ورتا سالماقتاعى IBF جانە IBO تۇجىرىمدارى بويىنشا الەم چەمپيونى قازاقستاندىق كاسىپقوي بوكسشى گەننادي گولوۆكين الداعى سەنبى كۇنى جاپونيادا جەرگىلىكتى بوكسشى رەتا مۋراتامەن شارشى الاڭعا شىعادى. وتانداسىمىز ماڭىزدى جەكپە-جەك الدىندا امەريكالىق بوكس مامانى تەددي اتلاستىڭ The Fight with Teddy Atlas جوباسىنا سۇحبات بەرىپ, ءوزىنىڭ قازىرگى موتيۆاتسياسى, كاسىپقوي بوكستىڭ شىڭىنا شىعۋداعى قيىندىقتارى, سونداي-اق مەكسيكالىق ساۋل الۆارەسپەن (57-1-2, 39 كو) ءوتۋى مۇمكىن بولعان ءۇشىنشى جەكپە-جەك تۋرالى اڭگىمەلەيدى. نازارلارىڭىزعا سۇحباتتىڭ جازباشا نۇسقاسىن ۇسىنامىز.
– گەننادي, ءسىز كەز كەلگەن بوكسشى شىقسام دەپ ارماندايتىن بارلىق بەلەستى باعىندىردىڭىز. وليمپيادانىڭ كۇمىس جۇلدەگەرى, ورتا سالماقتاعى الەم چەمپيونى اتانىپ قانا قوماي, سول اتاعىڭىزدى قاتارىنان 20 رەت ءساتتى قورعادىڭىز. ءسىز سپورتتا كەيىنگى 10 جىلداعى ەڭ ءىرى ەسىمدەردىڭ ءبىرى بولدىڭىز. قازىر جاسىڭىز 40-قا تاياپ قالدى (8 ساۋىردە 40-قا تولادى). وسى كۇنگە دەيىن رينگتە جۇرۋىڭىزگە ءسىزدى نە نارسە جىگەرلەندىرىپ كەلدى؟
– وتە جاقسى سۇراق. قازىر مەنى ءبىر نارسە جىگەرلەندىرەدى دەپ ايتۋ قيىن. بوكس – مەن ءۇشىن تەك موتيۆاتسيا عانا ەمەس, ءومىرىمنىڭ ءبىر بولشەگى. قازىر مەن ءوزىمدى وتە جاقسى سەزىنەمىن. قازىرگى ءومىر سالتىم بويىنشا مەن ءالى دە شارشى الاڭدا ەركىن جۇدىرىقتاسا الامىن. دەمەك, بۇگىنگە دەيىن شارشى الاڭدا جۇرسەم, وندا مەنى بوكستان ىسىراتىنداي وقيعا نەمەسە ادام بولماعانى عوي. سپورتشى رەتىندە دە, قاراپايىم ازامات رەتىندە دە مەن ءوز مىندەتىمدى اتقارىپ جۇرگەنىمە قۋانىشتىمىن.
– ايتپاقشى, كەلە جاتقان تۋعان كۇنىڭىزبەن. گەننادي گولوۆكين 40 جاسىندا «توبەلەسەمىن» دەپ ويلادى ما ەكەن؟
– راحمەت. شىنىمدى ايتسام, 40 جاسىما دەيىن رينگتە جۇرەمىن دەپ ويلاعان جوقپىن. وسى كۇنگە دەيىن كاسىبي بوكسشى بولىپ قالامىن دەگەن دە وي بولعان جوق. 40 جاسىمدا دا ءوزىمدى 39 جاستاعىداي سەزىنەتىن شىعارمىن. ياعني وزىمە ءالى دە كوڭىلىم تولادى, دەنىم ساۋ. 40 جاسىمدا دا ءوزىمدى وتە تاماشا سەزىنگىم كەلەدى.
– ەڭ كەيىنگى رەت شارشى الاڭعا ءبىر جارىم جىل بۇرىن شىقتىڭىز. ۇزاق ۋاقىتتان كەيىن رينگكە قايتا كوتەرىلۋ قيىن ەكەنى بەلگىلى. ءاردايىم ءوز بابىڭدا بولعىڭ كەلگەنىمەن, ءجيى جۇدىرىقتاسپاعاندىقتان, تاعى ۇزاق ۋاقىت جاتتىققىڭ دا كەلمەيدى. الداعى ايقاسقا دايىندىق قالاي ءوتىپ جاتىر, ءوزىڭىزدى قالاي سەزىنەسىز جانە ءبىز, ياعني جانكۇيەرلەر سىزدەن توكيودا نە كۇتە الامىز؟
– تەددي, ءدال وسى جەردە مەن ءسىزدى ماقتاعىم كەلىپ تۇر. ويتكەنى سۇراق وتە كاسىبي دارەجەدە قويىلىپ تۇر جانە بوكستا ۇلكەن تاجىريبەڭىز بار ەكەنى بىردەن بايقالادى. شىنىندا سولاي. مۇنداي كەزدە دايىندىق ۇزاق بولادى. ءبىر جارىم جىلدىڭ ىشىندە ەكى-ءۇش رەت جۇدىرىقتاسۋعا بولار ەدى. بىراق بەلگىلى سەبەپتەرمەن جەكپە-جەكتەر كەيىنگە ىسىرىلا بەردى. ەكى رەت تولىق جاتتىعۋ جيىنىن وتكىزدىم. ال قازىر العا قاراي ۇمتىلىستى, جىگەردى ساقتاپ, تاعى دا ءوز بابىما ەنۋىم كەرەك. بۇل – قازىر مەنىڭ الدىمدا تۇرعان ەڭ ءبىرىنشى مىندەت.
