ۇكىمەتتىڭ كەڭەيتىلگەن وتىرىسىندا قاسىم-جومارت توقاەۆ ەلدىڭ نەگىزگى زاڭى قوعام دامۋىنىڭ جاڭا كەزەڭىنە ساي جاڭعىرتىلۋى ءتيىس ەكەنىن اتاپ ءوتتى. مەملەكەت باسشىسىنىڭ ايتۋىنشا, قولدانىستاعى كونستيتۋتسيانىڭ تاريحي ماڭىزىن جوققا شىعارۋ مۇمكىن ەمەس, ويتكەنى سوڭعى 30 جىلداعى بارلىق جەتىستىكتىڭ باستاۋى وسى قۇجاتپەن تىعىز بايلانىستى, دەپ جازادى Egemen.kz.
«ارينە, قازىرگى كونستيتۋتسيامىزدىڭ ءمان-ماڭىزىن ەشكىم جوققا شىعارمايدى. سوڭعى 30 جىلدا جەتكەن بارلىق جەتىستىگىمىزدىڭ باستاۋىندا اتا زاڭىمىز تۇرعانى ءسوزسىز. بۇل – تۇڭعىش پرەزيدەنت نۇرسۇلتان نازارباەۆتىڭ تاباندى ەڭبەگىنىڭ ارقاسى», دەدى پرەزيدەنت.
سونىمەن بىرگە مەملەكەت باسشىسى كونستيتۋتسيا ەل تاۋەلسىزدىگىنىڭ العاشقى جىلدارىنداعى كۇردەلى كەزەڭدە قابىلدانعانىن ەسكە سالدى. سول ۋاقىتتىڭ سىن-قاتەرلەرى مەن اۋىرتپالىعى نەگىزگى زاڭ ماتىنىندە ءوز ءىزىن قالدىرعانى زاڭدى قۇبىلىس ەكەنىن ايتتى.
«دەگەنمەن بۇل قۇجات ەلىمىز ەندى عانا ەڭسەسىن تىكتەي باستاعان كەزدە قابىلدانعانىن ەسكەرگەن ءجون. وندا تاۋەلسىزدىكتىڭ العاشقى كەزەڭىندەگى قيىن كۇندەردىڭ ءىزى بار. سولاي بولۋى دا زاڭدى», دەدى قاسىم-جومارت توقاەۆ.
پرەزيدەنت: كونستيتۋتسيالىق كوميسسيانىڭ جۇمىسى بارىنشا اشىق جۇرگىزىلدى
پرەزيدەنتتىڭ سوزىنشە, سودان بەرى قازاقستان تۇبەگەيلى وزگەردى. حالىقارالىق ارەنادا بەدەلى جوعارى, ساياسي جانە ەكونوميكالىق تۇرعىدان ورنىققان مەملەكەتكە اينالدى. ال الەمدىك دەڭگەيدە گەوساياسي, گەوەكونوميكالىق جانە تەحنولوگيالىق ۇدەرىستەردىڭ كۇرت وزگەرۋى ەلدىڭ ىشكى دامۋىنا دا تىكەلەي اسەر ەتتى.
«قازىر الەمدەگى گەوساياسي, گەوەكونوميكالىق, تەحنولوگيالىق احۋال تۇبەگەيلى وزگەرىپ جاتىر. سوڭعى جىلدارى قازاقستان دا كوپتەگەن وزگەرىستى باستان وتكەردى. بۇل وزگەرىستەر ۇلت ساناسىنا ىقپال ەتتى, ءتىپتى, زور سىلكىنىس اكەلدى دەسەك, قاتە بولماس», دەدى مەملەكەت باسشىسى.
ء«ارتۇرلى كوزقاراس – ءبىرتۇتاس ۇلت»: پرەزيدەنت ەلىمىز ءۇشىن ماڭىزدى قاعيداتتى اتادى
وسىعان بايلانىستى پرەزيدەنت ەلدىڭ ماقسات-مىندەتتەرى مەن قۇندىلىقتارىن, دامۋ قاعيداتتارىن زامان تالابىنا ساي قايتا قاراۋ قاجەتتىگىن ايتتى. ونىڭ پىكىرىنشە, بۇل ۇدەرىس كونستيتۋتسيالىق دەڭگەيدە جۇزەگە اسۋى ءتيىس جانە ەلدىڭ بولاشاق دامۋ باعدارىن ايقىندايدى.
«سوندىقتان ەلىمىزدىڭ ماقسات-مىندەتتەرىن, قۇندىلىقتارى مەن قاعيداتتارىن زامان تالابىنا ساي, كونستيتۋتسيالىق دەڭگەيدە جاڭعىرتۋ ايرىقشا ماڭىزدى», دەدى قاسىم-جومارت توقاەۆ.