پرەزيدەنت قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا قورىتىندى ءسوز سويلەپ, ەلدە ءجۇرىپ جاتقان ساياسي جاڭعىرۋدىڭ ءمانى مەن باعىتىنا توقتالدى. مەملەكەت باسشىسى قازاقستاننىڭ وتپەلى كەزەڭگە اياق باسقانىن, ەل تاعدىرىنا اسەر ەتەتىن اۋقىمدى وزگەرىستەر جۇزەگە اسىرىلىپ جاتقانىن اتاپ ءوتتى, دەپ جازادى Egemen.kz.
پرەزيدەنت قىزىلوردادا وتكەن ۇلتتىق قۇرىلتاي وتىرىسىندا كونستيتۋتسيالىق رەفورمانىڭ وزەكتى تۇستارى ايتىلعانىن ەسكە سالدى. ونىڭ سوزىنشە, كونستيتۋتسياعا قاتىستى قوعامدىق پىكىر الماسۋ جارتى جىلدان بەرى توقتاۋسىز ءجۇرىپ كەلەدى. ۇسىنىستاردى جۇيەلەپ, جان-جاقتى سارالاۋ ءۇشىن 130 ادامنان تۇراتىن كونستيتۋتسيالىق كوميسسيا قۇرىلعان.
«بۇل اۋقىمى جاعىنان دا, كاسىبي دەڭگەيى تۇرعىسىنان دا ەلىمىز ءۇشىن تەڭدەسى جوق كوميسسيا. وسى جولى كوميسسيا قۇرامىندا شەتەل ماماندارى جوق», دەدى مەملەكەت باسشىسى.
رەفورمالار اياسىندا توپتاسۋ اسا ماڭىزدى
قاسىم-جومارت توقاەۆتىڭ ايتۋىنشا, بىلتىر قازان ايىنان باستاپ ازاماتتارعا ءوز پىكىرىن اشىق بىلدىرۋگە تولىق مۇمكىندىك بەرىلدى. سول كەزەڭدە eGov جانە eOtinish مەملەكەتتىك تسيفرلىق پلاتفورمالارى ارقىلى بىرنەشە مىڭ ۇسىنىس تۇسكەن.
«كوميسسيا ءوتىنىشتىڭ ءبارىن مۇقيات قاراپ, قورىتىپ, ءتيىستى تۇزەتۋلەردى ازىرلەدى. كونستيتۋتسيالىق كوميسسيانىڭ جۇمىسى بارىنشا اشىق جۇرگىزىلدى. مۇنى ايتىپ ءوتۋ ماڭىزدى. سەبەبى ەلىمىزدەگى رەفورمالار بۇرىن-سوڭدى ەشقاشان ءدال وسىلاي جان-جاقتى تالقىلانىپ, تىكەلەي ەفير ارقىلى جۇرتشىلىقتىڭ نازارىنا ۇسىنىلماعان», دەدى پرەزيدەنت.
كونستيتۋتسيالىق رەفورما: پايىم مەن پاراسات
مەملەكەت باسشىسى تسيفرلىق پلاتفورمالاردىڭ قوعاممەن بايلانىس ورناتۋداعى رولىنە دە ەرەكشە توقتالدى. ونىڭ ايتۋىنشا, «حالىق ۇنىنە قۇلاق اساتىن مەملەكەت» قاعيداتىنا ساي ازاماتتارمەن كەرى بايلانىس ارنالارى ءتيىمدى جۇمىس ىستەگەن.
«سونىڭ ارقاسىندا شىن مانىندە جالپىۇلتتىق اۋقىمداعى تالقىلاۋ بولدى دەسەك, دۇرىس بولار. بۇل ادىلەتتى قازاقستان قۇرۋ جولىنداعى ناقتى قادامداردىڭ ءبىرى», دەدى قاسىم-جومارت توقاەۆ.