مەن قازاق حالقى اڭساپ جەتكەن ەگەمەندىگىمىزدى ساقتاپ, مەملەكەتتىگىمىزدىڭ عۇمىرلى بولۋى جولىندا تەر توككەن جانداردىڭ ءبىرىمىن. راس, تاۋەلسىزدىك بارىنەن قىمبات. سوندىقتان قيىندىقپەن كەلگەن تاۋەلسىزدىكتىڭ قادىرىن ۇعىنا ءبىلۋىمىز كەرەك. تاۋەلسىزدىك ءبىر كۇندە ورناي قالعان جوق. ەشكىمنىڭ باسىنا باق ءبىر كۇندە قونا سالمايدى. بۇل ءبىزدىڭ سان عاسىرلار اڭساپ جەتكەن ارمانىمىز ەدى. ءتىلدىڭ, تاريحتىڭ, سالت-ءداستۇردىڭ قايتا جاڭعىرۋىنا, وي-سانانىڭ قالىپتاسۋىنا قىزمەت ەتتىك. مۇنداي قيىندىقپەن كەلگەن تاۋەلسىزدىكتىڭ قادىرىن تۇسىنبەۋ دە اعاتتىق بولار. دەسەك تە, ءبىز ەندى تاۋەلسىزدىگىمىزدى ساقتاپ قالۋ ءۇشىن, ونى باياندى ەتۋ ءۇشىن ءومىر ءسۇرۋىمىز كەرەك. ەل قامى, حالىق تاعدىرىنا قاتىستى ىستەردە پەيىشكە دە, توزاققا دا بىرگە كىرۋگە ءتيىسپىز. ۇلى دالا الدىنداعى جاۋاپكەرشىلىك تە, پرەزيدەنتتىڭ قازاقستان حالقىنا ارناعان جولداۋى دا ءبىزدى بۇگىن وسىعان شاقىرادى.
مەملەكەت باسشىسى قاسىم-جومارت توقاەۆ جىل باسىنان بەرى قازاقستان حالقىنا ەكى جولداۋ ارنادى. ەكەۋىن دە زەر سالا وتىرىپ, تىڭدادىم. بۇل جولداۋلار ەلدىك مۇرات پەن ەرلىك سالتقا ادالدىقتى ايقىنداپ, بۇرىنعىدان دا نىعايتىپ, بەكىتە ءتۇستى. اقيقاتىندا, قازاقستاندىقتار جىل باستالماي جاتىپ كۇردەلى كەزەڭ مەن قاسىرەتى مول سىندارلى وقيعالاردى باستان وتكەردى. ەلدە ورىن العان تارتىپسىزدىك پەن تەررورلىق ارەكەتتەر – كونستيتۋتسيالىق قۇرىلىمعا, بيلىكتى باسىپ الۋعا باعىتتالعانى ايقىن اڭعارىلدى. وسى تۇستا, پرەزيدەنت قاسىم-جومارت توقاەۆ قازاقستان حالقىنا ۇندەۋ جولدادى. ۇكىمەتكە بىرقاتار تاپسىرمالار بەردى. لاڭكەستىككە قارسى شتابتىڭ وتىرىسىن وتكىزدى. پارلامەنت ماجىلىسىندە «قاسىرەتتى قاڭتار» ساباعى مەن تاجىريبەسىن كەڭ تۇردە ءسوز ەتتى. باسىم باعىتتار قاتارىندا: تاۋەلسىزدىك تاريحى مەن تاجىريبەسىنە توقتالىپ, ونى نىعايتۋ مەن باياندى ەتۋ ىسىنە كەڭ تۇردە ءمان بەردى. ەلدە ورىن العان اۋىر احۋال, كۇردەلى كەزەڭ كورىنىستەرى - ءبىر كۇننىڭ ءىسى ەمەس ەكەنىنە نازار اۋدارىلدى. حالىقتىڭ گاز باعاسىنا سايكەس نارازىلىعىنان باستاۋ العان بەيبىت شەرۋ تارتىپسىزدىك پەن تەررورلىق اگرەسسياعا ۇلاستى. مەملەكەتتى باسقارۋ ينستيتۋتتارىنا, بيلىكتى باسىپ الۋعا ارەكەت ەتكەنىنە ءجىتى دەن قويىلدى. بىتىمگەرشىلىك كونتينگەنتىنىڭ – ستراتەگيالىق نىسانداردى كۇزەتۋ, اقىل-كەڭەس بەرىپ, قولداۋ كورسەتۋ ميسسياسىن ورىندايتىنىن دا جالپاق جۇرتقا جۇيەلى جەتكىزدى. بۇدان بايقالاتىنى, ارعى تاريحتاعى ەلدىك مۇرات پەن ەرلىك سالتقا ادالدىق تانىتىپ, ەل-جەردى قورعاۋعا, داستۇردەن ءنار الىپ, ءومىر تاعىلىمىنا ءمان بەرۋ قاجەتتىلىگى نەگىزگى نازارعا الىنعانى جان-جاقتى تانىلدى. وتكەننىڭ ونەگەسى – بولاشاق باعدارى, كەمەل كەلەشەكتىڭ كوركەم كورىنىسى ەكەنى ءجىتى بايقالدى.
