ەڭ تومەنگى جەتكىلىكتىلىك شەگى وسەدى

ەڭ تومەنگى جەتكىلىكتىلىك شەگى دەپ وتىرعانىمىز – زەينەتاقى جيناعىنىڭ بەلگىلى ءبىر سومادان اسقان بولىگى. ونى تۇرعىن ءۇي جاعدايىن جاقسارتۋعا نەمەسە ەمدەلۋگە پايدالانۋعا بولادى. ەڭ تومەنگى جەت­كىلىكتىلىك شەگىن enpf.kz سايتى نەمەسە بىرىڭعاي جيناقتاۋشى زەينەتاقى قورىنىڭ ءموبيلدى قوسىم­شا­سى ارقىلى, سونداي-اق egov پورتالى مەن ءموبيلدى قوسىمشاسى ارقىلى تەكسەرۋگە بولادى.

سالىمشى شەكتى سومادان ارتىلعان زەينەتاقى جيناعىنىڭ ءبىر بولىگىن پايدالانۋ تۋرالى شەشىم قابىلداعان جاعدايدا, ۋاكىلەتتى وپەراتورلاردىڭ ينتەرنەت-رەسۋرسى ارقىلى الدىن الا ءوتىنىم بە­رەدى. بۇگىندە تۇرعىن ءۇي جاعدايىن جاقسارتۋعا ارنالعان بىرجولعى زەينەتاقى تولەمدەرىنە ءوتىنىش قابىلدايتىن ۋاكىلەتتى وپەراتورلاردىڭ قاتارىندا وتباسى بانك, «حالىق بانك», Altyn Bank, «بانك تسەنتركرەديت» جانە «بانك فريدوم فينانس قا­زاقستان» بار. ال ەمدەلۋگە ارنالعان وتىنىشتەردى وتباسى بانك قابىلدايدى.

ۋاكىلەتتى وپەراتور بىرجولعى زەينەتاقى تولەمىن الۋ تۋرالى ءوتىنىشتى قاراعاننان كەيىن ەكى جۇمىس كۇنى ىشىندە بجزق-عا ەلەكتروندى حابارلاما جىبە­رەدى. بجزق تاراپىنان الۋعا قولجەتىمدى قارا­جات ۋاكىلەتتى وپەراتوردان ەلەكتروندى حابارلاما كەلىپ تۇسكەن كۇنگى ەڭ تومەنگى جەتكىلىكتىلىك شەگى بو­يىنشا تەكسەرىلەدى. ودان كەيىن بجزق بەس جۇمىس كۇنى ىشىندە الۋشىنىڭ ارنايى شوتىنا بىرجولعى زەينەتاقى تولەمىن اۋدارادى.

وسى ورايدا بيىلعا ارنالعان ەڭ تومەنگى جەت­كى­لىك­تىلىك شەگى وسى جىلدىڭ 1 ساۋىرىنەن باستاپ كۇشىنە ەنەتىندىكتەن, زەينەتاقى قورى ۋاكىلەتتى وپەراتورلاردان بجزق-عا 2022 جىلدىڭ 31 ناۋرىزىنا (قوسا العاندا) دەيىن كەلىپ تۇسكەن وتىنىشتەر بويىنشا بىرجولعى زەينەتاقى تولەمدەرىن جۇرگىزەدى. ياعني 31 ناۋرىزعا دەيىنگى وتىنىشتەردىڭ ءبارى 2021 جىلعا ارنالعان ەڭ تومەنگى جەتكىلىكتىلىك شەگىنە سايكەس ەسەپتەلەدى.

«زەينەتاقىمەن قامسىزداندىرۋ تۋرالى» زاڭ­دا ەڭ تومەنگى جەتكىلىكتىلىك شەگى ۇكىمەت بەكىت­كەن ادىس­تە­مەگە سايكەس ايقىندالعان مىندەتتى زەينەتاقى جارنالارى جانە مىندەتتى كاسىپتىك زەينەتاقى جارنالارى ەسەبىنەن قالىپتاستىرىلعان زەينەتاقى جيناقتارىنىڭ ەڭ تومەنگى مولشەرى دەپ ايقىندالعان. ونىڭ ايقىنداۋ ادىستەمەسى ۇكىمەتتىڭ 2013 جىلعى 2 قازانداعى قاۋلىسىمەن (2021 جىلعى 6 قاڭتاردا وزگەرىستەر مەن تولىقتىرۋلار ەنگىزىلدى) بە­كى­تىلگەن.

ادىستەمەگە سايكەس, ەڭ تومەنگى جەتكىلىكتىلىك شە­گى جىل سايىن ءار جاس ءۇشىن ەسەپتەلەدى جانە بو­لا­شاق زەينەتاقى تولەمدەرى مەن زەينەتاقى جار­نا­لارىنىڭ ءوسۋىن (يندەكستەلۋىن) ەسكەرەدى. بۇل رەتتە «رەسپۋبليكالىق بيۋدجەت تۋرالى» زاڭعا سايكەس جىل سايىن يندەكستەلەتىن ەڭ تومەنگى جالاقى, ەڭ تو­مەنگى زەينەتاقى, بازالىق زەينەتاقى تولەمىنىڭ ەڭ تو­مەنگى مولشەرى سياقتى الەۋمەتتىك كورسەتكىشتەر پاي­دالانىلادى.