شىعىستا بولۋى ىقتيمال تاسقىنعا دايىندىق تىڭعىلىقتى. وزەن سۋلارىنىڭ كوتەرىلىپ كەتۋىنىڭ الدىن الۋ ءۇشىن ناۋرىز ايىنىڭ باسىنان باستاپ بۇقتىرما, ەرتىس, كۇرشىم, ءۇبى وزەندەرىندە مۇز جارۋ پروفيلاكتيكالىق جۇمىستارى باستالدى.
وبلىستىق تجد, توتەنشە جاعدايدىڭ الدىن الۋ باسقارماسىنىڭ باستىعى الەكسەي شتىكەل, «قازگيدرومەت» رمك فيليالىنىڭ ديرەكتورى ادەل احمەتوۆتىڭ قاتىسۋىمەن وتكەن ءباسپاسوز كونفەرەنتسياسىندا سۋ تاسقىنى قاۋپى بار كەزەڭگە دايىندىقتىڭ قالاي ءجۇرىپ جاتقاندىعى تۋرالى ايتىلدى.
– سۋ تاسقىنىنىڭ ءبىزدىڭ وبلىستا ورىن الۋى – جىلداعى قۇبىلىس. تاۋلى, نۋلى, سۋلى ءوڭىر بولعاندىقتان, بۇل قالىپتى جاعداي. تەك ءبىز وعان دايىن بولۋىمىز كەرەك. ناقتىراق ايتساق, وبلىس اۋماعىنان 800-گە جۋىق وزەن اعىپ وتەدى. ولاردىڭ جالپى ۇزىندىعى 10 مىڭ شاقىرىمنان اسادى. كوپ جىلدىق سينوپتيكالىق بولجام بويىنشا, وبلىس وزەندەرىندەگى سۋ تاسقىنى ناۋرىزدىڭ ەكىنشى ونكۇندىگىندە باستالىپ, ماۋسىمنىڭ ەكىنشى ونكۇندىگىنىڭ ورتاسىنا دەيىن سوزىلادى, – دەيدى وبلىستىق تجد الدىن الۋ باسقارماسىنىڭ باستىعى الەكسەي شتىكەل.
بۇگىندە وبلىس اۋماعىندا جاۋاپتى ماماندار دايىندىق كەستەسى بويىنشا جۇمىس ىستەپ جاتىر. اكىمدىكتەردە تاۋلىك بويى كەزەكشىلىك ۇيىمداستىرىلدى, سۋ تاسقىنى قاۋپى بار جەرلەرگە مونيتورينگ جۇرگىزىلدى. ءىس-قيمىلداردىڭ بارلىعى دەرلىك ەگجەي-تەگجەيلى جوسپارلانىپ, سۋ تاسقىنىنا قارسى ءىس-شارالار وبلىستا جۇيەلى تۇردە جۇرگىزىلىپ جاتىر. اقپان ايىنىڭ ءبىرىنشى جۇلدىزىنان باستاپ وڭىردە سۋ تاسقىنى بولۋ قاۋپى بار ايماقتاردا جوعارى ساناتتاعى ارنايى ماماندار كەزەكشىلىك جۇرگىزىپ, ساراپتاما جاسادى. وبلىس اكىمى اپپاراتىنىڭ جۇمىلدىرۋ دايىندىعى ءبولىمىنىڭ باسشىسى ەركەن سارسەمبينوۆتىڭ ايتۋىنشا, كەزەك كۇتتىرمەيتىن شىعىندار مەن توتەنشە جاعدايلاردى جويۋ ءۇشىن بيۋدجەتتەن بارلىعى 2,6 ملرد تەڭگە قاراجات قاراستىرىلعان. ونىڭ 1,2 ملرد تەڭگەسى وبلىستىق رەزەرۆتە.
تۇرعىلىقتى ايماقتاردان جالپى كولەمى 304 مىڭ تەكشە مەتر قار شىعارىلدى, اۆتوموبيل جانە تەمىرجولدارداعى سۋ وتكىزۋ قۇرىلىستارى, كوپىرلەر, ارىقتار مەن كانالدار تازارتىلدى. 104 مىڭ دانا قاپ, 6,7 مىڭ توننا ينەرتتى ماتەريالدار, 690 توننا جانار-جاعارماي دايىندالدى.
ايتا كەتسەك, وبلىس بويىنشا 108 ەلدى مەكەندى سۋ باسۋ قاۋپى بار. سۋ تاسقىنىن بولدىرماۋ ءۇشىن 3 ناۋرىزدان باستاپ وبلىستىڭ بۇقتىرما, ەرتىس, كۇرشىم, ءۇبى وزەندەرى كەسىپ وتەتىن 7 اۋداندا مۇز جارۋ پروفيلاكتيكالىق جارىلىس جۇمىستارى باستالدى. سۋ باسۋىن بولدىرماۋ ءۇشىن جاعالاۋدى بەكىتۋ جانە ءتۇبىن تەرەڭدەتۋ, بوگەتتەردى جوندەۋ, ارنانى رەتتەۋ سىندى جۇمىستار قولعا الىنىپ, الدىن الۋ شارالارى جۇرگىزىلىپ-اق جاتىر.
ال 3-5 ناۋرىز ارالىعىندا بورودۋليحا, شەمونايحا اۋداندارىندا جانە سەمەي قالاسىندا جالپى اۋدانى 29 896 شارشى مەتردى قۇرايتىن وزەن مۇزىن جارۋ جۇمىستارى جۇرگىزىلدى.
– 10 ناۋرىزداعى جاعدايمەن الىپ قاراساق, شىعىس قازاقستان وبلىسىنىڭ وزەندەرىندەگى گيدرولوگيالىق جاعداي تۇراقتى. قىسقى سۋ دەڭگەيىنىڭ تومەندىگى بايقالادى. شاعىن وزەندەردىڭ كەيبىرىندە مۇز ەرىپ جاتىر, – دەيدى «قازگيدرومەت» رمك فيليالىنىڭ ديرەكتورى ادەل احمەتوۆ.
ەگەر تابيعاتتىڭ توسىن مىنەزى بايقالىپ, جاعداي كۇرت وزگەرسە, وبلىس جانە اۋدان اكىمدىكتەرىن, وبلىستىق تجد جانە مۇددەلى ورگاندار دەرەۋ حاباردار ەتىلمەك. جالپى, شىعىس قازاقستاندا 2021-2023 جىلدارعا ارنالعان سۋ تاسقىنىنا قارسى ءىس-شارالاردىڭ جول كارتاسى شەڭبەرىندە 162 ملن تەڭگەگە 11 ءىس-شارا جۇزەگە اسىرىلعان.
شىعىس قازاقستان وبلىسى