ەلدە ورىن العان تەرروريستىك اگرەسسيانىڭ سالدارى مەن سەبەپتەرىنە قاتىستى بىرقاتار وزەكتى ماسەلەلەرگە دە كوڭىل بولىنگەنىن ايتقان ءجون. بۇل تۇستا, ەل قاۋىپسىزدىگىن نىعايتۋ, قۇقىقتىق ءتارتىپتى قالپىنا كەلتىرۋ, لاڭكەستىك ارەكەتتەر ارتىندا كىمدەردىڭ تۇرعانىن انىقتاۋ, ۇلتتىق ۇلاندى, بارلاۋ ءھام شەكارا قىزمەتىن, ءدىني ەكسترەميزمگە قارسى كۇرەستى, تەڭسىزدىك ماسەلەسىن وڭدى شەشۋ ماسەلەلەرى كەڭىنەن قوزعالدى. مۇنىڭ ءمانى: حالىق اقيقاتتى بىلگىسى كەلەتىنىنە سايادى. تەررورلىق ارەكەتتىڭ باستاۋى مەن نەگىزىن, جاسىرىن كۇشتەردىڭ انىق-قانىعىن دا جۇرتتىڭ بىلگىسى كەلەدى. ەل قاۋىپسىزدىگىنىڭ ماڭىزى دا وسىندا جاتىر. بۇدان باسقا, حالىقتى ساپالى ومىرمەن قامتاماسىز ەتۋ, ءال-اۋقاتىن جاقسارتۋ باعىتىنا دا ماڭىز بەرىلدى. ەلدىڭ الەۋمەتتىك-ەكونوميكالىق تۇعىرىن بەكىتۋ, كاسىپكەرلەردىڭ جاۋاپكەرشىلىگىن ارتتىرۋ, بيۋروكراتيانىڭ ەتەك الۋىنا جول بەرمەۋ سىندى باعىتتارعا باسىمدىق بەرىلدى. سونداي-اق «سامۇرىق-قازىنا» قورى قىزمەتىنىڭ تيىمدىلىگىن ايقىنداۋ, ماكروەكونوميكالىق تۇراقتىلىقتى قامتاماسىز ەتۋ, جۇمىسسىزدىق پەن جۇمىسپەن قامتۋ ءىسىن دۇرىس جولعا قويۋ, جالاقى مەن زەينەتاقى جۇيەسىن رەتتەۋ, كوروناۆيرۋستىڭ جاڭا تولقىنىنا تويتارىس بەرۋ جايى دا كەڭ تۇردە ءسوز بولدى. ەل بايلىعى مەن جەر قازىناسى كوپتىڭ يگىلىگىنە اينالۋى قاجەتتىلىگى ورىندى قوزعالدى. جەكەلەگەن ادامدار مەن كومپانيالاردىڭ بايلىق كوزدەرىنىڭ ءمانى مەن سىرىنا دا دەن قويىلدى.
