ەلوردادا جۋرناليستيكا مەترى نۇرتىلەۋ يمانعالي ۇلىن ەسكە الۋعا ارنالعان بيلياردتان تۋرنير ءوتتى. «ماسكەۋ» پيراميداسى بويىنشا وتكەن تىلشىلەر دوداسىن بەلگىلى جۋرناليست ءنۇردىلدا وراز ۇيىمداستىردى.
جارىسقا قاتىسقان جۋرناليستەر قاۋىمى ەكى سانات بويىنشا توپقا ءتۇستى. جاستار اراسىنداعى دودادا الپىس جاسقا دەيىنگى تىلشىلەر باق سىناسا, الپىس جاستان اسقاندار ارداگەرلەر الامانىنا قاتىستى. ەكى سانات بويىنشا دا جيىرما تورتتەن جالپى سانى 48 ارىپتەسىمىز جۇلدەلى ورىنداردى ساراپقا سالدى. الدىمەن ولار ءتورت-تورتتەن توپقا ءبولىندى. ءار توپتان ۇزدىك شىققان ەكى جۋرناليست ۇزدىك ون ەكىنىڭ قاتارىنا ەندى. ولاردىڭ ەندى ەرەجە بويىنشا جەڭىلۋگە قۇقى جوق.
جاستار اراسىنداعى دودانىڭ فينالىندا «Egemen Qazaqstan» باسىلىمىنىڭ ءتىلشىسى تابيعات مۇسىلمانقۇل مەن ءنۇردىلدا وراز كەزدەستى. ءۇش كەزەڭگە سوزىلعان كەزدەسۋ قورىتىندىسى بويىنشا ءنۇردىلدا وراز تۋرنير جەڭىمپازى اتانسا, تابيعات ەكىنشى ورىن يەلەندى. ۇزدىك ۇشتىكتى بەلگىلى اقىن داۋلەتكەرەي كاپ ۇلى قورىتىندىلادى.
ارداگەرلەر اراسىنداعى الاماندا «كازاحستانسكايا پراۆدا» گازەتىنىڭ ارداگەرى ماقسۇت يرجانوۆ قارسىلاستارىنان قارا ءۇزىپ, جەڭىستىڭ ەڭ بيىك تۇعىرىنان كورىنسە, كەنجە جۇماعۇلوۆ ەكىنشى, راسۋل سىرگەباەۆ ءۇشىنشى ورىن يەلەندى. جۇلدەگەرلەردى دودانىڭ باس دەمەۋشىسى دۋلات تاستەكەەۆ پەن نۇرتىلەۋ يمانعالي ۇلىنىڭ وتباسىنان كەلگەن ازاماتتار ماراپاتتادى. جوعارى دەڭگەيدە ۇيىمداستىرىلعان تۋرنير قورىتىندىسىندا ۇزدىك ويىن كورسەتكەن بىرنەشە ارىپتەسىمىز ارنايى اتالىمدار بويىنشا قارجىلاي سىيلىق الدى.