داۋلەت تۇرلىحانوۆ: ەندىگى مەجە – ازيا ويىندارى

– كۇرەستىڭ ءۇش ءتۇرى بويىنشا قازاقستاننىڭ بالۋاندارى 5 التىن, 8 كۇمىس جانە 8 قولا مەدال ولجالادى. بار­لى­عى – 21 جۇلدە. وسى كور­سەت­­­كىشكە كوڭىلىڭىز تولعان شى­­عار؟

– بىلتىرعى جەلتوقسان ايىندا رەسپۋبليكالىق كۇرەس فەدەراتسياسىندا ءبىراز وزگەرىس­تەردىڭ بولعانىن وزدەرىڭىز جاقسى بىلەسىزدەر. باسشىلىق قۇرامىنان باستاپ, ۇلتتىق, جاستار جانە جاسوسپىرىمدەر كوماندالارىنىڭ باپكەرلەرى اۋىستى. قىسقا عانا مەرزىمدە ولار اۋقىمدى ىستەر اتقارىپ, سونىڭ ناتيجەسىندە ازيا چەمپيوناتىندا جاقسى ناتيجە كورسەتتىك. اتالعان جارىسقا قىتاي قۇراماسى عانا كەلمەدى. قالعان مىقتى كوماندالاردىڭ بارلىعى دا ۇلانباتىردا ونەر كورسەتتى. بوزكىلەمگە شىققاندار اراسىندا ءار جىلدارى وليمپيا ويىندارى مەن الەم چەمپيوناتتارىندا اتوي سالعان ساڭلاقتار دا بولدى. ەڭ باستىسى, جاۋاپتى جارىستا جەرلەستەرىمىز ءوز جانكۇيەرلەرىن جەرگە قاراتقان جوق. گرەك-ريم كۇرەسى شەبەرلەرى جالپى ەسەپتە كوش باستادى. نەگىزى سول مەجەدەن كورىنە الما­عانىمىزعا ءبىراز ۋاقىت بولعان ەدى. بۇل جولى جوسپارىمىز ويداعىداي جۇزەگە استى. ال ەركىن كۇرەس پەن ايەلدەر كۇرەسى سايىسىندا وتانداستارىمىز ءۇشىنشى ورىندى يەلەندى. ارينە بۇل – وتە جاقسى كورسەتكىش! بىراق وعان توقمەيىلسۋگە بولمايدى. قازاقستاندا كۇرەس ونەرىنىڭ دەڭگەيىن كوتەرۋ ءۇشىن ءالى تالاي شارۋا اتقارۋىمىز كەرەك.

– ءيا, گرەك-ريم كۇرەسى شە­بەرلەرىنىڭ تابىسى قوماقتى بولعانى ءسوزسىز. ءبىر كەرەمەتى, بوز­كىلەمگە شىققان 10 با­لۋاننىڭ توعىزى جەڭىس تۇعى­رىنا كوتە­رىلدى. ولجاعا كە­نەل­­­گەن سول ورەن­دەرىمىزدىڭ بار­­لىعى ءوز دەڭ­گەيىندە ونەر كور­سەتتى دەپ ويلايسىز با؟

– كۇرەستىڭ ءار ءتۇرى بويىنشا الەم جانە قۇرلىق چەمپيوناتتارىندا 10 جۇلدە جيىنتىعى ساراپقا سالىنعانىمەن, وليم­پيا ويىندارىندا بەلدەسۋلەر التى سالماق دارەجەسى بويىن­شا عانا وتەتىنى وزدەرىڭىزگە ءما­لىم. ءبىر ايتا كەتەرلىگى, باس جۇلدەنى ولجالاعان مەيىرجان شەرماحانبەت (67 كيلو) پەن ءالىم­حان سىزدىقوۆ (130 كيلو) ءدال سول وليمپيادالىق سالماق­تاردا ونەر كورسەتتى. سوعان قۋانىپ وتىرمىز. موڭعوليادا ولار وتە جاقسى كۇرەستى. شە­شۋشى تۇستا ءبىزدىڭ ورەندەر ازۋلى قارسىلاستارىمەن اي­قاس­قاندارىنا قاراماستان, وزدە­رىنىڭ قايسارلىعى مەن تابان­دىلىعىنىڭ ارقاسىندا التىن تۇعىرعا كوتەرىلدى. وسىنداي جەڭىستەر سپورتشىلاردىڭ ءوز-وزىنە دەگەن سەنىمىن نى­عاي­تادى. سونىمەن قاتار جاۋاپ­كەرشىلىكتەرى دە ارتادى. الداعى ۋاقىتتا مەيىرجان مەن ءالىمحان بۇدان دا زور تابىسقا قول جەتكىزۋ ءۇشىن بارىنشا كۇش سالادى دەگەن ويدامىن.

ءيا, «اتتەگەن-اي!» دەگەن تۇس­تارىمىز دا جوق ەمەس. ماسەلەن, تالاي ءدۇبىرلى دودادا دارالانعان مەيرامبەك ايناعۇلوۆتىڭ (63 كيلو) ونەرىنە كوڭىلىم تولمادى. فينالعا دەيىن وتە جاقسى كۇرەسكەن ول شەشۋشى تۇستا شابىسىنان جاڭىلدى. امانعالي بەكبولاتوۆ تا (55 كيلو) ءدال سونداي جاعدايدى باسىنان كەشىردى. ەكەۋى دە كۇمىس جۇلدەنى قاناعات تۇتتى. جاستار بۋىنى وكىلدەرى اراسىنان ەرنۇر فيداحمەتوۆتەن (60 كيلو) بۇدان دا زور ناتيجە كۇتكەن ەدىك. بىراق ول قولا مەدالمەن شەكتەلدى. ەندى سول ولقى­لىقتاردى تۇزەۋ ءۇشىن بىز­دەر بار, باپكەرلەر مەن بالۋاندار بار, بارلىعىمىز بىرىگىپ, كوپ جۇمىس ىستەۋىمىز كەرەك.

– قازاقستان قۇراماسىن بي­ىل ەكى بىردەي اسا جاۋاپتى جا­رىس كۇتىپ تۇر. ءبىرىنشىسى – ازيا ويىندارى, ەكىنشىسى – الەم چەم­پيوناتى. ەلىمىزدىڭ ەڭ ۇز­دىك با­­لۋاندارى سول باسەكە­لەر­­دىڭ قايسىسىنا قاتىسادى؟

– ءبىز ءۇشىن ازيا ويىندارى ماڭىزدىراق. سول سەبەپتى دە ەلىمىزدىڭ ءبىرىنشى ءنومىرلى بالۋاندارى ءتورت جىلدا ءبىر رەت الاۋى تۇتاناتىن سارى قۇرلىقتىڭ باستى دوداسىندا ونەر كورسەتەدى. بۇل جارىس – 10-25 قىركۇيەك ارالىعىندا قىتايدىڭ حانچ­جوۋ قالاسىندا وتەدى. سول جەردە مىقتىلىعىمىزدى تۇبە­گەيلى مويىنداتۋعا ءتيىسپىز. ال قوسالقى قۇرامداعى بالۋاندار سەربيانىڭ استاناسى – بەلگرادتا جالاۋى جەلبىرەيتىن الەم چەمپيوناتىندا كۇش سىناسادى.

– اڭگىمەڭىزگە راحمەت.

اڭگىمەلەسكەن

عالىم سۇلەيمەن,

«Egemen Qazaqstan»