كەمەل ەلدىڭ كەلەشەگى – ءبىلىم مەن عىلىم بولسا, بۇل باعىتتاعى باستى ۇستانىم: ساپالى بىلىمگە قولجەتىمدىلىكتى ارتتىرۋعا سايادى. وسى ورايدا, جوو-نىڭ باسەكەگە قابىلەتتىلىگىن ارتتىرۋ, ەلىمىزدە شەتەلدىك جوو-نىڭ فيليالدارىن اشۋ, تەحنيكالىق ماماندىقتارعا باسىمدىق بەرۋ قاجەتتىلىگىنە كوپ كوڭىل ءبولىندى. انىعىندا: «...بارىمىزگە ءبىلىم تۋرالى كوزقاراسىمىزدى وزگەرتۋ قاجەت. گۋمانيتارلىق ماماندىقتارمەن اۋەستەنۋ كەزەڭى كەلمەسكە كەتتى. باسىمدىقتى تەحنيكالىق ماماندىقتارعا بەرۋ كەرەك. ينجەنەرلەر مەن ونەركاسىپشىلەردىڭ جاڭا بۋىنىن ءوسىرىپ شىعارۋ قاجەت» ەكەنى انىق-قانىق ايتىلدى. جاسىراتىنى جوق, ماڭىزدىسى: «جاقىن ارادا رەسەيدىڭ ۇزدىك تەحنيكالىق جوعارى وقۋ ورىندارىنىڭ فيليالدارىن اشۋ جوسپارلانىپ وتىر... ەكى تەحنيكالىق باعدارلانعان فيليال ەلىمىزدىڭ باتىسىندا بولعانى ءجون» ەكەنى دە جۇرتقا جەتتى. مۇندا دا ءومىر ءمانى مەن شىندىعى جاتىر.
ءبىلىم جۇيەسىندەگى شەشۋشى تۇلعا – ۇستازدىق قىزمەتكە ءمان بەرۋ ىسىنە دە ءجىتى دەن قويىلدى. ءتىپتى: «...ءبىلىم ساپاسىن جاقسى مۇعالىمدەرسىز كوتەرۋ مۇمكىن ەمەس» ەكەنىنە ءمان بەرىلدى. اقيقاتىندا, ۇستاز – ۇلتقا, ونىڭ بولاشاعىنا ەڭبەك ەتەدى. ونىڭ ءمانىسى: بالا ءوز انا تىلىندە تاربيەلەنبەسە, ءوز حالقىنا قىزمەت ەتە المايدى.
بۇدان باسقا, «قازاقستان حالقىنا» قوعامدىق-الەۋمەتتىك قورىن قۇرۋ, قارۋلى كۇشتەر قاتارىنا جاستاردى تارتۋ, قۇقىق قورعاۋ سالاسىن كەشەندى جاڭعىرتۋ, ازاماتتاردىڭ قاۋىپسىزدىگى مەن مەنشىك قۇقىقتارىنىڭ قورعالۋىنا كەپىلدىك بەرۋ, ەل بىرلىگى مەن دامۋ يدەياسىنىڭ بەرىك نەگىزى – تاتۋلىق پەن تۇراقتىلىقتى ساقتاۋ ءىسى جاڭارۋ كەزەڭىنە باستايتىنى جان-جاقتى ءسوز ەتىلىپ ەدى, قازىر سول ايتىلعانداردىڭ ءبارى بىرتىندەپ ورىندالىپ جاتىر. بۇدان بايقالاتىنى, بيلىك پەن حالىق تۇتاستىعى – بىرلىككە باستاپ, بەرەكە مەن ىنتىماقتى بەكىتە تۇسەدى. دامۋ نەگىزى مەن وركەنيەت ءورىسى ەكەنى دە انىق. «قاسىرەتتى قاڭتار» ساباعى, ءومىر تاعىلىمى وسىنى مىقتاپ ەسكە سالدى.
پرەزيدەنت ناۋرىزداعى جولداۋىندا الدىمەن قاڭتار دۇربەلەڭى جايلى ماعلۇمات بەرىپ, ۇجىمدىق شارت ۇيىمىنان اسكەر الدىرۋدىڭ سەبەبىن ءتۇسىندىردى. پرەزيدەنتتىڭ ايتۋىنشا, بۇل قاندى وقيعا تەرىس پيعىلدى ادامداردىڭ مەملەكەتتىك توڭكەرىس جاساماق نيەتىنەن تۋعان. جاڭا قازاقستاندى قۇرۋ كەيبىر ىقپالدى ادامدارعا ۇنامادى. ولار جىلدار بويعى زاڭسىز ارەكەتتەرىن ودان ءارى جالعاستىرۋ ءۇشىن بيلىككە يە بولۋدى كوكسەدى. استىرتىن توپ قۇردى. پرەزيدەنتتى بيلىكتەن كەتىرگىسى كەلدى. توڭكەرىس جاساۋعا ۇمتىلعانداردىڭ ىشىندە جوعارى لاۋازىم يەلەرى, اسكەري جانە ارناۋلى ورگاندار باسشىلارى دا بارى وكىنىشتى.
