ميۋنحەن قالاسىندا قازاقستاننىڭ گەرمانياداعى ەلشىلىگىنىڭ, باۆاريا ەكونوميكا جانە تەحنولوگيالار مينيسترلىگى مەن ساۋدا-ونەركاسىپتىك پالاتاسىنىڭ قولداۋىمەن ۇيىمداستىرىلعان «باۆارياداعى قازاقستان ەكونوميكاسى كۇنى» ءوتتى.
شارانىڭ باستى ماقساتى ەلباسىنىڭ بيىلعى جولداۋى شەڭبەرىندە نەمىس ينۆەستيتسيالارى مەن تەحنولوگيالارىن قازاقستان ەكونوميكاسىنا تارتۋ بويىنشا باۆاريامەن ىنتىماقتاستىقتى كەڭەيتۋ بولىپ تابىلادى. ءىس-شاراعا فەدەرالدىق جەرلەردىڭ رەسمي جانە ەكونوميكالىق توپتارىنىڭ 200-دەن اسا وكىلدەرى, سونداي-اق, باۆاريادا ورنالاسقان ءىرى كونتسەرندەر مەن كومپانيالاردىڭ باسشىلارى قاتىستى.
ءوز سوزىندە قازاقستاننىڭ گەرمانياداعى ەلشىسى نۇرلان وڭجانوۆ قاتىسۋشىلارعا قازاقستان ەكونوميكاسى دامۋىنىڭ وزەكتىلىگى جانە ەلدەگى قولايلى ينۆەستيتسيالىق جاعداي تۋرالى, سونىمەن قاتار, 2010-2014 جىلدارعا ارنالعان قازاقستاننىڭ ۇدەمەلى يندۋستريالىق-يننوۆاتسيالىق باعدارلاماسىن ىسكە اسىرۋ بارىسىندا قازاقستان ۇكىمەتىنىڭ قول جەتكىزگەن ارالىق ناتيجەلەرى تۋرالى حاباردار ەتتى. ول باۆاريانىڭ ىسكەر توپتارىن قازاقستانمەن ءوزارا ءتيىمدى ارىپتەستىكتى تەرەڭدەتۋدە جانە كەڭەيتۋدە قولدا بار مۇمكىندىكتەر مەن قولايلى جاعدايلاردى بەلسەندىرەك قولدانۋعا شاقىردى. ەلشىنىڭ پىكىرىنشە, قازاقستان ءۇشىن وتاندىق ەكونوميكاعا جاڭا تەحنولوگيالار مەن نوۋ-حاۋ ترانسفەرتىن قاراستىراتىن, قازاقستاندىق بىلىكتى تەحنيكالىق مامانداردى دايارلايتىن قازاقستاندىق ەكونوميكانىڭ باسىم سالالارىنداعى بىرلەسكەن ينۆەستيتسيالىق جوبالار ەرەكشە قىزىعۋشىلىق تۋدىرۋدا.
سونداي-اق, گەرمانيانىڭ بۇرىنعى ەكونوميكا جانە تەحنولوگيا فەدەرالدى ءمينيسترى ميحاەل گلوس, باۆاريانىڭ ەكونوميكا كەڭەسىنىڭ توراعاسى وتتو ۆيسحوي, باۆاريا ەكونوميكاسىنىڭ ءبىرلەستىگى توراعاسىنىڭ ورىنباسارى شتەفان البات, قازاقستاننىڭ يندۋستريا جانە جاڭا تەحنولوگيالار مينيسترلىگىنىڭ ينۆەستيتسيالار جونىندەگى كوميتەتىنىڭ توراعاسى ەرلان حايروۆ, قازاقستان ساۋدا-ونەركاسىپ پالاتاسىنىڭ پرەزيدەنتى سابىر ەسىمبەكوۆ جانە «ناتر» اق باسقارما توراعاسى ايدىن قۇلسەيىتوۆ تاقىرىپتىق باياندامالار جاسادى.
ەكونوميكا كۇنى شەڭبەرىندە وتكەن «شيكىزات, وندىرىستىك جانە تەحنولوگيالىق ارىپتەستىكتىڭ, سونداي-اق, جوبالىق-ينجينيرينگ قىزمەتى سالاسىنداعى ىنتىماقتاستىقتىڭ جاعدايى مەن بولاشاعى» تاقىرىبىنداعى پانەلدىك پىكىرتالاس بارىسىندا قازاقستان مەن گەرمانيا اراسىنداعى ءتيىمدى شيكىزات, يندۋستريالىق جانە تەحنولوگيالىق ارىپتەستىكتى ءارى قاراي رەتتەۋ ماسەلەلەرى تالقىلاندى. باۆاريالىق قاتىسۋشىلار گەرمانيانىڭ ەنەرگەتيكالىق قاۋىپسىزدىگىن قامتاماسىز ەتۋدەگى قازاقستاننىڭ ماڭىزدى ءرولىن, سونىمەن قاتار, قازاقستاننىڭ قازاقستاندىق ەكونوميكانى جاڭارتۋ جانە يندۋستريالاندىرۋعا باعىتتالعان مەملەكەتتىك باعدارلامالاردى جۇزەگە اسىرۋعا بايلانىستى نەمىس جوعارى تەحنولوگيالىق كومپانيالارىنا ۇسىنىپ وتىرعان مۇمكىندىكتەرىن اتاپ ءوتتى.
ەكونوميكا كۇنىنىڭ شەڭبەرىندە دينا نۇرپەيىسوۆا اتىنداعى اتىراۋ مەملەكەتتىك وبلىستىق فيلارمونياسى اكادەميالىق وركەسترىنىڭ مەرەكەلىك كونتسەرتى ءوتتى.
«ەگەمەن-اقپارات».