– كاسىپقوي بوكستا ايتارلىقتاي ءىرى جەتىستىكتەرىڭىز, تاماشا بوكس جولىڭىز بار. ۋاقىتى كەلگەندە, «كانەلوعا» قارسى تاعى ءبىر جەكپە-جەكسىز بوكستان كەتە الاسىز با؟ كوپ جەتىستىككە جەتكەنىڭىزگە قاراماستان, كارەراڭىزدى اياقتاماس بۇرىن وعان قارسى ءوزىڭىز قاناعاتتانا الاتىنداي جەكپە-جەك بولۋى ماڭىزدى ما؟ ءسىز ءۇشىن «كانەلومەن» تاعى ءبىر جەكپە-جەك وتكىزۋدىڭ قاجەتى بار ما؟
– قازىر مەن بۇل سۇراققا قالاي جاۋاپ بەرسەم دە, ادامدار جاۋابىمنان ءبارىبىر ءبىر ىلىك تابادى. مەنىڭ ەڭبەگىمە كەلەر بولساق, ونى مويىنداماۋعا تىرىساتىن, ياعني ءوز-وزدەرىن الدايتىن ادامدار قاشاندا تابىلادى. ال «كانەلو» تۋرالى سۇراعىڭىزعا جاۋاپ بەرەر بولسام, ەرتەڭگى كۇنىمىز قالاي بولارىن ەشكىم بىلمەيدى. ەگەر ءۇشىنشى جەكپە-جەك بولسا, بارىمىزگە جاقسى بولار ەدى, ال بولماسا ءبارى بۇرىنعىشا ءوز اعىسىمەن جۇرە بەرەدى. مەن شىندىققا تۋرا قارايتىن اداممىن.
– جەكپە-جەكتىڭ تارتىستى بولۋى بوكسشىنىڭ ستيلىنە بايلانىستى ەكەنى بەلگىلى. الدا مۋراتادان نە كۇتەسىز؟ قانداي جەكپە-جەك كورەمىز؟
– مۋراتانىڭ قابىلەتىن باعالاماۋعا استە بولمايدى. ونىڭ ۇستىنە جەكپە-جەك كەشى جاپونيادا وتەدى. تاجىريبەمىز كورسەتكەندەي, جاپونيادا ءبىز كۇتپەگەن, توسىن جاعدايلار بولۋى مۇمكىن. ول ءبىزدىڭ جەكپە-جەكتى ودان دا قىزىقتى ەتەدى. مەنىڭ ويىمشا, شىنىندا جەكپە-جەكتى جاسايتىن – بوكس مانەرى. بىزدە بولجاۋ قيىنعا سوعاتىن وتە اشىق ءارى قىزىقتى ەكى ءتۇرلى ستيل بار. ءبىز كورەرمەندەرگە, جانكۇيەرلەرگە تاماشا بوكس كەشىن, بوكس مەرەكەسىن سىيلايمىز دەپ ۇمىتتەنەمىن. جالپى, بوكس الەمى ءۇشىن بۇل بيىلعى ەڭ ۇزدىك جەكپە-جەكتەردىڭ ءبىرى بولادى.
– جەكە ءوز باسىم, مەن ءسىزدى ءالى دە جەڭىلمەگەن بوكسشى دەپ ەسەپتەيمىن. مۇنى ءبىزدىڭ شوۋعا قاتىسىپ جاتقاندىقتان ايتىپ جاتقان جوقپىن. مەن بۇل ويىمدى ESPN تەلەارناسىندا دا ايتقانمىن. «كانەلومەن» وتكەن ەكى جەكپە-جەكتە دە ءسىز جەڭدىڭىز دەپ ەسەپتەدىم. مەنىڭشە, ءسىز ءبىرىنشى ايقاستا ونى قۋىپ ءجۇرىپ سابادىڭىز, بىلايشا ايتقاندا, گولوۆكين بولدىڭىز. ال ەكىنشىسىندە باسقاشا جۇدىرىقتاسىپ, دجەبپەن «تاياق جەگىزدىڭىز». قازىر وسى ەكى ايقاس تۋرالى نە ويلايسىز؟ ماعان جانە كورەرمەندەرگە وسى جەكپە-جەككە كوزقاراسىڭىزدى ءتۇسىندىرىپ بەرسەڭىز. ءسىزدىڭ ارتقا قايىرىلمايتىنىڭىزدى بىلەمىز. بىراق نەگە تورەشىلەر ءسىزدىڭ ۇپايىڭىزدى ۇرلادى؟ اشىعىن ايتقاندا, ولار ءبىرىنشى ايقاستا دا, ەكىنشى جەكپە-جەكتە دە ءسىزدى تونادى. ونىڭ (الۆارەس) بيزنەستە اقشا گەنەراتورى ەكەنىن بىلگەندە قانداي سەزىمدە بولاسىز؟ وسى سۇراققا وزىڭىزگە قولايلى تۇردە جاۋاپ بەرسەڭىز.