ماعان «بۇگىنگى كۇنى ۇلتتىق قۇندىلىقتاردى ۇلىقتاي الىپ ءجۇرمىز بە؟» دەگەن ساۋالدى كوپ قويادى. مەن بىردەن ولاي دەپ ايتا المايمىن دەيمىن. نەگە؟ ويتكەنى حالىقتى ءبىر باعىتقا, ءبىر مۇددەگە جەتەلەيتىن كۇش – يدەولوگيا. بىزگە ۇلتتىق يدەولوگيا قاجەت, قازاق حالقىنىڭ مۇددەسىن قورعايتىن, رۋحىن كوتەرەتىن, تاريحىن, مەملەكەتتىك ءتىلىن, سالت-ءداستۇرىن قولدايتىن, تۋعان جەرىن, وتانىن قورعايتىن يدەولوگيا كەرەك.
ءبىز بالا كەزىمىزدە قازاقتىڭ ىرىم-تىيىم, سالت-ءداستۇرىنىڭ ءبارىن بىلەتىن ەدىك. قازىر سونىڭ ءبارى شەتىنەن كەتىپ جاتىر. بۇگىندە تەلەديداردى قاراۋعا جۇرەكسىنەتىن بولدىق. ەكراندى قوسىپ قالساڭ جىن-شايتان سياقتى. شاشتارى البا-جۇلبا, جارتىلاي جالاڭاش, ىلعي شايتان سەكىلدى سەكەڭدەگەن, سەكىرگەن بىرەۋلەردى كورەسىڭ. وتىرىك كۇلەدى. حالىقتىڭ تالعامى تومەندەپ بارادى.
قازاق ءاۋ باستان, تابيعاتىنان تەرەڭ ويلى, فيلوسوف حالىق. ال مىنا بۇگىنگى كوك جاشىكتەن كورسەتىپ جاتقان دۇنيەنىڭ دەنى قازاقتىڭ تابيعاتىنا جات دەپ بىلەمىن. وسىلاي جالعاسا بەرسە, ءبىز ناعىز ۇلتتىق قاسيەتتەرىمىزدەن ايىرىلىپ قالۋىمىز مۇمكىن. جاستار وتە ەلىكتەگىش كەلەدى. بۇلار باتىسقا ەلىكتەپ جاتىر. ونىڭ ءبارى بىزگە ۇلگى, ونەگە بولا المايدى.
ءبىز اتا-سالت, اتا-ءداستۇر دەگەننەن ايىرىلىپ جاتىرمىز. مەن جاڭاشىلدىققا قارسى ەمەسپىن, بىراق ءبىز قازاقي قالپىمىزدى ساقتاي وتىرىپ, جاڭارۋىمىز كەرەك. مىنا جاھاندانۋ دەگەن ءداۋىر – وتە قيىن ءداۋىر. از حالىقتار شاباق سەكىلدى جايىنداردىڭ كومەيىنە جۇتىلىپ كەتەدى. ءبىزدى وندايدان ۇلتتىق تۇتاستىق قانا ساقتايدى.
پرەزيدەنت قاسىم-جومارت توقاەۆتىڭ قازاقستان حالقىنا «جاڭا قازاقستان: جاڭارۋ مەن جاڭعىرۋ» دەپ اتالاتىن جولداۋى وتانداستارىمىزدىڭ كوكەيىندەگى تاعدىرشەشتى سۇراقتارعا جاۋاپ بەرىپ, وزەكتى ماسەلەلەردىڭ ناقتى شەشىمى ۇسىنىلدى. بۇل رەتتە وتىز جىل بويى ەلىمىزدى كەرى تارتىپ كەلگەن سۋپەرپرەزيدەنتتىك جۇيەنىڭ جاڭا تۇرپاتتاعى پرەزيدەنتتىك – پارلامەنتتىك جۇيەگە اۋىساتىنى, بولاشاق پرەزيدەنتتىڭ شەكسىز قۇزىرەتكە يە بولمايتىنى, ونىڭ تۋعان-تۋىستارىنا مەملەكەتتىك قىزمەت, كۆازيمەملەكەتتىك قۇرىلىمداردا قىزمەت ەتۋگە تىيىم سالىناتىنى بەلگىلى بولدى.
