وسىدان ەكى جىل بۇرىن جەكە كاسىپكەر ۆيتالي ميحايلوۆ بۇرىنعى بالاباقشانى ءوز يەلىگىنە ساتىپ الىپ, بۇلدىرشىندەردىڭ جەكەمەنشىك مەكەمەسىنە اينالدىرعان بولاتىن. الايدا, سوڭعى كەزدەرى جوسپاردان تىس ءتۇرلى تەكسەرۋلەردىڭ سالدارىنان تەمىردەي جۇيكەسى سىر بەرە باستاعان. جۇمىستان دا بەرەكە كەتىپ, جۇمىسشى-قىزمەتكەرلەر مەن اتا-انالار اراسىندا قولايسىز احۋال ورنىققان. قۇزىرلى ورىندار تاراپىنان ءجون-جوسىقسىز تالاپتار ۇدەپ بارا جاتقاننان كەيىن كاسىپكەر قورعانۋدىڭ امالىنا كىرىسكەن. وبلىستىق كاسىپكەرلەر پالاتاسىنا شاعىمدانىپ, ءىستىڭ اق-قاراسىن انىقتاپ بەرۋدى وتىنگەن. وعان جولداعان حاتىندا «بالاپان» باعدارلاماسى شەڭبەرىندە بوبەكجاي-بالاباقشا اشقانىن, 366 شارشى مەتر اۋماقتى قامتيتىن عيماراتتى قالپىنا كەلتىرۋ ءۇشىن بىرنەشە رەت نەسيە العانىن, مەكەمەنىڭ ءىشى-سىرتى تالاپتارعا ساي تولىق جابدىقتالعانىنا قاراماستان ماعىناسى جوق تەكسەرىستەردەن كوز اشپاي وتىرعانىن جازا كەلىپ, اراشا سۇراعان.
كەيىن ءمالىم بولعانداي, كيكىلجىڭ داۋدىڭ تۇتانۋى ءبىر اتا-انانىڭ بالاباقشانىڭ ىشكى ەرەجەسىن ورەسكەل بۇزۋىنان باستالعان. ولار ەركەتوتاي بالاسىن كەشىكتىرىپ اكەلۋدى ادەتكە اينالدىرعان. تاربيەشىنىڭ ەسكەرتۋىنە دورەكى تۇردە جاۋاپ بەرىپ, ونىڭ اقىرى قوقان-لوقىعا ۇلاسقان. سول-اق ەكەن, ساندالتقان سان تەكسەرىس قاپتاپ قويا بەرگەن. الدىمەن سانيتارلىق-ەپيدەميولوگيالىق قاداعالاۋ باسقارماسى كارىن توككەن. ءار توپتىڭ جەكە جۋىناتىن بولمەسى بولۋى شارت دەگەن ءۋاجدى كولدەنەڭ تارتىپ, 4 توپتىڭ ورنىنا 48 ورىنعا شاقتالعان 2 توپ اشۋعا عانا رۇقسات بەرگەن. باسقا مەكتەپكە دەيىنگى بالالار مەكەمەلەرىندە وسى ەرەجەنى بۇزعان ءىس-ارەكەتتەرگە كوز جۇما قاراعان. «الا قويدى بولە قىرىققانداي» ابدەن كۇزەگەنگە ۇقسايدى. ءبىر تەكسەرىستىڭ ءىزى سۋىماي جاتىپ ءبىلىم سالاسىنداعى باقىلاۋ دەپارتامەنتى سايتانداي ساپ ەتە قالىپ, جان الاتىن ازىرەيىلشە شۇيلىككەن. ديرەكتوردىڭ ەڭبەك دەمالىسىنان شىعۋىن كۇتپەستەن دۇنيە كۇيىپ بارا جاتقانداي «شاش ال دەسە, باس الاتىننىڭ» كەرىن كەلتىرگەن. «قىراعى كوزدەر» وقىتۋ جوسپارىندا بىرنەشە ساباق بويىنشا ارتىق ۋاقىت قوسىلعانىن «بايقاپ» قالىپ, بوبەكجاي-باقشانىڭ مەڭگەرۋشىسىنە 37 مىڭ تەڭگە ايىپپۇل تولەۋدى مىندەتتەگەن. جوعارى ءبىلىمدى ەكى پەداگوگ قايتا دايارلاۋ كۋرستارىنان وتپەدى دەپ ديرەكتوردىڭ ۇستىنەن سوتقا شاعىمدانعان. جوعارى ءبىلىمدى مامانداردىڭ جۇمىسقا جاڭا قابىلدانعانىن, كۋرستارعا جازىلىپ قويعاندارىن قۇلاقتارىنا دا ىلمەگەن. بەينە ءبىر جاۋ شاپقانداي اپاي-توپايىن شىعارعان. وتىز جىلدىق ەڭبەك ءوتىلى بار مەڭگەرۋشى ورىنسىز قىسىمعا توتەپ بەرە الماسا كەرەك, جۇمىستان كەتۋگە ارىز بەرگەن. كەي اتا-انالار سەنىمسىزدىك كورسەتىپ, بالالارىن الىپ كەتكەن.
جاي وعىنداي جارقىلداپ توتەنشە جاعدايلار جونىندەگى دەپارتامەنت جەتىپ كەلگەندە بودەنەدەي بۇعىپ قالعان مۇنداعىلاردا يمان-زارە قالماعان. ەشقانداي زاڭسىزدىق تاپپاسا دا الدىن اپىرىپ, جانىن جاپىرىپ كەتكەنگە ۇقسايدى. سالىق دەپارتامەنتى تەكسەرىس جۇرگىزەتىنى تۋرالى ءۇشبۋ سالەم جولداعاندا ابدەن ءتوزىمى دە, شىدامى دا تاۋسىلعان ۆ. ميحايلوۆ كاسىپكەرلەر پالاتاسىنا قايرىلۋعا ءماجبۇر بولعان. شاعىم ءوزارا ىنتىماقتاستىق تۋرالى مەموراندۋمعا سايكەس وبلىستىق پروكۋراتۋراعا جىبەرىلگەن. ەگجەي-تەگجەيلى تەكسەرىس قورىتىندىسى نەگىزىندە جوسپاردان تىس ءارى زاڭسىز بەيبەرەكەتتىككە جول بەردى دەگەن شەشىم قابىلدانعان. بىرقاتار تۇلعالار اكىمشىلىك جازاعا تارتىلعان.
بۇگىندە ءۆيتاليدىڭ ۇيقىسى ءتۇزۋ, كوڭىلى تىنىش. ول بارىنەن بۇرىن ەلباسى جارلىعىمەن قابىلدانعان ورتا جانە شاعىن بيزنەس قىزمەتى ءۇشىن جاعدايدى جاقسارتۋ تۋرالى شارالار ىشىندە نەگىزسىز تەكسەرۋلەرگە موراتوري جاريالانعانىنا ءدان ريزا.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.