ازاماتتىق باستامالاردى قولداۋ ورتالىعى نازىك جاندىلاردىڭ مۇمكىندىگىن كەڭەيتىپ, قارىم-قابىلەتىن جان-جاقتى كورسەتۋگە سەپتەسەتىن الەۋمەتتىك جوبا قولعا الىنعانىن حابارلادى. «زامانداس 21» قوعامدىق قورى باستاماشى بولعان بۇل جوبا ايەلدەرگە پايدالى داعدىلاردى ۇيرەنۋگە, كاسىپ باستاۋعا جانە ءومىرىن تۇبەگەيلى وزگەرتۋگە كومەكتەسۋدە. جوبا اياسىندا قانشاما ارۋ توقىما, اسپازدىق, ساندەۋ جانە باسقا دا ءتۇرلى ونەر ۇيرەنىپ, ءوز ءىسىن اشىپ جاتىر.
الماتىلىق ايگەرىم تولەباەۆا ارنايى كۋرستان ءوتىپ, ەندى كەڭىنەن ءوز ءىسىن اشۋدى ويعا الىپ ءجۇر ەكەن. ول اسپازدىق كۋرسىن وقىپ قالىپتاستىرعان داعدىلارىن قازىر نەگىزگى تابىس كوزىنە اينالدىرىپ وتىر. كۋرس جونىندە ايتىپ بەرگەن كەيىپكەرىمىز ونلاين-فورماتتاعى ساباقتار ىڭعايلى ەكەنىن, ويتكەنى بەلگىلى ءبىر ورىنعا بارىپ وقۋدىڭ قاجەتتىگى بولماي, ۋاقىت ۇنەمدەلەتىنىن اتاپ ءوتتى. تەك ينتەرنەتكە قولجەتىمدى ساپالى كومپيۋتەرىڭ بولسا جەتكىلىكتى.
«مەنىڭ مۇمكىندىگى شەكتەۋلى بالام بولعاندىقتان, ونى بىرەۋمەن ۇزاق ۋاقىتقا قالدىرا المايمىن. سوندىقتان ماعان ونلاين ساباق وتە قولايلى بولدى. مەن ءوز قولىممەن ءتاتتى تاعامداردى ءپىسىرۋدىڭ ءادىس-ءتاسىلىن جانە ءتيىمدى ساتۋ جولىن ۇيرەنۋ كەرەك دەپ ويلادىم. ماعان كوبىرەك رەتسەپتتەر, ەت, كوكونىس, ءتاتتى پيروگتەر, توقاشتار ءۇشىن جاقسى قامىردىڭ قۇپيالارى تۋرالى كوبىرەك ءبىلۋ كەرەك بولدى. ونىڭ ۇستىنە ساباق تا كوپ ۋاقىت العان جوق. ساباعىمىز اياقتالعانىنا قاراماستان, كۋرس تىڭداۋشىلارىنىڭ چاتىندا ءبىز ءالى دە سويلەسىپ, ءارتۇرلى رەتسەپپەن, پايدالى اقپاراتپەن الماسىپ تۇرامىز. وقۋ بىتكەننەن كەيىن تاپسىرىستار بىردەن تۇسە باستادى. قازىر ۇيدە وتىرىپ, اقشا تابامىن. بۇگىنگى تاڭدا تاپسىرىستار اقىرىنداپ كوبەيىپ كەلەدى. ەگەر سۇرانىس ارتاتىن بولسا, اسپازدىق ستۋديا اشامىن دەپ وتىرمىن», دەدى ايگەرىم.
وسىنداي تالاپتانۋشىلاردىڭ ءبىرى – اقكول اۋىلىنىڭ تۇرعىنى ۆالەنتينا بوسياكوۆا. ول ءۇش بالانى تاربيەلەپ وتىر, ونىڭ بىرەۋىنىڭ مۇمكىندىگى شەكتەۋلى ەكەن. ومىرلىك قيىندىقتارعا قاراماستان, ايەل شاعىن سۇلۋلىق سالونىن اشتى.
«مەن ءبارى وڭاي بولادى دەپ كۇتپەگەن ەدىم. سوڭعى بەس جىل ىشىندە مانيكيۋر, پەديكيۋر, شۋگارينگپەن اينالىسامىن. شاعىن سالوندى جالعا الدىم. كىرپىك مەن قاستى لاميناتتاۋ كۋرستارىندا وقىعاننان كەيىن كليەنتتىك بازانى ارتتىرا الدىم. وسى ىستەگى ءبىلىمىمدى جەتىلدىرىپ, باستامامدى جاڭا قىزمەتتەرمەن تولىقتىرا العانىما قۋانىشتىمىن», دەيدى ۆ.بوسياكوۆا.
«ومىرلىك قيىن جاعدايدا جۇرگەن بالالارى بار وتباسىلاردى قولداۋ جونىندەگى شارالار كەشەنىن ازىرلەۋ جانە ىسكە اسىرۋ» جوباسىنىڭ ۇيلەستىرۋشىسى ۆارۆارا پولياكوۆانىڭ ايتۋىنشا, سۇلۋلىق, كلينينگ, digital-قىزمەتتەر سالاسىندا سۇرانىسقا يە ماماندىقتار بويىنشا بىلىكتى ماماندار كۋرستارىندا 500-گە جۋىق ادام وقىتىلدى. كۋرس اياقتالعاننان كەيىن بارلىق قاتىسۋشىعا سەرتيفيكاتتار بەرىلدى. بۇل ولاردى تۇراقتى جالاقىمەن قامتاماسىز ەتۋگە مۇمكىندىك بەرەدى.
سونداي-اق وسى جوبا اياسىندا بىلىكتىلىكتى ارتتىرۋ تۋرالى سەرتيفيكاتتار وتباسىن قولداۋ ورتالىقتارىنىڭ قىزمەتكەرلەرىنە دە بەرىلدى. وتكەن جىلى داعدارىس ورتالىقتارىنىڭ 422 مامانى قيىن ومىرلىك جاعدايداعى ايەلدەر مەن بالالارعا پسيحولوگيالىق جانە قۇقىقتىق كومەك كورسەتۋ بويىنشا وزدەرىنىڭ كاسىبي ءبىلىمىن ارتتىردى.
ايەلدەردىڭ الەۋەتىن كورسەتۋگە مول مۇمكىندىك بەرىپ جاتقان بۇل الەۋمەتتىك ماڭىزى بار جوبا گرانتتىق قارجىلاندىرۋدىڭ ناتيجەسىندە ازاماتتىق باستامالاردى قولداۋ ورتالىعىنىڭ جانە اقپارات جانە قوعامدىق دامۋ مينيسترلىگىنىڭ قولداۋىمەن ىسكە اسىرىلدى.