جوعارى اۋديتورلىق پالاتا قۇرىلىپ, ولاردىڭ ءماجىلىس الدىندا جىلىنا ەكى رەت ەسەپ بەرەتىنى دە وسى جولداۋدىڭ كوپتى قۋانتقان تىڭ جاڭالىعى. ءوز الدىنا دەربەس اباي, ۇلىتاۋ, جەتىسۋ وبلىستارىنىڭ اشىلاتىنى دا تاريحي شەشىم. ياعني بۇل جولداۋدىڭ ءمان-ماڭىزى ايرىقشا. ەندى سولاردىڭ بىرقاتارىنا جەكەلەپ توقتالايىق.
ساياسي جاڭعىرۋدىڭ باستى ماقساتى – ازاماتتاردىڭ مەملەكەتتى باسقارۋ ىسىندەگى ءرولىن ارتتىرۋ بولسا, بۇل سايلاۋ ۇدەرىسى ارقىلى جۇزەگە اسپاق. پارتيالىق تىزىممەن سايلاۋ حالىقتىڭ سايلاۋعا دەگەن قىزىعۋشىلىعىن تومەندەتىپ جىبەردى. سايلاۋدى كەرەك قىلمايتىن ادامدار قاتارى كوبەيدى. ولار وزدەرىنىڭ داۋىسى ماڭىزدى ەكەنىنە, ەل ءومىرىن جاقسارتۋعا ىقپال ەتە الاتىنىنا سەنبەيتىن بولدى. اقيقاتىندا, قازىر جۇرت دەپۋتاتتاردى اسا تاني بەرمەيدى. وسىنداي جاعىمسىز جايتتى جويۋ ءۇشىن ارالاس سايلاۋ جۇيەسى ەنگىزىلمەك. ءماجىلىستىڭ دەپۋتاتتىق كورپۋسىنىڭ 70 پايىزى پروپورتسيونالدىق, 30 پايىزى ماجوريتارلىق تاسىلمەن جاساقتالادى. بۇل سايلاۋ ۇلگىسى وبلىستار مەن رەسپۋبليكالىق ماڭىزى بار قالالارداعى ءماسليحاتتار سايلاۋىنا دا ەنگىزىلەدى. بۇدان بىلاي ماجوريتارلىق جۇيە بويىنشا, ءاربىر ايماق پارلامەنتتىڭ تومەنگى پالاتاسىنا ءوزىنىڭ كەمىندە ءبىر دەپۋتاتىن سايلاي الادى. بۇل كوزقاراسى ءارتۇرلى ازاماتتاردىڭ ماجىلىسكە كەلۋىنە جول اشىلادى. سونداي-اق اۋدان, قالالارداعى سايلاۋ تولىعىمەن ماجوريتارلىق جۇيەگە كوشىرىلەدى. مەملەكەت باسشىسىنىڭ ايتۋىنشا, بۇل جەرگىلىكتى جەردە باسەكەلى ساياسي ورتا قالىپتاستىرىپ, ەلدىڭ الدىندا بەدەلدى, جاڭا تۇلعالاردىڭ ساياساتقا كەلۋىنە جول اشادى. ايتپەسە, دەپۋتاتتىققا تۇسەتىندەر كوبىنە ءوز بيزنەستەرىن قورعاپ, وزدەرىنىڭ جەكە شارۋاشىلىعىنا جاعداي جاساۋ ءۇشىن عانا باراتىن سياقتى كورىنەدى ماعان.
