ءسىز ويلاعاننان بولەك, ءبىز ويلاعاننان بيىك ويدىڭ جەلىسىمەن ومىرگە كەلگەن تۋىندىنى جاس تالانت قابىلەتىنىڭ شىڭى دەسەك بولاتىنداي. ادام قوعامنىڭ يلەۋىندە وسەتىنىن ەسكەرسەك, قىلقالام يەسىنىڭ ادەتكى تۇسىنىكتەن وزگەشە قادامعا بارۋى قايران قالدىرادى. ءتىپتى ونەرتانۋشىلاردىڭ ءوزى وڭ باعاسىن بەرىپ, سۋرەتكەرلىك قىرىنا سەنىم ءبىلدىرىپتى. بۇل ىستىق پىكىرلەر سۋرەتشىنىڭ شىعارماسىنا ۇڭىلۋىمىزگە سەپ بولدى.
كارتينا تاقىرىبىنان-اق شىعارمانىڭ ىشكى كومپوزيتسياسىنىڭ بەدەر-بيىگىنە ءارى ءمان-مازمۇنىنا قانىعۋعا بولادى. جاس سۋرەتشى دۋلات ۇسەنباەۆتىڭ «8-ءشى شاعىن اۋدان» تۋىندىسى بۇلىڭعىر تۇستەي ويدىڭ شارپىسۋىنان جازىلعانداي. ونى ءوزى دە جاسىرمايدى.
جالپى, ونىڭ كەسكىندەمەسىندەگى باستى ەكى جانر – پەيزاج جانە ناتيۋرمورت. سەبەبى ماستيحينمەن جۇمىس ىستەيتىن, وزىندىك مانەرى قالىپتاسقان سۋرەتشى جالپاق جاعىندى كەسكىندەمەدە ءتۇس پەن فورمانى قاراستىرادى. ياعني ءتۇس ارقىلى فورما قۇرايدى. اۆتوردىڭ جۇمىستارى ويلانىپ-تولعانۋعا شاقىرادى.
ماسەلەن, الماتى قالاسىنا ارنالعان پەيزاج توپتامالارىندا ەكسپرەسسياعا تولى بوياۋ جاعىستارى ادامنىڭ جۇرەك قاعىسىن جىلدامداتا ءتۇسىپ, ەرەكشە كوڭىل كۇيگە جەتەلەيدى. بۇل قالالىق پەيزاجداردىڭ باسىم بولىگى قاراڭعى دا كۇڭگىرت تۇستەرمەن جازىلعان تاس قابىرعالى سۋىق عيماراتتار, بوس كوشەلەر, شاعىن ۇيلەر بارلىعى ادام بالاسىنا ەش جىلۋلىق, جايلىلىق سىيلامايتىن كەڭىستىك رەتىندە ايقىندالعان. مىنە, بۇدان ءبىز ۇلكەن قالادا اداسقان ادامنىڭ كوزقاراسىن تانيمىز. سۋرەتشى مۇنى تىكەلەي اشىپ كورسەتپەسە دە, ىشكى تۇيسىگىنىڭ ناتيجەسىندە كورىنىس تاۋىپ تۇر.
اۆتور تۋىندىلارىنىڭ سىرتقى كورىنىستەرىنىڭ تۇرلىلىگىنە قاراماستان, ەموتسيونالدىق كۇيىمەن ەرەكشەلەنە تۇسەدى. جاس سۋرەتشىنىڭ شىعارماشىلىعى تەك ونەرىمىزدىڭ ودان ءارى دامۋىنداعى باستاۋ ەمەس, سونىمەن قاتار بۇگىنگى كۇنگى حالقىمىزدىڭ رۋحاني قۇندىلىقتارىن قالىپتاستىرۋداعى يدەيالىق-ەستەتيكالىق بەلسەندى كۇش بولىپ تابىلاتىنىن ەسكەرگەنىمىز ءجون.