– ول جەكپە-جەكتەر تۋرالى ايتۋ مەنىڭ جانىمدى جارالامايدى. مۇنى ۇنەمى ايتىپ تا ءجۇرمىن. شىنتۋايتىندا, شىندىق ەشكىمگە كەرەك ەمەس ەكەنىن بىلەمىن. بىراق شىندىقتى ايتىپ, ءوز ۇستانىمىندا قالاتىن ادامداردى قۇرمەتتەيمىن. بۇل ادامنىڭ جاقسى قاسيەتى دەپ ويلايمىن. كىم نە دەسە, و دەسىن, وسى ەكى جەكپە-جەكتە دە مەن جەڭىسكە جەتتىم. ادامداردا كوپ جاعدايدا ەكىجۇزدىلىك باسىم بولادى. ونىڭ قانداي ەكەنىن ايتايىن با؟ ياعني ءبىز تۇرعان بيزنەستىڭ (بوكستىڭ) ەرەجەسىندە وسىنداي جاعدايلار كەزدەسەتىن بولسا, وندا ول جۇمىس ىستەيدى دەگەن ءسوز. تەك سونى ءتۇسىنۋ كەرەك. بۇل جەردە ونى جامان نە جاقسى دەپ ايتۋدىڭ ءوزى ارتىق. تەك ول بيزنەس ەرەجەلەرىنىڭ ءبىرى ەكەنىن ءتۇسىنۋ قاجەت.
– ءسىزدى ۇزاق ۋاقىت بويى ابەل سانچەس جاتتىقتىردى. قازىر دجوناتون بەنكستىڭ قول استىندا جاتتىعاسىز. ايىرماشىلىق قانداي؟
– قازىر مەنىڭ اينالامدا وتە بىلىكتى ماماندار شوعىرلانعان. سپورتتىڭ كەز كەلگەن تۇرىندە جەتىلۋ كەرەك, دامۋ كەرەك. بارلىق جاعىنان. مەنىڭ كەرەمەت ديەتولوگىم بار. ول مەنىڭ جاعدايىم ناشارلاۋى ءۇشىن ەمەس, جاقسارۋى ءۇشىن قاجەت. سەنىڭ جانىڭدا مىقتى ماماندار, كوماندا بولسا, ولار سەنى كۇشتىرەك ەتەدى. ساعان كومەكتەسەدى. قازىرگى ۋاقىتتا سول مامانداردىڭ ءبارى مەنىمەن جۇمىس ىستەيتىندەي مۇمكىندىگىم بار.
سۇراققا كەلەر بولساق: «دجوناتون بەنكستىڭ ابەل سانچەستەن ايىرماشىلىعى قانداي؟». مەنى دۇرىس تۇسىنىڭىزدەر, مەن قازىر بۇل جەردە بىرەۋدى جامانداپ, ەكىنشىسىن ماقتاعىم كەلمەيدى. ابەل تۋرالى دا, بەنكس تۋرالى دا جاقسى پىكىردەمىن. ولار – دۇنيەتانىمى ءبىر-بىرىنە ۇقسامايتىن مۇلدەم كەرەعار ادامدار. ابەلگە ماعان جاساعان جاقسىلىقتارى, بەرگەن تاجىريبەسى ءۇشىن العىسىمدى بىلدىرەمىن. مەن ونى باعالايمىن. قازىرگى ۋاقىتتا مەن دجوناتون بەنكسپەن جۇمىس ىستەپ جاتىرمىن. وعان دا العىسىم شەكسىز, ونى دا جاتتىقتىرۋشىم رەتىندە, جەتەكشىم (ۇستازىم) رەتىندە قۇرمەتتەيمىن. بۇل – ءومىردىڭ ءبىر كەزەڭى. بۇرىن بولعاننىڭ ءبارىن ۇمىتىپ, جاڭا نارسە ۇيرەنىپ جاتىرمىن دەۋ دۇرىس ەمەس. بۇل – تەك بىلگەنىمدى جەتىلدىرۋ. ودان تەك جاقسارا, دامي تۇسەمىن دەپ ويلايمىن.
دايىنداعان
ءالي بيتورە,
«Egemen Qazaqstan»