ءوزى كىپ-كىشكەنتاي بولسا دا پەرىشتە جۇرەگىمەن قازاق دەگەن ەلگە قانشاما جاننىڭ ءىلتيپاتىن ينتەرنەتپەن جەتەلەپ كەلگەن نيكيتا تۋرالى بەينەماتەريال سالىنعان «ح-فاكتور» سايتىندا قازىر جىلى لەبىزدەر ءورىپ ءجۇر.
عالامتورمەن قاۋىشقان نيكيتانى ىزدەگەنىمىزدە اناسى ەلەنامەن بىزدەر كوپ جىلدار بويى سىرالعى بولماساق تا, سىرتتاي تانىس بولىپ شىقتىق. نيكيتانىڭ شەشەسى كادىمگى «سەردتسەەدكي» توبىنىڭ بۇرىنعى ءسوليسى ەلەنا گونچاروۆا ەكەن. ودان دا قىزىعى, ەلەنا قازىر ءبىزدىڭ ارىپتەسىمىز – اقپارات ايدىنىنىڭ بەلدى وكىلى – فوتورەپورتەر.
مەن ەلەناعا ءوزىمدى تانىستىرىپ, «ەگەمەن قازاقستان» گازەتىنىڭ شولۋشىسى ەكەنىمدى, نيكيتا تۋرالى سويلەسكىم كەلەتىنىن ايتقانىمدا, ول مەنى تانيتىنىن, جۋىردا عانا «Avon» كومپانياسىنىڭ ينتەرنەت-دۇكەنىنىڭ اشىلۋ راسىمىندە بىرگە بولعانىمىزدى ەسىمە سالعانى.
مەن دە تەلەفوننىڭ ار جاعىنداعى ەلەنانىڭ كەلبەتىن ەسىمە ءتۇسىرىپ, اڭگىمەمىز جاراسا كەتتى.
– ەلەنا, سلوۆاكياعا قالاي جولىڭ ءتۇستى؟ نيكيتانىڭ ەۋروپادا ءانۇراندى سالىپ تۇرعان ءساتى «ح-فاكتور» سايتىنان قالاي تابىلدى؟
– مەن براتيسلاۆاعا «ح-فاكتور» جوباسىنا قاتىسۋ ءۇشىن بارعانمىن. نيكيتانى دا الىپ بارۋعا تۋرا كەلدى. ىرىكتەۋ تۋرىنان ءساتتى وتكەنىممەن, ەكىنشى تۋردا ءسۇرىندىم. تەك ءتىل بىلمەگەنىم كەدەرگى كەلتىردى دەپ ويلايمىن. قازىلار القاسى مەنىڭ ورىسشا ءازىل-قالجىڭىمدى تۇسىنبەگەن سىڭاي تانىتتى. بىراق, ول بايقاۋعا وتپەي قالعانىما وكىنبەيمىن. ەسەسىنە نيكيتا بۇل جوبانىڭ جۇلدىزى بولىپ شىعا كەلدى.
– نيكيتا دا بايقاۋعا قاتىستى ما؟
– جوق. ۇلىم نيكيتا مەنى قولداپ بارعان ادامنىڭ بىرەۋى عوي. ساحناعا شىعاتىن ءساتىمدى شىمىلدىق سىرتىندا كۇتىپ تۇرعانىمىزدا اينالامىزدا جۋرناليستەر, تەلەوپەراتورلار قاپتاپ جۇرگەن بولاتىن. باق وكىلدەرىنە ءبارى قىزىق! وسىنداي جوباعا قاتىسۋ ءۇشىن ەۋروپاعا قازاقستاننان ەرىنبەي كەلگەنىمدى سۇراستىردى. اسىرەسە, ولارعا نيكيتا ۇناپ قالسا كەرەك. ءبىر جۋرناليست بالامنىڭ ءتىلىن قىزىق كورىپ, قانداي ءاندى جاقسى كورەتىنىن سۇراپ, سالىپ بەرۋدى ءوتىنگەندە, ول ەش قىسىلماي-اق, جالىندىرماي-اق «تۋعان ەلىم مەنىڭ – قازاقستانىم» دەپ ساڭقىلداپ, باستان-اياق ايتىپ بەردى. الگى شەتەلدىك جۋرناليست پاتريوتتىق رۋحتاعى بۇل قانداي ءان ەكەنىن سۇراعاندا مەن نيكيتانىڭ مەملەكەتىمىزدىڭ گيمنىن شىرقاپ تۇرعانىن ايتتىم. ۇلىما سونشاما مەيىرلەنە قاراپ, كوزى جاساۋراپ, تىڭداپ تۇرعان سول ءتىلشىنىڭ ءتۇرىن ەسىمدە ساقتاپ قالىپپىن.
