سوڭعى جىلدارى بالالار دەنساۋلىعىنا الاڭداۋشىلىق باسىم. كۇردەلى پاتولوگيالاردىڭ سالدارىنان بالالار مۇگەدەكتىككە ۇشىراۋدا. ولاردى ەمدەۋدىڭ ءوزى ءبىر ماشاقات بولسا, ءبىلىم الۋمەن تولىققاندى قامتاماسىز ەتۋ الەۋمەتتەنۋدىڭ ەڭ كۇردەلى ساتىسىنا اينالىپ وتىر. وسىنداي قيىندىقتارعا قاراماستان, ءبىلىم سالاسىنىڭ ماماندارى تىعىرىقتان شىعۋدىڭ زاماناۋي مۇمكىندىكتەرىن يگەرۋگە كۇش سالۋدا. بۇل باعىتتا ينكليۋزيۆتى ءبىلىم بەرۋدىڭ ناتيجەلىلىگىن اتاپ وتۋگە بولادى.
جۋىردا اباي اتىنداعى قازۇپۋ رەكتورى دارحان ءبىلالوۆ «الەۋمەتتىك ينكليۋزيۆتى باعدارلامالار ورتالىعى» قوعامدىق قورىنىڭ وكىلدەرىمەن كەزدەسىپ, ينكليۋزيۆتى ءبىلىم بەرۋ كادرلارىن, پەداگوگ-اسسيستەنت رەتىندە تيۋتورلاردى دايارلاۋداعى ىنتىماقتاستىق ماسەلەلەرىن تالقىلاعان بولاتىن. ەلىمىزدە تيۋتورلاردىڭ كومەگىنە مۇقتاج بالالار سانىنىڭ كوبەيىپ بارا جاتقانىنا الاڭداۋشىلىعىن بىلدىرگەن د.ءبىلالوۆ بەلگىلى ءبىر ءبىلىم بەرۋ باعدارلامالارى بويىنشا ماماندانۋعا مۇمكىندىك بەرەتىن قوسىمشا كۋرستار وتكىزۋ, تيۋتورلاردى كاسىبي قايتا دايارلاۋ باعدارلاماسىن ىسكە اسىرۋ جانە ولاردىڭ جۇمىسىن ادىستەمەلىك سۇيەمەلدەۋدىڭ ماڭىزدىلىعىنا توقتالدى.
ء«اربىر بالا فيزيكالىق, ينتەللەكتۋالدىق, الەۋمەتتىك, ەموتسيونالدىق, تىلدىك جانە باسقا دا ەرەكشەلىكتەرىنە قاراماستان, ءبىلىم الىپ, ءبىزدىڭ قامقورلىعىمىزدى الۋى كەرەك», دەدى د.ءبىلالوۆ.
«الەۋمەتتىك ينكليۋزيۆتى باعدارلامالار ورتالىعى» قوعامدىق قورىنىڭ پرەزيدەنتى سالتانات مۋرزالينوۆا-ياكوۆلەۆا وسى ورتالىقتىڭ قىزمەتى مەن پەداگوگ-تيۋتورلاردى قايتا دايارلاۋ قاجەتتىلىگىنە توقتالىپ, بىلىكتى كادرلار تاپشىلىعىن اتاپ ءوتتى. ونىڭ ايتۋىنشا, وكىنىشكە قاراي, ەلىمىزدە تيۋتورلاردىڭ كومەگىنە مۇقتاج بالالار سانى ارتىپ كەلەدى.
الماتى قالاسى مەن ەلىمىزدىڭ ءبىلىم سالاسىنىڭ ناقتى ماسەلەلەرىن شەشۋگە باعىتتالعان ۋنيۆەرسيتەت باعدارلامالارى مەكتەپتەرمەن تىعىز جۇمىس ىستەۋ, قازىرگى تاڭدا سۇرانىسقا يە كادرلاردى قايتا دايارلاۋ, سونداي-اق جۇمىس بەرۋشىلەرمەن جانە «ورلەۋ» ورتالىعىمەن ءوزارا بايلانىس ورناتۋ, ستۋدەنتتەردىڭ پراكتيكاسىن وتكىزۋ ماسەلەلەرىنە باعىتتالىپ وتىر. سونىمەن بىرگە ءبىلىم الۋعا تەڭ قۇقىقتى قامتاماسىز ەتۋ, مۇمكىندىگى شەكتەۋلى بالالار ءۇشىن ءبىلىمنىڭ قولجەتىمدىلىگىن, وقىتۋدىڭ قولايلى باعىتىن تاڭداۋدى قامتاماسىز ەتەتىن ينكليۋزيۆتى ءبىلىم بەرۋدى دامىتۋ مەن پسيحولوگيالىق تەستىلەۋ قۇرالدارىن قولدانۋ باعىتىنداعى ءىس-شارالاردى جەتىلدىرۋ ۋاقىت كۇتتىرمەيدى.
كەزدەسۋگە قاتىسۋشىلار وسى ماڭىزدى سالاداعى ىنتىماقتاستىقتى نىعايتۋ جونىندە پىكىر الماستى.
الماتى