2022 جىلدىڭ باسىنداعى دەرەكتەر بويىنشا قازاقستاندا جاڭارتىلاتىن ەنەرگيا كوزدەرىنىڭ (جەك) جالپى بەلگىلەنگەن قۋاتى 2010 مۆت بولاتىن 134 نىسانى جۇمىس ىستەيدى. وسى نىسانداردىڭ (كۇن ەلەكتر ستانسالارى (كەس), جەل ەلەكتر ستانسالارى (جەس), بيوگاز ستانسالارى (بگس), شاعىن گەس) ەلەكتر ەنەرگياسىن ءوندىرۋ كولەمى 2021 جىلى 4 220,3 ملن كۆتس قۇراپ وتىر. بۇل تۋرالى «سامۇرىق-ەنەرگو» اق-نىڭ «نارىقتى دامىتۋ» دەپارتامەنتى دايىنداعان قازاقستان رەسپۋبليكاسىنداعى جاڭارتىلاتىن ەنەرگيا كوزدەرى نارىعىنا شولۋدا ايتىلعان.
اتالعان قۇجاتقا سايكەس, قازاقستاندا جەك سالاسىنداعى بارلىق جوبالار ينۆەستورلاردىڭ مەنشىكتى جانە قارىز قاراجاتى ەسەبىنەن ىسكە اسىرىلادى. جانە دە مەملەكەت ءوز تاراپىنان جەك نىساندارى وندىرەتىن ەلەكتر ەنەرگياسىنىڭ بارلىق كولەمىن بەلگىلەنگەن تاريف نەمەسە اۋكتسيوندىق باعا بويىنشا كەپىلدى ساتىپ الۋ ارقىلى قولداۋ كورسەتىپ, جەك نىساندارىن قولداۋعا ارنالعان تاريف بويىنشا ءداستۇرلى ستانسالار اراسىندا بولەدى. بۇعان قوسا, شاعىن كولەمدى جەك جوبالارى ءۇشىن مەملەكەت جەرگىلىكتى اتقارۋشى ورگاندار دەڭگەيىندە شىعىنداردى ءىشىنارا سۋبسيديالايدى.
رەسپۋبليكادا جاڭارتىلاتىن ەنەرگيا كوزدەرى تۇراقتى تۇردە وسۋدە. سوڭعى 7 جىلدا جەك وبەكتىلەرىنىڭ بەلگىلەنگەن قۋاتى 11 ەسە, ياعني 2014 جىلعى 177,52 مۆت كورسەتكىشتەن 2021 جىلعى 2010 مۆت-قا دەيىن ءوستى.
ەنەرگەتيكا مينيسترلىگىنىڭ دەرەكتەرىنە سىلتەمە جاسالعان تالدامالىق شولۋدا اتاپ وتىلگەندەي, قازاقستانداعى جەك رەسۋرستىق الەۋەتى مىناداي كورسەتكىشتەرمەن باعالانادى:
- جەل ەنەرگەتيكاسى – جىلىنا 920 ملرد كۆتساع;
- گيدروپوتەنتسيال – جىلىنا 62 ملرد كۆتساع;
- كۇن ەنەرگەتيكاسى – جىلىنا 2,5 ملرد كۆتساع;
- گەوتەرمالدىق سۋلاردىڭ جىلۋ الەۋەتى – 4,3 گۆت.
قازاقستاندىق ءىرى ەلەكتر ەنەرگەتيكالىق حولدينگ سانالاتىن «سامۇرىق-ەنەرگو» اق قۇرامىندا بۇگىندە 5 جەك نىسانى جۇمىس ىستەيدى. 2021 جىلى ولاردىڭ ەلەكتر ەنەرگياسىن وندىرۋدەگى جيىنتىق كولەمى 325,3 ملن كۆتس قۇرادى. بۇل قازاقستانداعى بارلىق جەك وبەكتىلەرى وندىرەتىن ەلەكتر ەنەرگياسى كولەمىنىڭ 7,7%-ىن قۇراپ وتىر.
«سامۇرىق-ەنەرگو» كاسىپورنىندا كۇردەلى جوبالاردىڭ, ونىڭ ىشىندە كومپانيانىڭ 2022-2031 جىلدارعا ارنالعان دامۋ ستراتەگياسىنا ەنگىزىلگەن ەنەرگيا اۋىسۋ ماقساتىنداعى «جاسىل» جوبالاردىڭ تىزبەسى ازىرلەندى. بۇل جەردە اڭگىمە قازىرگى تاڭدا اقمولا وبلىسىنىڭ ەرەيمەنتاۋ قالاسى اۋدانىندا سالىنىپ جاتقان قۋاتى 50 مۆت بولاتىن, الماتى وبلىسىنىڭ ەڭبەكشىقازاق اۋدانىنداعى قۋاتى 60 مۆت بولاتىن جەل ەلەكتر ستانسالارى تۋرالى, سونداي-اق شەلەك دالىزىندەگى قۋاتى 240 مۆت-تىق جەس پەن قۋاتى 71 مۆت بولاتىن سۋ ەلەكتر ستانساسىنىڭ قۇرامداستىرىلعان جوباسى جانە ىلە وزەنىندەگى قۋاتى 40,6 مۆت بولاتىن كەربۇلاق سەس-ءى تۋرالى بولىپ وتىر.