كەنشىلەر استاناسىنىڭ ىرگەسىندەگى ۋزەنكا ەلدى مەكەنىندە جىلىجايلار قىسى-جازى جۇمىس ىستەيدى. بۇل جەردە جايقالىپ قىزعالداقتار وسەدى. بۇدان بولەك, جەرگىلىكتى فلوريستەر-گۇل وسىرۋشىلەر ءبىراز ۋاقىتتان بەرى السترومەريانى, ياعني پەرۋ لالاگ ۇلىنىڭ تۇقىمىن كوبەيتۋدى دە قولعا العان.
– السترومەريا – وتە ادەمى گۇل. ءبىر كورگەننەن وسىرسەم دەگەن قۇلشىنىس پايدا بولدى. تۇقىمىن گوللانديادان تاپسىرىسپەن الدىرىپ, مىنە, ەكىنشى جىل بولدى, جىلىجايدا ءوسىرىپ جاتىرمىز. بۇل وڭاي شارۋا ەمەس: كۇندىز-ءتۇنى بەلگىلى ءبىر تەمپەراتۋرانى – 14-16 گرادۋس جىلۋ دەڭگەيىن ۇستاپ تۇرۋ كەرەك. كۇن كوزىنىڭ كوپ تۇسپەۋىن قاداعالاپ, قاجەت بولعان كەزدە كولەڭكەلەيمىز. ەگەر تىم ىستىق بولسا, بۇرشىكتەر قۋراپ كەتەدى. سۋدى دا مولشەردەن تىس قۇيۋعا بولمايدى. تامشىلاتىپ سۋارامىز, – دەيدى كاسىپورىن باسشىسى راميس اقبەرديەۆ.
السترومەريا – لاتىن امەريكاسىنىڭ تروپيكتىك تابيعاتىندا وسەتىن نازىك گۇل. جاقسى كۇتىم بولسا, ساباعىنىڭ ۇزىندىعى ءبىر جارىم مەتر بيىكتىككە جەتەتىن كورىنەدى. تۇستەرى اق, قىزعىلت, قىزعىلت سارى, ورىك تۇستەس, قىزىل, ءتۇرلى-ءتۇستى بولىپ كەلەدى ەكەن.
جالپى, اقبەرديەۆتەر وتباسى بۇل كاسىپپەن 20 جىلدان بەرى اينالىسىپ كەلەدى. ولاردىڭ گۇل وسىرەتىن جىلىجايلارى 35 سوتىق القاپتى الىپ جاتىر. بۇل جەرلەردە گوللاند قىزعالداقتارىنىڭ جيىرماعا جۋىق ءتۇرى وسەدى ەكەن. سونىمەن بىرگە نارتسيستەر دە قۇلپىرىپ تۇرادى.
راميس اقبەرديەۆ كليماتى قىتىمىر ارقا ءوڭىرى ءۇشىن گۇل بيزنەسىنىڭ قىمباتقا تۇسەتىنىن ايتادى. ماسەلەن, قىستا جىلىجايلاردى جىلىتۋ ءۇشىن شامامەن 300 توننا كومىر ساقتاۋعا تۋرا كەلەدى ەكەن.
اقبەرديەۆتەردىڭ كاسىبى ايەلدەر قاۋىمىنىڭ مەرەكەسى – 8 ناۋرىزعا قارسى قىزا تۇسەدى. جىلىجايلارداعى الۋان ءتۇرلى گۇل ارۋلار مەن ايەلدەرگە ارنالعان سىيلىقتارعا قوسا سىيعا تارتاتىن گۇل شوقتارىنا اينالادى. جانە ولار تەك قاراعاندىنىڭ عانا ەمەس, ەلوردانىڭ دا ساۋدا نۇكتەلەرىنە جول تارتادى.
قاراعاندى وبلىسى