سونىمەن 1 ساۋىردەن باستاپ بىرىڭعاي جيناقتاۋشى زەينەتاقى قورىنداعى جيناقتاردىڭ ەڭ تومەنگى جەتكىلىكتىلىك شەگى ءوستى. تيىسىنشە, سالىمشىلاردىڭ ازدى-كوپتى ارتىلعان سومانى كادەگە جاراتۋ مۇمكىندىگى ازايدى. ەندى مۇنداي تاماشا ءساتتىڭ قاشان تۋىندارى دا بەلگىسىز.
بۇل رەتتە ەnpf-otbasy.kz پلاتفورماسى 732 مىڭنان استام قازاقستاندىققا تۇرعىن ءۇي جاعدايىن جاقسارتۋعا جانە ەمدەلۋگە قاجەتتى رەسۋرستاردى الۋعا مۇمكىندىك بەردى. ورتاشا ەسەپپەن العاندا 2021 جىلى پلاتفورماعا اي سايىن 100 مىڭعا دەيىن ءوتىنىم كەلىپ تۇسسە, وسى جىلدىڭ 1-30 ناۋرىز ارالىعىندا enpf-otbasy.kz-كە كليەنتتەردەن تۇسكەن وتىنىمدەر سانى 2022 جىلدىڭ ەڭ جوعارعى دەڭگەيىنە جەتتى. بۇل دەگەنىمىز – 870 مىڭ.
وتباسى بانكتىڭ دەرەگىنشە, اياقتالعان وتىنىمدەر, ياعني ماقۇلدانعان وتىنىمدەر 352 مىڭدى قۇراعان. اتالعان سانات بويىنشا قاراجات نىسانالى ماقساتىنا جىبەرىلدى دەگەن ءسوز. كليەنت قاراجاتىنىڭ جەتكىلىكسىز بولۋىنا بايلانىستى كەرى قايتارىلعان وتىنىشتەر سانى – 146 مىڭ.
106 مىڭ ءوتىنىم بويىنشا كليەنت نىسانالى ماقساتىن راستايتىن قۇجاتتاردى بەكىتۋى كەرەك. سالىنعان قۇجاتتاردى تەكسەرۋگە بەرىلگەن ءوتىنىم – 73 مىڭ. 52 مىڭ ءوتىنىمدى كليەنتتەردىڭ ءوزى جويعان. كليەنتتەر قول قويماعان, اياقتالماعان وتىنىمدەر سانى 35 مىڭعا تەڭ.
34 مىڭ ءوتىنىم پىسىقتاۋعا جىبەرىلگەن. 33 مىڭ ءوتىنىم بويىنشا بجزق-دان ارنايى شوتقا قاراجاتتىڭ ءتۇسۋى كۇتىلىپ وتىر. تولىقتىرۋ ءۇشىن وتباسى بانكىنىڭ سالىمىن تاڭداۋدى قاجەت ەتەتىن وتىنىمدەر سانى – 20 مىڭ. بجزق-نا قايتارىلعان قاراجات بويىنشا وتىنىمدەر 19 مىڭدى قۇرادى.
كەلىپ تۇسكەن وتىنىمدەر, سونداي-اق ماقساتتى راستايتىن قۇجاتتار سالىنعان وتىنىمدەر كەزەك تارتىبىمەن پىسىقتالادى.
سونىمەن قاتار قازىر ەل ىشىندە 2022 جىلعى 1 ساۋىردە قازاقستاندىقتاردىڭ وتباسى بانكتەگى ارنايى شوتتارىنداعى بىررەتتىك زەينەتاقى تولەمى بجزق-عا قايتارىلادى دەگەن قاۋەسەت تاراۋدا. وتباسى بانكتىڭ حابارلاۋىنشا, ازاماتتاردىڭ ارنايى شوتتارىنداعى قاراجات ولاردىڭ مەنشىگى. ارنايى شوتقا اقشا تۇسكەن ساتتەن باستاپ قازاقستاندىقتاردىڭ تۇرعىن ءۇي جاعدايلارىن جاقسارتۋ ماقساتىندا ولاردى پايدالانۋ بويىنشا راستايتىن قۇجاتتاردى ۇسىنۋ ءۇشىن 20 جۇمىس كۇنى بار. وسىلايشا, ناۋرىزدىڭ اياعىندا ارنايى شوتقا تۇسكەن اقشانى 2022 جىلدىڭ 30 ساۋىرىنە دەيىن قولدانۋعا بولادى. ەگەر قاراجات ەمدەلۋ ماقساتىندا سۇرالىپ, ارنايى شوتقا تۇسكەن بولسا, وندا ازاماتتاردىڭ ولاردى پايدالانۋ ماقساتىن راستاۋ ءۇشىن 45 جۇمىس كۇنى بار.
