ىندەت كۇشەيىپ تۇرعاندا دەنساۋلىق ساقتاۋ جۇيەسى تولىعىمەن كوروناۆيرۋس ينفەكتسياسىن جۇقتىرعان ناۋقاستاردى ەمدەۋگە جانە ينفەكتسيانىڭ تارالۋىنا قارسى جۇمىس ىستەدى. دارىگەرلەردىڭ ايتۋىنشا, ەل بويىنشا ەپيدەميالىق جاعدايدىڭ تۇراقتانۋىنا بايلانىستى بارلىق الەۋەت پەن رەسۋرستى قالپىنا كەلتىرۋ جانە جاقسارتۋ جۇمىستارى جۇرگىزىلۋى كەرەك. نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ەلوردالىق مەديتسينا COVID-19-دان كەيىن قالاي قالپىنا كەلتىرىلەتىنىن جانە جاقىن ارادا قالاي داميتىنىن ايتتى.
«پاندەميانىڭ ەكى جىلىندا مەديتسينالىق قاۋىمداستىق تولىعىمەن توتەنشە جاعدايدا جۇمىس ىستەدى. ۆيرۋستى تولىقتاي جەڭە المادىق, مۇمكىن ءالى اياقتالماعان دا بولار. بىراق كادرلىق الەۋەتتى ءارى قاراي دامىتاتىن, بارلىق دەڭگەيدەگى مەديتسينالىق كومەكتىڭ ساپاسىن جاقسارتاتىن, وسى ۋاقىت ىشىندە پايدا بولعان ولقىلىقتاردى توقتاتاتىن ۋاقىت كەلدى. دەنساۋلىق ساقتاۋ سالاسىندا نەگىزگى, بىراق شەشىلەتىن پروبلەمالار بار. ولار كادر تاپشىلىعى جانە ينفراقۇرىلىمدى جاقسارتۋ قاجەتتىلىگى», دەيدى قالالىق دەنساۋلىق ساقتاۋ باسقارماسىنىڭ باسشىسى.
ت.مۇراتوۆتىڭ مالىمەتىنشە, جاقىن ارادا كادر تاپشىلىعىن ازايتۋ جانە دەنساۋلىق ساقتاۋ ينفراقۇرىلىمىن دامىتۋ بويىنشا كەشەندى جوسپارلار قابىلداناتىن بولادى. بۇگىندە قالا بويىنشا دارىگەرلەرمەن قامتىلۋ 80%-دان اسپايدى, ال تاپشىلىق 140 دارىگەردى قۇرايدى.
باسقارما باسشىسى تۇرعىندار سانى ارتىپ كەلە جاتقانىن ەسكەرە وتىرىپ, كادرلارعا ايرىقشا قاجەتتىلىك بار ەكەنىن اتاپ ءوتتى. بۇگىندە ەلوردادا ءبىر جالپى پراكتيكا دارىگەرىنە تۇسەتىن جۇكتەمە 1 604 ادامدى قۇرايدى.
«ەلوردالىق مەديتسينا ينفراقۇرىلىمى قازىرگى جاعدايعا سايكەس بولۋى كەرەك. قالا تۇرعىندارى جىل سايىن ءوسىپ كەلەدى, ءاربىر تۇرعىنعا ساپالى مەديتسينالىق كومەك كورسەتىلۋگە ءتيىس. پاندەميا كەزىندە ءبىز ەمحانالار مەن اۋرۋحانالاردىڭ عيماراتتارىن كۇردەلى جوندەۋدەن نەمەسە قايتا جوندەۋدەن وتكىزە المادىق. ەندى وسى باعىتتا جۇمىستار جۇرگىزىلەدى. 2018 جىلدان باستاپ 2021 جىلعا دەيىنگى كەزەڭدە 20 مينۋتتىق قادامدىق قولجەتىمدىلىكتى قامتاماسىز ەتەتىن 40 دارىگەرلىك امبۋلاتوريا نىسانى اشىلدى. بيىل تاعى 10 نىساندى اشۋ جوسپارلانىپ وتىر, ولاردىڭ ەكەۋى اشىلدى», دەدى ەلوردانىڭ باس دارىگەرى.
قالالىق دەنساۋلىق ساقتاۋ باسقارماسىنىڭ اقپاراتى بويىنشا بۇگىندە 1 استانالىق ەمحانانىڭ فيليالى, «دوستىق» دارىگەرلىك امبۋلاتورياسى تولىق جوندەۋدەن ءوتتى, تاعى 8 مساك ۇيىمىنا ءىرى جوندەۋ جانە №1 قالالىق ەمحانانىڭ ەسكى عيماراتىن قايتا جاڭعىرتۋ ءجۇرىپ جاتىر.
ت.مۇراتوۆ قازىر ەلوردالىق كلينيكالاردا مەديتسينالىق جابدىقتاردى جاڭعىرتۋ جۇرگىزىلىپ جاتقانىن اتاپ ءوتتى. بيىل 54 تەحنيكا ساتىپ الىنعانىن, ونىڭ ىشىندە قالانىڭ بەس ەمحاناسىنا ارنالعان كومپيۋتەرلىك توموگرافتار بارىن تىلگە تيەك ەتتى.
«2022 جىل بالالار جىلى دەپ جاريالانعانى بەلگىلى. ەندى بارلىق كورسەتكىش بويىنشا بالالارعا ارنالعان قىزمەتتى جانە بوساندىرۋ قىزمەتىن جاقسارتاتىن بولامىز. ەلوردادا تابيعي تۋ كورسەتكىشى جىلىنا 30 مىڭنان اسادى. بۇل دا دەر كەزىندە ارەكەت ەتۋدى تالاپ ەتەتىن وتە جوعارى كورسەتكىش. بالالار ستاتسيونارلارى مەن اكۋشەرلىك بلوكتاردى جوندەۋ جۇمىستارى جوسپارلانعان. سونداي-اق 2023 جىلى 250 توسەككە ارنالعان جاڭا اكۋشەرلىك كورپۋس سالىنادى. ونىڭ جوبالانۋى اياقتالدى», دەدى ت.مۇراتوۆ.
سونىمەن قاتار ول قالانىڭ جوسپارىندا ينتەرناتسيونالنىي ەلدى مەكەنىندە ءبىر اۋىسىمدا 150 ادام قابىلدايتىن العاشقى مەديتسينالىق-سانيتارلىق كومەك ورتالىعىن, ءوندىرىس ەلدى مەكەنىندە ءبىر اۋىسىمدا 250 ادام قابىلدايتىن جاڭا امبۋلاتوريالىق-ەمحانالىق كەشەندى سالۋ, №3 قالالىق ەمحانانى ورنالاستىرۋ ءۇشىن عيمارات ساتىپ الۋ ءراسىمى ءجۇرىپ جاتقانىن ايتتى.