ءبىر شاڭىراق استىنداعى مەرەكە

ءان اۋەلەپ, كۇي كۇمبىرلەگەن ورتا­لىق الاڭدا جارمەڭكەدەگى ساۋدا دا قىزا ءتۇستى. ساۋدا دۇڭگىرشەكتەرىندە ءوڭىر شارۋالارىنىڭ ەت, ءسۇت, بال, كون­دي­تەرلىك ونىمدەرى ساتىلسا, كەلەسى قاتار­لار­دا تەرى, ءجۇن, اعاشتان جاسالعان ۇلت­تىق بۇيىمدار مەن اشەكەيلەر كور­مەسى قويىلدى. كورمەگە «ەڭبەك» باع­دار­لا­ماسى بويىنشا گرانت العان كاسىپ­كەر­دىڭ جيىرماسى تۇگەل قاتىستى. 200 اەك كولەمىندە گرانت العاندار بۇل سومانى ءوز ءىسىن باستاۋعا جۇمساعان. اتاپ وتەرلىگى, بيىل گرانت مولشەرى ەكى ەسەگە ارتىپ وتىر.

اشىق اسپان استىندا ءدامحانا ۇيىم­داستىرىلىپ, جۇرتشىلىق الاڭدا پىسى­رىل­گەن ءدامى ءتىل ۇيىرەر كاۋاپ پەن پالاۋدان, ىستىق باۋىرساقتان ءدام تاتتى. كۇش سىناسامىز دەگەندەرگە ءتۇرلى سپورت الاڭدارى اشىلدى. سونداي-اق كىشكەنتاي بالدىرعاندار ءۇشىن ويىن-ساۋىق الاڭى ۇيىمداستىرىلىپ, بالالارعا «ەميل» كاسىپورنى تاراپىنان 900 بالمۇزداق تاراتىلدى.

– ءبىز ءۇشىن بىرلىك كۇنى – ناعىز وت­با­سىلىق مەرەكە. الاڭعا بالالارى­مىزدى ەرتىپ كەلدىك. مەرەكەلىك كوڭىل كۇي سەزىلەدى, اۋا رايى دا تاماشا. بارشا ءوڭىر تۇرعىندارىن مەرەكەمەن قۇتتىقتاپ, بەيبىت ءومىر, مىقتى دەنساۋلىق تىلەيمىز! – دەيدى وسكەمەندىك رۋسلان نوعايباەۆ.

وسى كۇنى دوستىق ءۇيىنىڭ الدىنداعى الاڭدا «جاڭا قازاقستان – مىزعىماس بىرلىك مەكەنى» مەرەكەلىك ءىس-شارا­سى ءوتتى. دوستىق ءۇيى مەن قازاقستان حال­قى اسسامبلەياسىنىڭ بەلسەندىلەرى, ەتنو­مادەني بىرلەستىكتەر اسەرلى كون­تسەرتتىك باعدارلاما ۇسىنىپ, ۇلتتىق بي فەستيۆالىن, «اسسامبلەيا داستار­قانى» ۇلتتىق تاعامداردىڭ كورمەسىن ۇيىمداستىردى. ءتۇرلى ەتنوستاردىڭ ءان-بيلەرى كوپشىلىكتىڭ كوڭىلىن كوتەرىپ, كۇشىمىز بىرلىكتە ەكەنىن كورسەتتى.

ايتا كەتەرلىگى, دوستىق ءۇيى بيىل 30 جىلدىق مەرەيتويىن اتاپ وتپەك. 1992 جىلى وسكەمەندە ەلدەگى تۇڭ­عىش دوستىق ءۇيى اشىلىپ, ىشىندە ال­عاشقى كورەي, نەمىس, ازەربايجان, تاتار ەتنومادەني بىرلەستىكتەرى قۇرىلدى. بۇگىندە دوستىق ۇيىندە 22 بىرلەستىك ورنالاسقان. مەرەكەلىك ءىس-شارالار كەشكىسىن ارباتتا وتكەن «مادەنيەتتەر شوعىرى» اتتى جاستاردىڭ بي جارىسىنا ۇلاستى. ءدال وسىنداي كونتسەرت, كورمەلەر وبلىستىڭ بارلىق وڭىرىندە ءوتىپ جاتتى.