سوندىقتان ارنايى شوتقا ءوز قاراجاتىن ءتۇسىرىپ قويعان ءوتىنىش بەرۋشىلەر بانكتىڭ ايماقتىق فيليالدارىنا بارماي-اق قۇجاتتاردى اسىقپاي جيناۋى كەرەك. ويتكەنى بارلىق ءراسىم ونلاين رەجىمدە وتەدى.
سونداي-اق الەۋمەتتىك جەلىلەردە «سوڭعى ءۇش كۇندە زەينەتاقى جيناقتارىنىڭ ارتىلعان سوماسى جوعالىپ كەتتى» دەگەن مالىمدەمەلەر تارالىپ جاتىر. بانكتىڭ حابارلاۋىنشا, بۇعان ۆاليۋتا باعامى سەبەپ. مىسالى, 2022 جىلعى 25-28 ناۋرىز ارالىعىندا بەرىلگەن 53 649 ءوتىنىمدى, سۇرالعان قاراجاتتىڭ جەتكىلىكسىزدىگىنە بايلانىستى بجزق كەرى قايتاردى. بۇعان ۆاليۋتا باعامىنىڭ وزگەرۋى جانە وسىعان بايلانىستى زەينەتاقى جيناقتارىن قايتا باعالاۋ اسەر ەتكەن. 2022 جىلعى 25 ناۋرىزدا زەينەتاقى اكتيۆتەرىن قايتا باعالاۋعا ىقپال ەتكەن دوللاردىڭ باعامى 494,16 تەڭگەنى, ال 2022 جىلعى 28 ناۋرىزدا 484,49 تەڭگەنى قۇرادى.
ء«وزىنىڭ بىررەتتىك زەينەتاقى تولەمىن بۇرىنعى شەكتى كورسەتكىش بويىنشا پايدالانۋ ءۇشىن بانك enpf-otbasy.kz پورتالىندا ءوتىنىم بەرۋدى 2022 جىلدىڭ 29 ناۋرىزىنا دەيىن ۇلگەرۋدى ۇسىندى. سەبەبى تۇرعىن ءۇي جاعدايلارىن جاقسارتۋعا جانە وتباسىن ەمدەۋگە ارنالعان بىررەتتىك زەينەتاقى تولەمىن پايدالانۋ قاعيدالارىنا سايكەس بانك 2 جۇمىس كۇنى ىشىندە ءوتىنىمدى وڭدەپ, بجزق-عا جىبەرەدى. بجزق قولدانىستاعى شەكتى كورسەتكىش بويىنشا وتىنىمدەردى 2022 جىلدىڭ 31 ناۋرىزىن قوسا العاندا ساعات 23:59-عا دەيىن قابىلداپ, قاراستىرادى», دەلىنگەن وتباسى بانكىنىڭ حابارلاماسىندا.
– وتىنىمدەردىڭ كوپشىلىگى قايتالانادى. بىرنەشە رەت ءوتىنىش بەرگەن رەكوردشىلار بار. بىراق ءدال وسى ناۋرىز ايىندا ءبىز قالىپتى جاعدايعا جاتپايتىن پروتسەستەردى بايقادىق: مىسالى, 5 تەڭگە الۋعا ءوتىنىم بەرگەندەر بار. 40 تەڭگەدەن 2000 تەڭگەگە دەيىنگى سومانى الۋعا 161 ءوتىنىم جولداندى. ادامنىڭ كومپيۋتەرلىك ساۋاتتىلىعىنىڭ ورتاشا دەڭگەيىندە پورتالدا بولۋ ۋاقىتى 15-20 مينۋتتى الاتىنىن ەسكەرسەك, مۇنداي وپەراتسيالاردىڭ قارجىلىق ءمانى تۇسىنىكسىز. سونداي-اق اقىلعا قونىمسىز سۇرانىستارى بار وتىنىمدەر تۇسە باستادى. مىسالى, پورتالدا 200 ملن تەڭگەدەن 6 ملرد تەڭگەگە دەيىن 627 ءوتىنىم كەلىپ ءتۇستى. بىرجولعى زەينەتاقى تولەمدەرىنىڭ مۇنداي سوماسى بۇرىن-سوڭدى بولماعانى تۇسىنىكتى. مامىر ايىنىڭ باسىندا زەينەتاقى جيناقتارىن پايدالانۋ جانە وسى بىرەگەي جوبانىڭ ەرەكشەلىكتەرى تۋرالى حالىققا تولىق ەسەپ جاريالاۋدى جوسپارلاپ وتىرمىز, – دەيدى وتباسى بانكىنىڭ باسقارما توراعاسى ءلاززات يبراگيموۆا.