قوستاناي قالاسىندا «انالار ءۇيى» دەپ اتالاتىن جاڭا مەكەن اشىلىپ, ىسكە كىرىستى. بۇل تۋرالى alau.kz حابارلادى.
«جارىنان قولداۋ تاپپاي, تىعىرىققا تىرەلگەن جالعىز باستى جاس انالار 1,5 جىل بويى وسى ءۇيدى پانالاي الادى», - دەلىنگەن حابارلامادا.
مەيىرىم شاشقان مەكەن قيىندىق كورگەندەرگە قولداۋىن كورسەتىپ, تەرىس جولعا تۇسكەن ايەلدەر بولسا, جارقىن ومىرگە جەتەلەيدى. ءۇش قاباتتى كوتتەدجدە انا مەن بالاعا قاجەتتى جاعدايدىڭ بارلىعى جاسالعان.
«مۇندا قازىر 7 انا سابيىمەن تۇرىپ جاتىر. سولاردىڭ ءبىرى – جانسايا قاسىمبەكوۆا. جاس بوسانعان انانى جۇبايى تۇسىنبەدى. وتباسىنىڭ بەرەكەسى كەتكەن سوڭ, ەرنازار ەسىمدى 5 ايلىق ۇلىن قۇشاقتاپ, وسىندا كەلدى. بۇعان دەيىن بالالار ۇيىندە ەسەپشى بولىپ ىستەگەن ول ءسابيى اياعىنان تۇرعانشا, پانا تاپقانىنا قۋانادى», - دەپ جازادى پورتال.
مۇندا ءبارى ۇيدەگىدەي ەكەندىگى بايقالادى. كيەر كيىم, ىشەر اس تەگىن. انالارمەن اپتاسىنا 2 رەت پسيحولوگ مامان پىكىرلەسەدى. تاعدىرىنان تەپەرىش كورگەن ايەلدەر قوعامنان شەتتەمەۋى ءتيىس. «انالار ءۇيى» ولاردىڭ انالىق مەيىرىمىن وياتادى.قازىر قازاقستانداعى «انالار ءۇيىنىڭ» سانى 12-گە جەتكەن. مۇنداي ۇيلەر كەلەشەكتە ەلىمىزدىڭ بارلىق ءىرى قالالارىندا اشىلماق. يگى ءىستىڭ باسىندا تۇرعان ىزگى جانداردىڭ ەندىگى ماقساتى جاس انالارعا تەگىن كاسىپتىك وقۋ كۋرستارىن ۇيىمداستىرىپ, قوعامدا ءوز ورىنىن تابۋعا ىقپال جاساۋ بولىپ تابىلادى.
سۇلتان بوزايعىر.
دەرەككوز: alau.kz.
فوتو: alau.kz.