كەشە قوستاناي وبلىسىنداعى گاسترولدىك ساپارى اياسىندا قۇرمانعازى اتىنداعى قازاق ۇلتتىق حالىق اسپاپتار وركەسترى ليساكوۆ قالاسىنداعى مادەنيەت سارايىندا ونەر كورسەتتى. كونتسەرت قازاقستان رەسپۋبليكاسى مادەنيەت جانە اقپارات مينيسترلىگى مەن جەرگىلىكتى اتقارۋشى ورگانداردىڭ قولداۋىمەن ۇيىمداستىرىلدى, دەپ حابارلايدى Egemen.kz
«حالىق اۋەنى» كونتسەرتتىك-گاسترولدىك جوباسى اياسىنداعى رۋحاني كەشتە كورەرمەندەر قازاقتىڭ ءداستۇرلى كۇي ونەرىنىڭ ۇزدىك تۋىندىلارىن تىڭداپ, ۇلتتىق مۋزىكا مادەنيەتىنىڭ تەرەڭ مازمۇنىمەن قاۋىشتى.
كونتسەرت باعدارلاماسىندا قۇرمانعازى ساعىرباي ۇلى, تاتتىمبەت قازانعاپ ۇلى, داۋلەتكەرەي شىعاي ۇلى, ىقىلاس دۇكەن ۇلى, دينا نۇرپەيىسوۆا سىندى ۇلى كۇيشىلەردىڭ جاۋھار شىعارمالارى, حالىق اندەرى, ءشامشى قالداياقوۆ تۋىندىلارى جانە الەمدىك كلاسسيكالىق شىعارمالار ورىندالدى.
وركەستردىڭ كاسىبي ورىنداۋ شەبەرلىگى, ساحنالىق مادەنيەتى مەن ۇلتتىق ناقىشقا باي رەپەرتۋارى كورەرمەننىڭ ىستىق ىقىلاسىنا يە بولدى.
كەش بارىسىندا قازاقستاننىڭ ەڭبەك سىڭىرگەن قايراتكەرى, «پاراسات» وردەنىنىڭ يەگەرى جەڭىس ىسقاقوۆا ارنايى ونەر كورسەتتى.
«حالىق اۋەنى» جوباسى ليساكوۆ قالاسىنىڭ تۇرعىندارىنا ۇلتتىق ونەردىڭ تاعىلىمى مەن رۋحاني قۇندىلىقتارىن ناسيحاتتايتىن مازمۇندى مادەني كەش سىيلادى.