شايبالى حوككەيدەن قازاقستان ۇلتتىق قۇراماسى مەن قاراعاندىنىڭ «سارىارقا» كلۋبىنىڭ قاقپاشىسى اندرەي شۋتوۆ فينليانديادا كەشە اياقتالعان الەم چەمپيوناتىندا ۇزدىك ناتيجەسىمەن كوزگە ءتۇستى.
جەرلەسىمىز توپتىق كەزەڭنىڭ جەتى ويىنىندا مۇزايدىنعا شىعىپ, قارسىلاس كوماندا ويىنشىلارىنىڭ ءبىزدىڭ قاقپاعا باعىتتاعان 179 شايباسىن قايتارعان. سونداي-اق قارسىلاس قۇرامالاردىڭ حوككەيشىلەرى شۋتوۆ قورعاعان قاقپاعا 206 سوققى جاساعان. بۇل – توپتىق كەزەڭدە ءبىر عانا قاقپاعا باعىتتالعان ەڭ كوپ سوققى. پايىزدىق كورسەتكىش بويىنشا, جەرلەسىمىز جالپى ەسەپتە 86,89 پايىزبەن ءۇشىنشى ورىنعا تابان تىرەدى. بۇدان بولەك شۋتوۆ قاقپاشىلار اراسىندا مۇزايدىندا ەڭ كوپ ۋاقىت وتكىزگەن ويىنشى رەتىندە دە رەكورد ورناتتى. اندرەي ءوز قاقپاسىن 381 مينۋت 12 سەكۋند قورعادى. وسى ۋاقىت ارالىعىندا ول قاقپاسىنا 27 شايبا وتكىزىپ الدى.
ايتا كەتەيىك, ەليتالى ديۆيزيوننىڭ الەم چەمپيوناتىندا «ا» توبىندا ونەر كورسەتكەن قازاقستان قۇراماسى سوڭعى تۋردا يتاليادان باسىم ءتۇسىپ, جوعارى توپتاعى ورنىن ساقتاپ قالدى. كەلەسى جىلعى الەم بىرىنشىلىگى فينليانديا مەن لاتۆيادا وتەتىن بولىپ بەكىتىلدى.