قاراعاندى وبلىسىنداعى اقتوعاي اۋدانى ءوزىنىڭ انشىلىك مەكتەبىمەن ابىروي بيىگىنە كوتەرىلگەن ءوڭىر. سول ءداستۇر بۇگىندە ءساتتى جالعاسىن تاپقان. مىسالى, تاياۋدا عانا اتالعان اۋدانداعى ونەر مەكتەبىنىڭ «اۋەن» بالالار ءانسامبلى رەسپۋبليكالىق «سال دومبىرا» بايقاۋىندا باس جۇلدەنى جەڭىپ الدى.
ايتا كەتۋ كەرەك, الماتىدا وتكەن شىعارماشىلىق بايقاۋدا ەلىمىزدىڭ تۇكپىر-تۇكپىرىنەن كەلگەن 214 دارىن باق سىناعان بولاتىن. ال ونەر سايىسىندا حالىق اندەرىنەن ءپوپۋرريدى ەسترادالىق نۇسقادا ورىنداعان اقتوعايدىڭ ءانشى بالدىرعاندارى 38 ۇجىمنىڭ ىشىنەن دارا شىقتى.
«اۋەن» توبىنىڭ جەتەكشىسى سالامات مۇباراك ونەر ۇجىمىنىڭ 2016 جىلى قۇرىلعانىن ايتادى.
– جاڭا قۇراممەن 2020 جىلدان جۇمىس ىستەي باستادىق. سودان بەرگى ۋاقىت ىشىندە انسامبل بىرنەشە ءىرى ونەر دوداسىنا قاتىستى. قول جەتكىزگەن تابىس تا از ەمەس. جالپى, رەپەرتۋارىمىزدا التى ءان بار. انسامبل قۇرامىنداعى سەگىز قىزدىڭ بارلىعى ۆوكال بويىنشا ءبىلىم الادى, – دەيدى ول.
سونىمەن بىرگە توپ قۇرامىنداعى جەكە ورىنداۋشىلار كاۋسار قانات پەن ديليارا نۇراحمەت اتالعان بايقاۋدا كوزگە ءتۇسىپ, قازىلار مەن كورەرمەننىڭ ىستىق ىقىلاسىنا بولەنىپتى. كاۋسار وزىمەن جاستى 42 ءانشى قاتىسقان سايىستا باس جۇلدەنى جەڭىپ السا, ديليارا ءبىرىنشى ورىنعا يەلىك ەتكەن ەكەن.
قاراعاندى وبلىسى