مەكتەپ وتقا وراندى

بەلگىلى بولعانداي, ءۇشىنشى قاباتتا ورنالاسقان كىتاپ ساقتاۋ كابينەتىندە 15 شارشى مەتر اۋماقتا جيھاز بەن كىتاپتار وتقا ورانعان. ءورت ءسوندىرۋ ءبولىمى ماماندارى كەلگەنگە دەيىن 479 ادام, ونىڭ ىشىندە 414 بالا سىرتقا شىعارىلعان. جەدەل جاردەم بريگاداسى وقيعا ورنىنان 5 ادامدى اۋرۋحاناعا الىپ كەتتى. كەيىن ۇشەۋى ەمدەۋ مەكەمەسىنە جاتقىزىلدى.

ءتىلسىز جاۋدى اۋىزدىقتاۋعا توتەنشە جاعدايلار دەپارتامەن­تىنىڭ 35 قىزمەتكەرى, 9 تەحنيكا, ال اپاتتىق مەديتسينا ور­تالى­عىنان 4 مامان مەن 1 تەحنيكا جۇمىل­دىرىلعان. جاعىمسىز جاعدايدىڭ سەبەبى انىقتالۋدا.

قالا اكىمى اسايىن بايحانوۆ اۋرۋحاناعا بارىپ, زارداپ شەك­كەندەردىڭ جاعدايىن ءبىلىپ قايتتى. مەكتەپتىڭ جاعدايىمەن دە تانىس­تى. «ارىپتەستەرمەن بىرلەسىپ مەك­تەپتى قىسقا مەرزىمدە (2-3 اپتا) قالپىنا كەلتىرۋ بويىنشا ءىس-شارالار جوسپارىن جاسادىق. وقۋ ورنىنىڭ ءبىرىنشى جانە ەكىنشى قاباتتارى زارداپ شەككەن جوق, سوندىقتان مەكتەپتەگى وقۋ پروتسەسى جالعاسادى. ءۇشىنشى قابات تازالاۋ جانە جوندەۋ جۇمىستارىن قاجەت ەتەدى. ماماندار ورىن العان جاع­دايعا تولىقتاي تەرگەۋ جۇرگىزەدى. قازىر بالالار وزدەرىن جاقسى سەزىنەدى, اۋىر زاقىم العان جوق. بالالارعا بارلىق قاجەتتى كومەك تولىق كولەمدە كورسەتىلەدى», دەدى شاھار باسشىسى.

قىرسىق ءبىر اينالدىرسا, شىر اينالدىرادى دەمەكشى, سول كۇنى قالاداعى ەكى بىردەي ءىرى ساياجاي وت­قا وراندى. ءبىرى شاھار­دىڭ شى­عىس بولىگىندە, ءبىرى تەمىر­جول­شىلار اۋىلىنىڭ جانىندا ورنا­­لاس­قان.

– 15 ءساۋىر كۇنى ساعات 11:52-دە «نادەجدا» جانە «ۆوستوچنىي» ساياجاي سەرىكتەستىكتەرىندە ءورت شىققانى تۋرالى حابارلا­ما كەلىپ ءتۇستى. قىزىل جالىن شا­مامەن 30 گا اۋماقتاعى 10 سايا­جاي ۋچاسكەسىن جالمادى. ءورت­تى سوندىرۋگە توتەنشە جاع­داي­لار دەپارتامەنتىنىڭ 61 قىزمەت­كەرى مەن 5 بىرلىك تەحنيكا, «قازاقستان تەمىر جولى» ۇك» اق ءورت ءسوندىرۋ پويىزى جۇمىلدى­رىلدى. قوسىمشا سۋ جەتكىزۋ ءۇشىن جەرگىلىكتى اتقارۋشى ورگان­داردىڭ كۇشتەرى تارتىلدى, – دەلىنگەن وبلىستىق توتەنشە جاع­دايلار دەپارتامەنتىنىڭ رەسمي مالىمدەمەسىندە.

پاۆلودار