بۇگىن ءماجىلىس توراعاسى ەرلان قوشانوۆ كەڭەس وداعىنىڭ باتىرى اتاعىن ەكى مارتە يەلەنگەن تالعات بيگەلدينوۆتىڭ ەسكەرتكىشىنە گۇل شوقتارىن قويدى, دەپ حابارلايدى Egemen.kz.
ءماجىلىس سپيكەرى سوعىس مايدانىنان ورالماعان جاۋىنگەرلەردى ءبىر مينۋت ۇنسىزدىكپەن ەسكە الدى.
قازاقستاندىقتار كسرو-نىڭ باسقا دا كوپتەگەن حالىقتارى سياقتى ورتاق جەڭىسكە جەتۋگە قوماقتى ۇلەس قوستى. قازاقستاننان مايدانعا 1 ميلليون 200 مىڭنان استام ادام اتتانىپ, ولاردىڭ جارتىسى سوعىستان ورالمادى. 500-دەن استام قازاقستاندىق جاۋىنگەر كەڭەس وداعىنىڭ باتىرى اتاندى. ونىڭ ىشىندە كەڭەس وداعىنىڭ باتىرى اتاعىن ەكى مارتە يەلەنگەن ۇشقىش-شابۋىلداۋشى, سوعىس جىلدارىندا 305 رەت اسكەري شابۋىلعا شىعىپ, جاۋدىڭ جەتى ۇشاعىن اتىپ تۇسىرگەن تالعات بيگەلدينوۆتى ەرەكشە اتاپ وتۋگە بولادى.
بيىل تالعات بيگەلدينوۆتىڭ تۋعانىنا 100 جىل تولىپ وتىر. اتى اڭىزعا اينالعان قازاقستاندىق ۇشقىشتىڭ مونۋمەنتى ەلوردانىڭ سارىارقا اۋدانىنداعى باتىردىڭ قۇرمەتىنە بەرىلگەن كوشەدەگى ساياباقتا ورنالاسقان.
ايانا توعانبەك