قر پارلامەنتى ءماجىلىسىنىڭ توراعاسى ەرلان قوشانوۆ باسقارۋشى پارتيانىڭ جاڭا اتاۋىن تىركەۋ ماسەلەسىنە قاتىستى پىكىر ءبىلدىردى, دەپ حابارلايدى Egemen.kz.
ءماجىلىستىڭ جالپى وتىرىسىنان كەيىن جۋرناليستەر پالاتا توراعاسىنا باسقارۋشى پارتيانىڭ جاڭا اتاۋىن تىركەۋگە قاتىستى بىرقاتار سۇراق قويدى.
پالاتا سپيكەرى اتاپ وتكەندەي, زاڭناما تۇرعىسىنان تىركەۋ پروتسەسىندە قيىندىقتار بولمايدى.
ء«بىز ماسەلەنى زەرتتەگەن كەزدە «امانات» دەپ اتالاتىن 30-دان استام ءتۇرلى ۇيىم بار ەكەنى بەلگىلى بولدى, بىراق بۇل اتاۋمەن ەشقانداي پارتيا تىركەلگەن جوق. سوندىقتان, «AMANAT» اتتى پارتيانى تىركەۋدە قيىندىقتار بولمايدى دەپ ويلايمىن», دەپ ءتۇسىندىردى ەرلان قوشانوۆ.
ءماجىلىس توراعاسى «Nur Otan» پارتياسى بۇرىنعى اتاۋىنان نەگە باس تارتقانىن ءتۇسىندىردى.
«نەگىزىندە ءومىر مەن قوعام وزگەرىپ جاتىر, سىزدەر وسىنى كورىپ وتىرسىزدار. ەگەر وتكەن جىلدىڭ جەلتوقسانى مەن وسى جىلدىڭ قاڭتارىندا بولعان وقيعاعا قاراساق, ءبىز باسقا مەملەكەتتە تۇرىپ جاتقان سياقتىمىز. سوندىقتان بۇگىندە قوعامنىڭ سۇرانىسى دا وزگەرۋدە. قاڭتار قاسىرەتىنەن كەيىن قوعام دا وزگەردى. ال پارتيا مۇشەلەرى مۇنىڭ ءبارىن ەسكەرە الدى», دەدى ول.
ەرلان قوشانوۆ اتاپ وتكەندەي, دەپۋتاتتار تۇرعىنداردىڭ كوڭىل-كۇيلەرى مەن سۇرانىستارى نازارعا الىنعان وڭىرلەرگە باردى. بۇگىندە پارتيانى عانا ەمەس قوعامدى دا جاڭارتۋ قاجەتتىلىگى بار.
«وسىنىڭ ءبارىن نەگىزگە الا وتىرىپ, پارتيا مۇشەلەرى ءتيىستى شەشىم قابىلدادى جانە پارتيا توراعاسى ونى قولدادى», دەپ تۇيىندەدى ءماجىلىس سپيكەرى.