مەملەكەت باسشىسى قاسىم-جومارت توقاەۆ الماتى قالاسىنىڭ «استانا»الاڭىندا وتەتىن مەرەكەلىك ءىس-شاراعا قاتىسىپ, بارشا قازاقستاندىقتاردى ۇلىستىڭ ۇلى كۇنىمەن قۇتتىقتادى, دەپ حابارلايدى Egemen.kz.
مەملەكەت باسشىسى بۇل مەيرام ەجەلدەن جاقسىلىق پەن جاسامپازدىقتى دارىپتەيتىن ۇلىق مەرەكە ەكەنىن اتاپ ءوتتى.
«كۇن مەن ءتۇن تەڭەلىپ, كۇللى تابيعات قايتا جاڭاراتىن ءاز ناۋرىزدى قارسى الۋعا بابالارىمىز ەرەكشە ءمان بەرگەن. جىل باسىن - ۇلىستىڭ ۇلى كۇنى دەپ ارداقتاعان. ءاز ناۋرىز - بەرەكە-بىرلىكتىڭ, شىنايى جاناشىرلىقتىڭ جانە ءوزارا قامقورلىقتىڭ مەيرامى. مەن بۇگىن ۇلىس كۇنىن وزدەرىڭىزبەن بىرگە قارسى الۋ ءۇشىن الماتىعا ارنايى كەلىپ وتىرمىن. الماتى - تاۋەلسىزدىگىمىزدىڭ التىن بەسىگى. حالقىمىزعا قايتا ورالعان ۇلىس تويىن مەرەكەلەۋ وسى قاستەرلى مەكەننەن باستالدى. الماتى - قازاق ەلىنىڭ رۋحاني, مادەني جانە ىسكەرلىك ورتالىعى. زيالى قاۋىمنىڭ, ونەر, ءبىلىم, عىلىم, بيزنەس سالاسىنىڭ وكىلدەرى وسىندا شوعىرلانعان», دەدى پرەزيدەنت.
مەملەكەت باسشىسى قازاقستان حالقىن الداعى اۋقىمدى مىندەتتەردى بىرلەسە ىسكە اسىرۋعا شاقىردى.
ء«بىر ەل, ءبىر حالىق بولىپ, جاڭا قازاقستاندى بىرگە قۇرايىق. الدىمىزدا تۇرعان اۋقىمدى مىندەتتەر بار, كوپ جۇمىس بار. سوندىقتان ءبارىمىز بىرگە ءبىر ەل بولىپ, وسى مىندەتتى اتقارايىق. قۇرمەتتى جاستار, بىرگە بولايىق, بىرگە جۇمىلا ەڭبەك ەتەيىك! تۇعىرى مىعىم, بىرلىگى بەكەم ەلىمىز جاساي بەرسىن! قازاقستانىمىز جاساي بەرسىن, ماڭگى بولسىن! ءاز ناۋرىز قۇتتى بولسىن! بارشاڭىزعا امانشىلىق تىلەيمىن!», دەدى قاسىم-جومارت توقاەۆ.