سودان كەيىن جولداۋداعى ەرەكشە توقتالعان سالالاردىڭ ءبىرى – قۇقىق قورعاۋ جۇيەسى بولدى. بۇل ورايدا ەلىمىزدە كونستيتۋتسيالىق سوت قۇرىلاتىنى جاريالاندى. پرەزيدەنت مۇنى ءادىل ءارى قۇقىقتىق مەملەكەت قۇرۋ جولىنداعى ماڭىزدى قادام دەدى. ويتكەنى كونستيتۋتسيالىق سوت ازاماتتار مەن زاڭدى تۇلعالاردىڭ زاڭدى قۇقى مەن مۇددەسىن قورعاۋ دەڭگەيىن ارتتىراتىن بولادى. قازىرگى تاڭدا ەلىمىزدەگى زاڭ اكتىسى مەن شەشىمىنىڭ اتا زاڭعا سايكەستىگىن انىقتاۋدا كەدەرگى بار. قازاقستانداعى ءتۇرلى قۇقىق نورمالارىن كونستيتۋتسيالىق كەڭەس تۇسىندىرەدى. بىراق ازاماتتار وسىنداي تۇسىنىكتەمە الۋ ءۇشىن بۇل ورىنعا تىكەلەي جۇگىنە المايدى. كوپتەگەن مەملەكەتتە كونستيتۋتسيالىق سوت ينستيتۋتى بار. وعان كەز كەلگەن ادام ءوزىنىڭ ساۋالىن جولداي الادى. اتا زاڭ ەرەجەلەرىنىڭ مۇلتىكسىز ساقتالۋىن وسى مەكەمە ءتيىمدى قامتاماسىز ەتەتىنىن الەمدىك تاجىريبە كورسەتىپ وتىر. مەملەكەت باسشىسى باس پروكۋرور مەن ادام قۇقىقتارى جونىندەگى ۋاكىلگە دە كونستيتۋتسيالىق سوتقا جۇگىنۋ مۇمكىندىگىن بەرۋدى ۇسىندى. مەنىڭشە, مۇنداي مۇمكىندىكتى سولارمەن قاتار مەملەكەتتىك ەمەس, باسقا دا قوعامدىق ۇيىمدارعا بەرۋ كەرەك دەپ ەسەپتەيمىن.
پرەزيدەنت سوت جۇيەسىنە قاتىستى دا ناقتى تاپسىرمالار بەردى. زاڭ ۇستەمدىگىن قامتاماسىز ەتۋ ءۇشىن بارلىق دەڭگەيدەگى سوتتاردىڭ شىن مانىندەگى تاۋەلسىز, اشىق جانە كاسىبي بولۋىنىڭ ماڭىزدىلىعىن اتاپ ءوتتى. سودان كەيىن قايتا قارالاتىن زاڭداردىڭ ءبىرى – بۇقارالىق اقپارات قۇرالدارى تۋرالى قۇجات بولماق. ويتكەنى جولداۋدا جۋرناليستەرگە قاتىستى دا ناقتى مىندەتتەر ايقىندالدى. بۇل ورايدا نەگىزگى باسىمدىق بۇقارالىق اقپارات قۇرالدارىنىڭ باسەكەگە قابىلەتتىلىگىن ارتتىرۋ جانە ازاماتتىق قوعام ينستيتۋتتارىنىڭ ءرولىن نىعايتۋعا جاسالدى. سونىمەن قاتار باق-تىڭ ەركىن بولۋى, بۇل تالاپتىڭ قازىر كەز كەلگەن وركەنيەتتى ەل ءۇشىن ايرىقشا ماڭىزدى ەكەندىگى ايتىلدى. پرەزيدەنت اتاپ وتكەندەي, وتاندىق اقپارات قۇرالدارىنىڭ قازاقستاندا, وڭىردە جانە الەمدە بولىپ جاتقان ۇدەرىستەر تۋرالى ءوز كوزقاراسى بولۋى ءتيىس. سەبەبى ەلىمىزدىڭ اقپاراتتىق قاۋىپسىزدىگى, ءتىپتى يدەولوگيالىق دەربەستىگى وسىعان تىكەلەي بايلانىستى. پرەزيدەنت باق بيلىك پەن حالىقتىڭ اراسىنداعى ءتيىمدى بايلانىس ارناسى بولا وتىرىپ, ەلدەگى قوردالانعان ماسەلەلەردى كوتەرۋگە مىندەتتى ەكەنىن جانە مۇنى جوعارى ازاماتتىق جاۋاپكەرشىلىكپەن جاساۋ كەرەكتىگىن مالىمدەدى. سوندىقتان مەملەكەتتىڭ مۇددەسىن, قوعامنىڭ سۇرانىسىن جانە مەدياسالانىڭ دامۋ ءۇردىسىن ەسكەرە وتىرىپ, باق تۋرالى زاڭدى قايتا قاراۋ كەرەكتىگى وتە دۇرىس دەپ ويلايمىن. قازىر سەناتورلار مەن ءماجىلىس دەپۋتاتتارى ەلگە شىعىپ, جەرگىلىكتى باق وكىلدەرىمەن كەزدەسۋلەر وتكىزۋدە. بۇل ءوز ناتيجەسىن بەرەدى دەگەن سەنىمدەمىن.
