پاۆلودارلىق ۇن وندىرۋشىلەر دابىل قاعىپ وتىر. كورشى رەسەي بيدايدى ەكسپورتتاۋعا شەكتەۋ قويىپ ەدى, قورداعى استىقتىڭ ءتۇبى كورىنە باستادى. شيكىزاتتى شەتەلدەن تاسىمالداساڭ وسى. ايتپەسە, استىقتى الىستان اربالاماي-اق جەرگىلىكتى ديقانداردان دا ساتىپ الۋعا بولار ەدى. ولار ءونىمىن ءتيىمدى باعامەن وزگە ەلگە ساتۋعا نيەتتى. بار گاپ وسىندا.
مۇنداي جاعىمسىز جاعدايدىڭ ءبىر كۇنى تۋارىن بىلگەن ەدى ۇن وندىرۋمەن اينالىساتىن كاسىپورىن باسشىلارى. تىعىرىققا تىرەلمەۋدىڭ امالىن ويلاستىرىپ, قۇزىرلى ورگاندارعا ديقانداردىڭ استىعىن سىرتقا شىعارماۋدىڭ جولىن قاراستىرۋدى قاقساپ جۇرگەلى ءبىراز بولدى. ال شارۋالار جىل سايىن قامبا تولى استىقتى اۋعانستان مەن وزبەكستانعا وتكىزىپ, قالتاسىن قامپايتىپ كەلەدى. نارىقتىڭ زاڭدىلىعى سول. ديقاندار استىقتى قايدا, قانداي باعامەن ساتۋ كەرەك ەكەنىن ەشكىمنەن سۇرامايدى دا. دەسە دە, بەلگىلى ءبىر شەكتەۋلەر ەنگىزىلىپ, ىشكى نارىقتى رەتتەۋدىڭ تەتىكتەرى قولعا الىنعانى قاجەت-اق. ۇن وندىرۋشىلەردىڭ پىكىرى وسىعان سايادى.
پاۆلودار وبلىسىندا 20-دان استام ديىرمەن تىركەلگەن. شيكىزاتتىڭ جەتىسپەۋشىلىگى سالدارىنان 10-عا جۋىعى جۇمىسىن توقتاتتى. ءىرى دەگەن كاسىپكەرلىكتەردىڭ دە جاعدايى ءماز ەمەس. قورداعى استىق شامامەن 2 اپتاعا عانا جەتەدى دەپ كۇرسىنىپ وتىر. بيداي تاۋسىلسا, جۇمىسسىزدىق ماسەلەسىنىڭ الدان شىعاتىنىن جاسىرمايدى.
– پاۆلودارلىق ديقاندار جىل سايىن شامامەن 750 مىڭ توننادان اسا استىق جينايدى. ال جەرگىلىكتى ۇن وندىرۋشىلەردىڭ شيكىزاتقا دەگەن سۇرانىسى 600 مىڭ توننانى قۇرايدى. بىلاي قاراساڭ, ىشكى سۇرانىستى ارتىعىمەن قامتاماسىز ەتۋگە مۇمكىندىك بار. دەرەكتەرگە سۇيەنسەك, بىلتىر 550 مىڭ توننا, بيىل جىل باسىنان بەرى 160 مىڭ توننا استىق اۋعانستان مەن وزبەكستان نارىعىنا جونەلتىلگەن. «قولدا باردا التىننىڭ قادىرى جوق» دەمەكشى, وزگەنىڭ ونىمىنە جالتاقتاۋىمىز وكىنىشتى. بۇل جاعداي تۋرالى ەل پرەزيدەنتى قاسىم-جومارت توقاەۆقا, اۋىل شارۋاشىلىعى مينيسترلىگىنە حات جازدىق. ازىق-ت ۇلىك قاۋىپسىزدىگى ماسەلەسىن شەشۋدىڭ وڭ تەتىكتەرى قولعا الىنادى دەگەن سەنىم مول, – دەيدى «جاندوس كZ» جشس ديرەكتورى ءارى «قازاقستاننىڭ استىق وڭدەۋشىلەرى» وداعىنىڭ وبلىستاعى وكىلى جانار سەرىموۆا.
بەلگىلى بولعانداي, پاۆلودارلىق ۇن وندىرۋشىلەر وسى ۋاقىتقا دەيىن شيكىزات يمپورتى سالىعىن تولەپ, رەسەيدەن استىقتىڭ ءبىر تونناسىن قوسىمشا قۇن سالىعىنسىز 114 مىڭ تەڭگەگە الىپ كەلگەن. ال وتاندىق ءونىمنىڭ باعاسى 132 مىڭ تەڭگەگە تەڭ. جەرگىلىكتى ۇن وندىرۋشىلەر باعاسى قىمباتتاۋ بولسا دا استىقتى سىرتتان تاسىماي, جەرگىلىكتى ديقاندارمەن بايلانىس ورناتۋعا كەتارى ەمەس. شارۋالار بولسا ءتيىمدى جولدى تاڭداۋعا اسىق. شەتەلدەن كەلەتىن ساتىپ الۋشىلار ءونىمدى وزدەرى الىپ كەتەتىنىن ەسكەرسەك, ديقاندار باج سالىعىن تولەۋ سياقتى ماشاقاتتارعا باس قاتىرمايتىنى تۇسىنىكتى.
استىقتىڭ تاپشىلىعى قۇس پەن مال شارۋاشىلىعىنا دا كەرى اسەرىن تيگىزبەك. ءبىر سالاعا سالقىنى تيسە, وزگە دە سالالاردى اينالىپ وتپەيتىنى تۇسىنىكتى عوي. جالپى, پاۆلودارداعى جاعداي ەلىمىزدىڭ وزگە دە وڭىرلەرىندە دە كورىنىس تابۋدا. بۇل ىسكە جاۋاپتى قۇزىرلى ورگاندار ناقتى شەشىم ازىرلەپ جاتقان دا بولار.
پاۆلودار وبلىسى