IBF جانە IBO تۇجىرىمدارى بويىنشا ورتا سالماق دارەجەسىندە باق سىناپ جۇرگەن قازاقستاندىق كاسىپقوي بوكسشى گەننادي گولوۆكين مەكسيكالىق بوكسشى ساۋل الۆارەسپەن وتكىزگەن ەكى جەكپە-جەگى تۋرالى پىكىر ءبىلدىردى, دەپ حابارلايدى Egemen.kz.
«ساۋل الۆارەسكە قارسى وتكىزگەن العاشقى ەكى شايقاستىڭ ناتيجەسىنە باس اۋىرتپايمىن. اتالعان جەكپە-جەكتەردىڭ ناتيجەسى مەنى تولعاندىرمايدى. ويتكەنى مەن وتكەن شاقتى ەمەس, بولاشاقتى ويلايمىن. «كانەلوعا» قارسى ءۇشىنشى جەكپە-جەك وتسە, مەن ول شايقاسقا باسقاشا ويمەن دايىندالامىن. قانداي دا ءبىر قاتەلىكتەردى تۇزەۋ تۋرالى ويلامايمىن. مەن كاسىپقوي بوكس الەمىندە بىرەۋگە بىردەڭەنى دالەلدەۋ ءۇشىن جۇرگەن جوقپىن. ەڭ باستىسى جارقىن مانەردە جەڭىسكە جەتۋگە تىرىسامىن. مەن ءوزىمدى وتە جاقسى سەزىنگەندىكتەن كاسىبي مانسابىمدى جالعاستىرىپ كەلەمىن», دەدى گەننادي گولوۆكين DAZN-عا بەرگەن سۇحباتىندا.