تاعى ءبىر توقتالا كەتەتىن جايت, تاريحي جەرلەرگە وبلىس مارتەبەسى بەرىلۋى, ياعني جاڭعىرۋدىڭ ءبىر پاراسى ەلىمىزدىڭ اكىمشىلىك-اۋماقتىق قۇرىلىمىنا قاتىستى ايقىندالدى. قۋانىشتىسى, حالىقتىڭ قالاۋىنا ساي بىرقاتار وبلىستىڭ قۇرىلاتىندىعى بەلگىلى بولدى. بۇرىن جامبىل جالعىزسىراپ تۇراتىنداي ەدى, ەندى وعان اباي قوسىلىپ, سەمەي قالاسى جاڭا وبلىستىڭ ورتالىعىنا اينالدى. كەزىندە الاش ارىستارىنىڭ باسىن قوسقان سەمەي قالاسىنىڭ جاعدايى بۇگىندە قيىنداپ كەتكەنى بەلگىلى. دەمەك بۇل شەشىم تاريحي ادىلدىكتى ورناتىپ, ۇلىلارىمىز دۇنيەگە كەلگەن كيەلى ولكەنى قايتا جاڭعىرتۋعا جول اشارى ءسوزسىز. سول سەكىلدى جەزقازعان اۋماعىندا ۇلىتاۋ وبلىسى قۇرىلىپ, جەزقازعان قالاسى قايتادان وبلىس ورتالىعى مارتەبەسىن يەلەندى. پرەزيدەنت مۇنى ەكونوميكالىق قانا ەمەس, رۋحاني جاعىنان دا ماڭىزدى شەشىم دەپ اتاپ كورسەتتى. ويتكەنى كەڭ بايتاق قازاق جەرىنىڭ ءدال جۇرەگىنە ورنالاسقان ۇلىتاۋدىڭ ءتول تاريحىمىزداعى ورنى ەرەكشە. ەل تاعدىرىنا قاتىستى ۇلى جيىندار وتكەن, التىن وردانىڭ كىندىگى بولعان بۇل ايماقتىڭ تۋريستىك الەۋەتى دە وتە زور. ونىڭ وندىرىستىك قۋاتىن, لوگيستيكالىق مۇمكىندىگىن دە ۇتىمدى پايدالانۋ كەرەك. الماتى وبلىسىن ەكىگە ءبولۋ دە ورىندى: جەتىسۋ جانە الماتى وبلىستارى قۇرىلدى. الماتى وبلىسىنىڭ ورتالىعى قاپشاعايعا كەيىنگى كەزدەرى اتى اتالماي قالعان, قازاق حالقىنىڭ ۇلى پەرزەنتى دىنمۇحامەد قوناەۆتىڭ ەسىمى بەرىلەتىن بولدى. ەلدىڭ كوكەيىنەن شىققان بۇل قادامداردىڭ ايماقتاردى دامىتۋ ىسىنە تىڭ سەرپىن بەرەرى انىق.
قورىتا ايتقاندا, بۇل جولداۋ – ەلىمىزدىڭ ۇزاق مەرزىمدى دامۋىنا ارنالعان ستراتەگيالىق ماڭىزدى قۇجات. ونداعى ءاربىر باستاما ەل مۇددەسى ءۇشىن ەكەندىگىن اڭعارتتى. ەندىگى جەردە ەلىمىزدىڭ كەلەشەگىنە قاتىستى بارلىق شەشىمنىڭ ورىندالۋىنا بىرگە اتسالىسايىق, جاڭا قازاقستاندى بىرگە قالىپتاستىرايىق, قاشان دا ءبىر بولايىق, بىرگە بولايىق, ارداقتى اعايىن!
مىرزاتاي جولداسبەكوۆ