قازاقستاننىڭ اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆ ەلدەگى استىق تاپشىلىعى تۋرالى اقپاراتتى جوققا شىعاردى, دەپ حابارلايدى Egemen.kz.
«باق-تا شيكىزات تاپشىلىعىنا بايلانىستى كەيبىر ۇن تارتۋ كاسىپورىندارىنىڭ قىزمەتىن توقتاتا تۇرۋ تۋرالى بىرقاتار جاريالانىمدار تارادى. بىردەن استىق تاپشىلىعى جوق دەگەن حاباردان باستاعىم كەلەدى. رەسپۋبليكادا استىق قورى جەتكىلىكتى مولشەردە», دەدى قر اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆ.
ونىڭ مالىمەتىنشە, ەلىمىزدە 6,4 ملن توننا استىق بار. بۇل كولەم ىشكى قاجەتتىلىكتەردى قامتاماسىز ەتۋ, سونداي-اق استىقتىڭ ءبىر بولىگىن ەكسپورتقا جىبەرۋ ءۇشىن جەتكىلىكتى.
«ايتا كەتسەك, ءبىز جىل سايىن شامامەن 3 ملن توننا ۇن وندىرەمىز, بۇل كولەمنىڭ جارتىسى ەكسپورتقا جىبەرىلەدى. ىشكى نارىقتا تاپشىلىقتىڭ تۋىنداۋىن جانە ۇن تارتۋ كاسىپورىندارىنىڭ جۇكتەلۋىن بولدىرماۋ ماقساتىندا ۆەدومستۆوارالىق كوميسسيا 2022 جىلعى 1 ساۋىردەن باستاپ 15 ءساۋىر مەن 15 ماۋسىم ارالىعىندا بيداي مەن ۇن ەكسپورتىنا كۆوتالاۋدى ەنگىزۋ تۋرالى شەشىم قابىلدادى. بيداي كۆوتاسىنىڭ كولەمى – 1 ملن توننا, ۇنعا - 300 مىڭ توننا», دەپ ءتۇسىندىردى ايداربەك ساپاروۆ.
بۇدان باسقا, ىشكى نارىقتاعى ناقتى جاعدايدى باعالاۋ ءۇشىن ۆەدومستۆو ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ ۇلتتىق ستاتيستيكا بيۋروسىمەن جانە جەرگىلىكتى اتقارۋشى ورگاندارمەن بىرلەسىپ وڭىرلەردە بيدايدىڭ بار-جوعىن تۇگەندەۋ بويىنشا جۇمىس جۇرگىزۋدە.
«ۇنعا كەلەتىن بولساق, 7 ساۋىردەگى جاعداي بويىنشا قورلار 118 مىڭ توننانى قۇرايدى, ونىڭ ىشىندە 10 مىڭ توننا – تۇراقتاندىرۋ قورلارىندا, 22 مىڭ توننا – اينالىم سحەماسى شەڭبەرىندە, 48 مىڭ توننا – وندىرۋشىلەردە, شامامەن 20 مىڭ توننا – قويمالاردا جانە 18 مىڭ توننا - ساۋدا وبەكتىلەرىندە. كورسەتىلگەن كولەم ىشكى قاجەتتىلىكتەردى قامتاماسىز ەتۋ ءۇشىن جەتكىلىكتى. سونىمەن قاتار, «ازىق-ت ۇلىك كورپوراتسياسىنىڭ» رەسۋرستارىندا 800 مىڭ توننادان استام استىق بار, ولار قاجەت بولعان جاعدايدا تۇراقتاندىرۋ ءۇشىن ىشكى نارىققا جىبەرىلەتىن بولادى», دەپ ناقتىلادى ايداربەك ساپاروۆ.