جۋىردا الماتى قالاسى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا كۆوتا بويىنشا جۇمىس ورىندارىنا ازاماتتاردىڭ جەكەلەگەن ساناتتارىن, مۇگەدەكتەر, پروباتسيا قىزمەتى ەسەبىندەگىلەر, جەتىمدەر مەن باس بوستاندىعىنان ايىرۋ ورىندارىنان بوساتىلعانداردى جۇمىسقا ورنالاستىرۋعا كوپ كوڭىل ءبولىنىپ وتىرعانىن اتاپ ءوتتى.
وڭتۇستىك استانادا جىل باسىنان بەرى جۇمىسسىزدار ەسەبىندە تۇرعاندار 17 مىڭنان اسادى. وسى ورايدا ول جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنىڭ قورىتىندىسىمەن تانىستىرىپ, بيىل ىسكە اسا باستاعان كاسىپكەرلىكتى دامىتۋدىڭ ۇلتتىق جوباسى اياسىندا جۇمىسسىزداردى كاسىپتىك وقىتۋعا باسىمدىق بەرىلىپ وتىرعانىن جەتكىزدى. بۇل ماقساتتا جۇمىس بەرۋشىلەردىڭ سۇرانىسى بويىنشا مىڭنان استام ادامدى 25 ماماندىق بويىنشا وقىتۋ جوسپارلانىپ وتىر. جاڭا بيزنەس-يدەيالاردى جۇزەگە اسىرىپ, كاسىپكەرلەردى قولداۋ ماقساتىندا 400 اەك كولەمىندە 950 گرانت قاراستىرىلعان. ال 12 ايدان اسپايتىن مەرزىمگە الەۋمەتتىك جۇمىس ورىندارى ءۇشىن جالاقىنىڭ ءبىر بولىگىن جۇمىسپەن قامتۋ ورتالىعى وتەيدى (بەلگىلەنگەن جالاقى مولشەرىنىڭ 35 پايىزى). بيىل بۇل باعىتتا 980 ادامدى قامتۋ جوسپارلانىپ وتىر. سونداي-اق قوعامدىق جۇمىستارعا دا ءبىر جىل مەرزىمگە ۋاقىتشا جۇمىس ورىندارىن قۇرۋ كوزدەلگەن. جۇمىسپەن قامتۋ ورتالىعى جالاقى تولەنەتىن بۇل باعىتقا بيىل 5 881 ادامدى قامتۋدى جوسپارلاعان.
قالادا سونىمەن قاتار جاستار مەن زەينەت جاسىنا دەيىنگى قالا تۇرعىندارىنا جۇمىس بەرۋ جوباسى دا جۇزەگە اسۋدا. ناقتى ايتقاندا, «جاستار تاجىريبەسى», «العاشقى جۇمىس ورنى», «كۇمىس جاس» جانە ت.ب. وسى ورايدا جاستار پراكتيكاسىنا العان ماماندىعى بويىنشا جۇمىس ءوتىلى ءبىر جىلدان اسپايتىن 29 جاسقا تولعان ءبىلىم بەرۋ ۇيىمدارىنىڭ تۇلەكتەرى قاتىسا الادى. جالاقىنى جۇمىسپەن قامتۋ ورتالىعى 30 ايلىق ەسەپتىك كورسەتكىشتەن كەم ەمەس مولشەردە تولەيدى. بۇل – شامامەن 122 520 تەڭگە. باعدارلامامەن وسى جىلى 1 مىڭ ادامدى قامتۋ جوسپارلانىپ وتىر.
سپيكەر 29 جاسقا دەيىنگى جاستارعا, ونىڭ ىشىندە ەڭبەك ءوتىلى جوق NEET ساناتىنداعى جاستارعا دا 18 ايدان اسپايتىن مەرزىمگە ۋاقىتشا «العاشقى جۇمىس ورنى» جوباسىنىڭ قاراستىرىلعانىن اتاپ ءوتتى. جۇمىسپەن قامتۋ ورتالىعىنان تولەنەتىن جالاقى مولشەرى كەمىندە 91 980 تەڭگە. بۇل باعىتتا بيىل 424 ورىن قاراستىرىلعان. ال «ۇرپاقتار ۇندەستىگى» جوباسى اياسىندا 2 جىل ىشىندە وقۋىن اياقتاعان, جاسى 29-دان اسپاعان ءبىلىم بەرۋ ۇيىمدارىنىڭ تۇلەكتەرىنە 6 ايدان اسپايتىن مەرزىمگە ۋاقىتشا جۇمىس ورىندارى اشىلىپ, كەمىندە 91 980 تەڭگە تولەنەتىن بولادى. ونىمەن قامتىلاتىنداردىڭ سانى – 59. سونىمەن بىرگە زەينەتكەرلىك جاستاعى جۇمىسسىزدار «كۇمىس ءداۋىر» جوباسى اياسىندا ءبىر جىل ۋاقىتشا جۇمىسقا ورنالاسا الادى. وعان 633 زەينەتكەردى قامتۋ كوزدەلگەن.
جۇمىسپەن قامتۋ ورتالىعى جۇمىس بەرۋشىلەرمەن رەكرۋتينگ جانە ماقساتتى باعىتتار بويىنشا ىقپالداستىقتا. ەلەكتروندى ەڭبەك بيرجاسىندا مىڭنان استام حابارلاندىرۋ تىركەلسە, 500-دەن استام كاسىپورىندا تۇراقتى بوس جۇمىس ورىندارى بار. ءتيىستى ۆەدومستۆو دەرەگىنە سۇيەنسەك, جىل باسىنان بەرى 11 894, ونىڭ ىشىندە 3 566 تۇراقتى, 8 328 جۇمىسسىز ۋاقىتشا جۇمىسقا ورنالاسقان.
سپيكەر سونىمەن قاتار, جۇمىسپەن قامتۋ ورتالىعى اتاۋلى الەۋمەتتىك كومەكتى تاعايىنداۋعا قۇجاتتار قابىلدايتىنىن جەتكىزدى. ااك الۋعا جان باسىنا شاققانداعى ورتاشا تابىسى تومەن (بۇگىندە بۇل – 28 616 تەڭگە) ازاماتتار قاتىسا الادى. جىل باسىنان بەرى 4 مىڭنان استام وتباسىنان ءوتىنىش تۇسكەن.
الماتى