سوڭعى جىلدارى پاۆلودار وبلىسىندا كيىكتەردىڭ سانى ارتىپ, 8 مىڭنان اسىپ وتىر. بۇل – وتكەن جىلمەن سالىستىرعاندا ەكى ەسەگە كوپ. براكونەرلەر قۇتىرسا قۇرىقتالاتىنىن سەزگەن بولۋى كەرەك, ازىرگە وڭىردە زاڭ بۇزۋشىلىقتار جوقتىڭ قاسى. ەسەسىنە, شارۋالار زار قاقساۋدا. ءتورت ت ۇلىكتىڭ ازىعىنا ورتاقتاسقان كيىكتەر ابدەن ابىگەرگە سالعان. كيەلى جانۋاردىڭ سانى ارتقان سايىن پروبلەما دا كوبەيە تۇسەتىنىن جاسىرمايدى.
پاۆلوداردا كيىك كوپ دەگەن اڭگىمە كوپشىلىككە تاڭسىق بولۋى مۇمكىن. شىنىمەن دە, باسقا وڭىرلەردەن اۋىپ كەلمەسە, ءجيى كوزگە كورىنبەيتىن جانۋار عوي. قايبىر جىلى پاۆلودارلىقتار سەمەي جاقتان اداسىپ كەلگەن تۇيەنى تىرىدەي كورۋگە اسىعىپ, الىس-جاقىننان اربالاپ ەدى. ەسەكتىڭ ءوزىن كورسە, مارە-سارە كۇي كەشەتىنى راس. قازىر كيىكتى جولىقتىرسا, تاڭعالمايتىن بولعان. جانۋاردى وبلىستىڭ بارلىق اۋماعىندا كەزدەستىرە المايسىز. اقسۋ قالاسىنىڭ اۋىلدىق ايماعىن, باياناۋىل جانە ماي اۋداندارىن مەكەن ەتەدى.
بۇل جانۋاردى قازاق اقبوكەن دەپ تە اتايدى. وعان ساكەن سەيفۋلليننىڭ «كيىكتى قازاق جانە دەيدى بوكەن, بەتپاقتى بايعۇس بوكەن قىلعان مەكەن», دەپ جىرلاعانى دالەل. وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى رۋسلان تولەپباەۆتىڭ ايتۋىنشا, وڭىردە 15 ساۋىردەن باستاپ ءبىر ايعا سوزىلاتىن «اقبوكەن» اكتسياسى باستاۋ العان.
«شارانىڭ ماقساتى – اقبوكەن پوپۋلياتسياسىن ساقتاپ, براكونەرلىكپەن كۇرەس بويىنشا جۇمىستى كۇشەيتۋ. كيىكتى زاڭسىز اۋلاعاندارعا جازا قاتال. جانۋاردىڭ ەركەگىن اتقانى ءۇشىن 500 اەك, ال انالىق كيىك پەن ءتولىن اۋلاعانى ءۇشىن 350 اەك كولەمىندەگى ايىپپۇل ارقالاۋى مۇمكىن», دەيدى ر.تولەپباەۆ.
اكتسياعا وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى, «وحوتزووپروم» كاسىپورنىنىڭ ينسپەكتورلىق قۇرامى جانە قۇقىق قورعاۋ ورگاندارىنىڭ قىزمەتكەرلەرى جۇمىلدىرىلعان.
ەستەرىڭىزگە سالساق, بيىل قاڭتار ايىندا باياناۋىل اۋدانىندا ەلىك پەن سىلەۋسىنگە زاڭسىز اڭشىلىق جاساعان ءبىر فاكت تىركەلگەن-ءدى. قازىرگى تاڭدا اتالعان فاكتىگە قاتىستى تەرگەۋ جۇرگىزىلۋدە. وسى ورايدا باقىلاۋ جۇمىستارىن كۇشەيتۋ ارتىق ەتپەس.
باقىلاۋ دەمەكشى, وبلىستا 2017 جىلدان باستاپ «وحوتزووپروم» مەكەمەسىنە قاراستى باياناۋىل تىرەك بەكەتىنىڭ ينسپەكتورلارى جانۋارلاردى قورعاۋ بويىنشا ماڭىزدى ميسسيانى مۇلتىكسىز اتقارىپ كەلەدى. ناتيجەسىندە, وڭىردە ارقارلاردىڭ سانى دا ارتۋدا. سوڭعى جىلدارى ءبىردى-ەكىلى وقيعا بولماسا, ايماعىمىزدا زاڭ بۇزۋشىلار جوقتىڭ قاسى. ورمان شارۋاشىلىعى جانە جانۋارلار دۇنيەسى كوميتەتىنىڭ 2023 جىلعا دەيىن عىلىمي ماقساتتاردان باسقا كيىكتەردى اتۋعا تىيىم سالۋ تۋرالى بۇيرىعى شىعىپ, موراتوري ەنگىزىلگەنى بەلگىلى. كيىكتەردى زاڭسىز اۋلاۋ ءۇشىن جاۋاپكەرشىلىكتى كۇشەيتۋ ماقساتىنداعى شارا دا وڭ ناتيجەسىن بەرىپ وتىرعانىن اتاپ وتكەن ءجون.
پاۆلودار وبلىسى