەسكەرتۋ جاسالىپ وتىر.
الماتى