– وعان ءانۇراندى كىم ۇيرەتكەن؟ مەن دە عالامتوردان نيكيتانىڭ سالعان ءانىن تىڭدادىم.
– وي, ول قازاقشا بالاباقشاعا بارعان. دوستارىنان قالماسىن, ءوز ەلىنىڭ ءتىلىن ءبىلسىن دەپ بەرگەنبىز. بىراق, بيىل ورىس تىلىندەگى دايىندىق سىنىبىنا بەردىك. وكىنىشكە قاراي, مەن قازاقشا ءبىلمەيمىن. بيىل مەكتەپكە بارعاندا ساباعىن دايىنداسۋعا كومەگىم تيمەي قالاما دەپ ويلادىم. بىراق, نيكيتا قازاقشا جاقسى سويلەيدى. دوستارىمەن قازاقشا سايراپ, ويناپ كەتكەندە ءوزىمىز دە نەگە ۇيرەنىپ المادىق ەكەن دەپ قىزىعىپ قالامىز.
مەملەكەتتىك گيمن ونىڭ سۇيىكتى ءانى. سىپايىلاماي-اق ايتقاندا ۇيدە «التىن كۇن اسپانى...» دەپ باقىرادى دا جۇرەدى.
ايتپاقشى, بيىل جاڭا جىلدا ەلباسى ءبارىمىزدى قۇتتىقتاعاننان كەيىن ءانۇران وينادى عوي. نيكيتا جۇگىرىپ بارىپ تەلەديداردىڭ ءتۇبىنە تۇرا قالىپ, داۋىسىن ودان دا اسىرىپ اندەتكەندە ابدەن كۇلگەنىمىز بار. گيمن وعان قاتتى اسەر ەتەدى. بالا بولسا دا بۇل اندە پاتريوتتىق رۋح, سالماق پەن سالتانات بار ەكەنىن سەزەتىن شىعار دەپ ويلايمىن.
براتيسلاۆادا بايقاۋعا وتپەي قالعانىما اسا وكىنە قويعان جوقپىن. اعىلشىن ءتىلى مەن سلوۆاك ءتىلىن بىلمەيتىنىم كەدەرگى بولدى. سوندىقتان ءتىلدى بالا كەزدەن ۇيرەنۋ كەرەك دەگەن ۇستانىمعا قوسىلامىن. كوپ ءتىل بىلگەن سايىن جولىڭ اشىلادى ەكەن. سوعان كوزىم جەتتى. نيكيتانى قازاقشا بالاباقشاعا بەرگەنىم وتە دۇرىس بولعانىن تاعى دا ءتۇسىندىم. نيكيتا ءوزى ءبىر – ينتەرناتسيونال بالا. ناعاشىسى جاعىنان ونىڭ بويىندا ارميان مەن ورىستىڭ, اكەسى جاعىنان كورەي پەن ۋكرايننىڭ قانى بار. ەندىگى ارمانىم – وسى بالام ەلگە سىيلى جاقسى ازامات بولىپ وسسە ەكەن.
ايناش ەسالي,
«ەگەمەن قازاقستان».
الماتى.
––––––––––––
سۋرەتتى تۇسىرگەن
ەلەنا گونچاروۆا.