بۇل وسىدان 30 جىل بۇرىن قىركۇيەك ايىندا بولعان ەدى. مەن ول كەزدە جالاعاش پوسەلكەلىك سوۆەتى اتقارۋ كوميتەتىنىڭ توراعاسى بولىپ قىزمەت اتقاراتىنمىن. كەزەكتى ەڭبەك دەمالىسىنا شىعىپ, تالدىقورعان وبلىسىنداعى «قاپال-اراسان» اتتى ساناتوريدە دەمالعانمىن.
ساناتوري عيماراتىنا قاراما-قارسى ورنالاسقان ۇلكەن قۇرىلىس ۇيىنە كىمدە بولسا نازار اۋدارماي كەتپەسى انىق. ساناتوري قىزمەتكەرلەرىنەن بۇل نەعىلعان عيمارات دەپ سۇراعانىمدا:
– بۇل رەزيدەنتسيا, مۇندا دىنمۇحاممەد احمەت ۇلى قوناەۆ دەمالىپ جاتىر, – دەدى.
– ول كىسىنى قالاي كورۋگە بولادى؟ – دەدىك ءبىز.
– كەشكىسىن, التىدان كەيىن ساناتوري اۋلاسىندا سەرۋەندەپ جۇرەدى, سول كەزدە كورۋگە دە, كەزدەسۋگە دە بولادى, – دەدى ساناتوري قىزمەتكەرلەرى.
الگى ايتىلعان ۋاقىتتا سول ماڭدا بولدىق. كەزدەسۋدىڭ ءساتى ءتۇستى. نۇرلان دەگەن قازالىنىڭ جىگىتى ەكەۋمىز بارىپ سالەم بەردىك. سəلەمىمىزدى جىلى جۇزبەن قابىلداپ العان ديمەكەڭ:
– جىگىتتەر, قاي جەردەن كەلىپ دەمالىپ جاتىرسىڭدار؟ – دەپ سۇرادى.
بىرەۋىمىز جالاعاشتان, ەكىنشىمىز قازالىدان ەكەنىمىزدى ايتتىق. وسىلاي اڭگىمەلەسىپ تۇرعانىمىزدا امان دەگەن ازامات كەلىپ قوسىلدى. ول قىزىلوردا قالاسىنان كەلگەندىگىن ايتتى. سول جولى نۇرلان ەكەۋمىز ديمەكەڭدى ورتاعا الىپ سۋرەتكە تۇستىك. ءبىز سۋرەتكە ءتۇسىپ بولعانشا دەمالۋشىلار ابزال اعانى اينالا قورشاپ تا الدى. ولار دا دارا تۇلعامەن سۋرەتكە ءتۇسۋدى ودان ءارى جالعاستىردى. سودان كەيىن ول كىسى كورىنبەدى, شاماسى, دەمالىسى ءبىتىپ قايتىپ كەتسە كەرەك-ءتى.
بىزبەن دەمالۋشىلاردىڭ ىشىندە قىزىلوردا قالاسىنداعى قازاق تەمىر جولىنا قارايتىن مەكتەپ-ينتەرناتتىڭ مۇعالىمى امان دەگەن ازامات (فاميلياسىن ۇمىتتىم) الدەنەشە رەت ديمەكەڭمەن دەمالىس بولمەسىنە شاقىرۋمەن بارىپ, ءان سالىپ بەرگەنىنىڭ كۋاسى بولعانىمىز بار-دى. ول مەكتەپ-ينتەرناتتا مۋزىكا پانىنەن ساباق بەرەدى ەكەن. باياندا ويناي وتىرىپ, حالىق اندەرىن ناشىنە كەلتىرىپ ورىندايتىن.
ءار زاماننىڭ وزىنە لايىقتى تاۋ تۇلعالارى بولعان. ونداي ازاماتتارعا حالىق كەزىندە ءوز باعاسىن بەرگەن. قازاق حالقىنىڭ تاريحىندا د.ا.قوناەۆتىڭ اتى ۇلكەن ارىپپەن ۇمىتىلماستاي بولىپ جازىلدى. سولاي جازىلىپ قالا بەرمەكشى. حالىقتىڭ بەرگەن باعاسىنان ارتىق باعا بولمايتىندىعىنا تاريح كۋا.
مەملەكەت باسشىسى قاسىم-جومارت توقاەۆتىڭ بيىلعى 16 ناۋرىزداعى جولداۋى جاڭا قازاقستاننىڭ تاريحىنداعى حالقىمىزدىڭ رۋحىن اسقاقتاتىپ, ەلدىك تۋىن كوككە كوتەرگەن ايرىقشا وقيعا بولدى.
ەلىمىزدىڭ كەڭ-بايتاق جەرىندە جاڭا اكىمشىلىك وڭىرلەردىڭ, اتاپ ايتقاندا اباي, ۇلىتاۋ, جەتىسۋ وبلىستارىنىڭ شاڭىراق كوتەرۋى, ءسوز جوق, ەرەكشە تاريحي ءسات ەدى. سونداي-اق بولاشاق الماتى وبلىسىنىڭ ورتالىعى قاپشاعاي قالاسى ۇلتىمىزدىڭ ارداقتى پەرزەنتى دىنمۇحامەد احمەت ۇلى قوناەۆتىڭ اتىمەن اتالىپ, الماتى قالاسى بارىن ەسكەرىپ, جاڭارعان وبلىسقا قوناەۆ ەسىمى بەرىلسە دا ارتىق ەمەس.
پرەزيدەنت ءوز جولداۋىندا دا, ودان بۇرىنعى سوزدەرىندە دە بۇگىنگى جاڭا كەزەڭگە بەت الىپ تۇرعاندا وسىنىڭ الدىنداعى مەملەكەتتىك تاۋەلسىزدىگىمىزدىڭ جەتكەن جەتىستىكتەرىن ساقتاي, باعالاي ءبىلۋ ماڭىزدىلىعىنا دا ايرىقشا نازار اۋدارىپ كەلەدى.
الايدا بارلىق ءىس-ارەكەت تەك ادالدىقپەن, مەيلىنشە ادىلدىكپەن اتقارىلۋعا ءتيىس. حالىق يگىلىگىنە ادال ەڭبەك ەتكەن اردا پەرزەنتىمىزدىڭ بىرەگەيى دىنمۇحامەد احمەت ۇلى قوناەۆ ەسىمى قانداي قۇرمەتكە دە لايىق.
شىڭعىس ايبوسىنوۆ,
قازاقستان جۋرناليستەر وداعىنىڭ مۇشەسى
قىزىلوردا وبلىسى