گەرمانيالىق «باۆاريا» فۋتبول كلۋبىنىڭ شابۋىلشىسى روبەرت لەۆاندوۆسكي قىتايلىق «Huawei» كومپانياسىمەن كەلىسىمشارتىن توقتاتۋ تۋرالى شەشىم قابىلدادى, دەپ حابارلايدى Egemen.kz.
دەرەكتەرگە سەنسەك, پولشالىق فۋتبولشى ۇلىبريتانيالىق Daily Mail باسىلىمىندا جاريالانعان ماقالانى وقىعاننان كەيىن وسىنداي شەشىمگە كەلگەن. ماقالادا قىتايلىق كومپانيانىڭ رەسەيگە كيبەر شابۋىلداردان قورعانۋعا كومەكتەسىپ جاتقانى جازىلعان بولاتىن.
«بۇگىن ءبىز روبەرت لەۆاندوۆسكي مەن «Huawei» كومپانياسى اراسىنداعى كەلىسىمشارتتان باس تارتقانىمىزدى حابارلايمىز. ءبىزدىڭ تاراپتان بارلىق جارنامالىق مىندەتتەمەلەر وسى ساتتەن باستاپ توقتايتىن بولادى», دەپ حابارلادى پولشالىق شابۋىلشىنىڭ مەنەدجەرى توماش زاۆيشلاك.