دەنساۋلىق ساقتاۋ سالاسى ءجيى سىنعا ۇشىراپ جاتادى. دەسە دە, سوڭعى جىلدارى مەديتسينالىق قىزمەت ساپاسىن كوتەرۋ ماقساتىندا بۇل سالادا كوپتەگەن جۇمىستار اتقارىلۋ ۇستىندە. سونىڭ ءبىرى – مەديتسينا ۇيىمدارىن اككرەديتتەۋدەن وتكىزۋ. بۇل ماسەلەنى تالقىلاۋ ماقساتىندا دەنساۋلىق ساقتاۋ مينيسترلىگى «رەسپۋبليكالىق دەنساۋلىق ساقتاۋدى دامىتۋ رەسپۋبليكالىق ورتالىعى» شجق رمك باس ديرەكتورىنىڭ ورىنباسارى داۋلەتحان ەسىموۆتى سوزگە تارتتىق.
داۋلەتحان سەرعازى ۇلى, سوڭعى كەزدەرى مەديتسينالىق ۇيىمداردى اككرەديتتەۋ دەگەن ۇعىمدى ءجيى كەزدەستىرەمىز. جالپى, اككرەديتتەۋ دەگەنىمىز نە؟ نە ءۇشىن قاجەت؟
– اككرەديتتەۋ ءسوزى لاتىن تىلىنەن ەنگەن. سەنىم بىلدىرەمىن دەگەن ماعىنانى بىلدىرەدى. ول – مەديتسينا عىلىمى مەن تەحنولوگيانىڭ قازىرگى زامانعى دامۋى نەگىزىندە بەگىلەنگەن ستاندارتتارعا سايكەستىگىن باعالاۋ ءۇشىن قولدانىلاتىن ءۇردىس. اككرەديتتەۋ – ەرىكتىلىك, تاۋەلسىزدىك, ادىلدىك, جاريالىلىق جانە ايقىندىق قاعيداتتارىنا نەگىزدەلگەن, ءارى باسەكەگە قابىلەتتى دەنساۋلىق ساقتاۋدى قالىپتاستىرۋ, مەديتسينالىق كومەكتىڭ ساپاسىن جاقسارتۋ ءۇشىن جۇرگىزىلەدى.
– ەلىمىزدە مەكەمەلەردى اككرەديتتەۋدەن وتكىزۋ جۇمىسى قاشان باستالدى؟
– 2007 جىلى قازاقستان رەسپۋبليكاسىنىڭ دەنساۋلىق ساقتاۋ مينيسترلىگى ەڭ العاشقى ۇلتتىق ستاندارتتاردى بەكىتتى. ول ستاندارتتار تالاي وزگەرىسكە ۇشىرادى. 2009 جىلدان باستاپ بىزدە اككرەديتتەۋ ءراسىمى باستالدى. جىل ساناپ اككرەديتتەۋدەن وتۋگە نيەتتەنگەن مەكەمەلەردىڭ سانى ۇلعايىپ جاتىر.
– دەمەك, اككرەديتتەۋدەن وتۋگە كەز كەلگەن مەديتسينالىق ۇيىم ءوتىنىش بىلدىرە الادى عوي؟
– ارينە, اككرەديتتەۋ ەرىكتى تۇردە وتەدى. بىزگە مەكەمەلەر سىرتقى كەشەندى باعالاپ, وتكىزۋدى سۇراپ الدىمەن ءوتىنىش بەرەدى. باعالاۋدان ءوتۋ مەديتسينالىق مەكەمەلەردىڭ وزدەرى ءۇشىن پايدالى. سەبەبى, ءتاجىريبەمىزدەن بايقاعانىمىزداي, كوبىنەسە حالىق سىرتقى كەشەندى باعالاۋدان وتكەن مەديتسينالىق ۇيىمعا سەنىم ارتادى.
– اككرەديتتەۋدەن وتكىزۋ ءۇشىن قاراجات قاجەت پە؟
– جوق, بىزدە دۇنيەجۇزىلىك قايتا قۇرۋ جانە دامۋ بانكىنىڭ «دەنساۋلىق ساقتاۋ سالاسىنا تەحنولوگيالاردى بەرۋ» جونىندەگى جوباسى شەڭبەرىندە اككرەديتتەۋ تەگىن وتكىزىلەدى. دامىعان ەلدەردە مەديتسينالىق مەكەمەلەر سىرتقى كەشەندى باعالاۋعا قاتىسۋ ءۇشىن مول قارجى جۇمسايدى. بۇل جاعىنان العاندا اككرەديتتەۋدىڭ تەگىن وتكىزىلۋى – وتاندىق مەديتسينالىق ۇيىمدار ءۇشىن ەداۋىر كومەك بولىپ تابىلادى.
– جالپى, باعالاۋ بارىسىندا باستى نازار نەگە اۋدارىلادى؟
– اككرەديتتەۋدەن وتۋگە نيەتتەنگەن مەديتسينالىق ۇيىمدار جان-جاقتى باعالاۋدان وتكىزىلەدى. سەبەبى, ول كەزدە جالپى باسقارۋ, دارىلىك قاۋىپسىزدىك, ءورت قاۋىپسىزدىگى, ناۋقاستىڭ قاۋىپسىزدىگى, قارجىنى باسقارۋ, ەڭبەك شارالارىنىڭ جۇرگىزىلۋ بارىسى, ىشكى اۋديت, رەسۋرستاردى باسقارۋ, ەڭبەك گيگيەناسى جانە ت.ب. پارامەترلەرگە ءجىتى نازار اۋدارىلادى. بۇل مەديتسينالىق قىزمەت ساپاسىن ارتتىرۋعا, تەحنيكالاردى زامان تالابىنا سايكەستەندىرۋگە, مەديتسينا سالاسىن جەتىلدىرۋگە سەپتىگىن تيگىزەدى.
– اككرەديتتەۋ مەديتسينانالىق ۇيىمدارعا نە بەرەدى؟
– جاڭا ايتىپ وتكەنىمدەي, باعالاۋ بارىسىندا كوپتەگەن پارامەترلەرگە نازار اۋدارىلادى. سوندىقتان ءبىز ول مەكەمەلەردىڭ ءالسىز تۇستارىن ايقىنداپ, وڭ ءناتيجە بەرەتىن جولدارىن كورسەتەمىز. بۇل مەديتسينالىق كومەك ساپاسىنىڭ جاقسارۋىنا سەپتىگىن تيگىزەدى.
– اڭگىمەڭىزگە راحمەت.
اڭگىمەلەسكەن
گاۋھار ەرمەكباەۆا.