ماحامبەت اۋدانىنىڭ پروكۋراتۋراسى جۇرگىزگەن تالداۋ ناتيجەسىمەن اۋرۋحانا ديرەكتورىنىڭ زاڭ بۇزۋشىلىعى انىقتالدى, دەپ حابارلايدى Egemen.kz.
اۋداندىق اۋرۋحانا ديرەكتورى مەملەكەتتىك ساتىپ الۋ تۋرالى شارتتار بويىنشا قابىلداعان مىندەتتەمەلەرىن ورىنداماعان 3 ءونىم بەرۋشىنى مەملەكەتتىك ساتىپ الۋعا جوسىقسىز قاتىسۋشى دەپ تانۋ تۋرالى ارىزبەن سوتقا جۇگىنبەگەن.
«وسىعان بايلانىستى اتىراۋ وبلىسى بويىنشا مەملەكەتتىك ىشكى اۋديت دەپارتامەنتىنە زاڭ بۇزۋشىلىقتى جويۋ تۋرالى ۇسىنۋ ەنگىزىلدى. وسىنداي بۇزۋشىلىققا جول بەرگەن اۋداندىق اۋرۋحانانىڭ ديرەكتورى قر اكىمشىلىك قۇقىقبۇزۋشىلىق تۋرالى كودەكسىنىڭ 207-بابىمەن اكىمشىلىك جاۋاپقا تارتىلدى. ديرەكتورعا مەملەكەتتىك ساتىپ الۋ تۋرالى زاڭناما تالاپتارىن بۇزعانى ءۇشىن 136 مىڭ 835 تەڭگە كولەمىندە اكىمشىلىك ايىپپۇل سالىندى», دەيدى ماحامبەت اۋدانىنىڭ پروكۋرورى باعىتجان قاليەۆ.
سونداي-اق اتالعان اۋرۋحانادا تەگىن نەگىزدە وتۋگە ءتيىس ساناتتارعا جاتپايتىن 84 ادام COVID-19 كوروناۆيرۋس ينفەكتسياسىنا قارسى پتر-تەكسەرۋدەن وتكىزىلگەن. ءسويتىپ 414 مىڭ 251 تەڭگەنىڭ نەگىزسىز جۇمسالعانى انىقتالعان. وبلىستىق دەنساۋلىق ساقتاۋ باسقارماسىنا بۇزۋشىلىقتى جويۋ تۋرالى ۇسىنۋ بەرىلىپ, قاراجات بيۋدجەتكە قايتارىلىپ وتىر.
ايانا توعانبەك