بۇگىن ايرىقشا ماقساتتاعى كۇشتەرىنىڭ اسكەري بولىمدەرىندە 2026 جىلعى كوكتەمگى شاقىرىلىم بويىنشا مەرزىمدى اسكەري قىزمەت ساربازدارىنىڭ اسكەري انت قابىلداۋ ءراسىمى بولدى, دەپ حابارلايدى Egemen.kz.
«ايبىن» پرەزيدەنتتىك پولكى» اسكەري قىزمەتشىلەرىنىڭ اسكەري انت قابىلداۋ ءراسىمى استانا قالاسىنداعى «وتان قورعاۋشىلار» مونۋمەنتى جانىنداعى الاڭدا, ال «باتىر» پرەزيدەنتتىك پولكى ساربازدارىنىڭ وسىنداي سالتاناتى الماتى قالاسىنداعى 28 گۆاردياشى-پانفيلوۆشىلار ساياباعىندا ءوتتى.
اسكەري انت قابىلداۋ سالتاناتىنا جاس ساربازداردىڭ اتا-انالارى مەن جاقىندارى قاتىستى.
قر مكق قاتارىنداعى 2026 جىلعى كوكتەمگى شاقىرىلىم بويىنشا مەرزىمدى اسكەري قىزمەت ساربازدارى ەلىمىزدىڭ بارلىق ايماقتارى مەن رەسپۋبليكالىق ماڭىزى بار قالالارىنان ىرىكتەلىپ الىنعان. ولار اسكەري بولىمدەردىڭ دالالىق وقۋ ورتالىقتارىندا جاڭا شاقىرىلىم ساربازدارىن دايىنداۋ كۋرسىنان ءوتتى.
اسكەري انت قابىلداۋ سالتاناتى – ەرەكشە جاۋىنگەرلىك راسىمدەردىڭ ءبىرى. انت قابىلداۋ ارقىلى ساربازدار وزدەرىنە وتاندى قورعاۋعا ءازىر بولۋعا, اسكەري قىزمەت مىندەتتەرىن ادال اتقارۋعا جاۋاپكەرشىلىك الادى.
قر مكق اسكەري بولىمدەرىندە مەرزىمدى قىزمەت اتقارۋ بارىسىندا جاس ساربازدار تاجىريبەلى نۇسقاۋشىلىق قۇرامنىڭ جەتەكشىلىگىمەن اسكەري ىسكە ۇيرەنەدى, جاۋىنگەرلىك جانە ارنايى دايارلىق ساباقتارىندا اسكەري ماماندىقتاردى مەڭگەرەدى.
اسكەري انت قابىلداعان سوڭ مەرزىمدى قىزمەت ساربازدارى قر مكق اتقاراتىن: قازاقستان رەسپۋبليكاسىنىڭ مەملەكەتتىك تۋى مەن مەملەكەتتىك ەلتاڭباسى ەتالوندارىن كۇزەتۋ, مەملەكەت باسشىسىنىڭ قاتىسۋىمەن وتەتىن پروتوكولدىق ءىس-شارالارعا قاتىسۋ, كۇزەتىلەتىن تۇلعالار مەن وبەكتىلەردىڭ قاۋىپسىزدىگىن قامتاماسىز ەتۋ سەكىلدى مىندەتتەردى اتقارۋعا كىرىسەدى.
قر مەملەكەتتىك كۇزەت قىزمەتى مەرزىمدى اسكەري قىزمەت ساربازدارى قاتارىنا ەلىمىزدىڭ 18 بەن 27 جاس ارالىعىنداعى, بويى 180 سم-دەن جوعارى جانە 195 سم-دەن اسپايتىن, ءبىلىمى ورتا جانە ودان جوعارى, دەنساۋلىعى جاقسى كەز كەلگەن ازاماتى قابىلدانا الادى. جوعارى ءبىلىمدى, سپورتتىق جەتىستىكتەرى مەن رازريادتارى بار ۇمىتكەرلەرگە باسىمدىق بەرىلەدى.
مەرزىمدى اسكەري قىزمەتتى قر مەملەكەتتىك كۇزەت قىزمەتى قاتارىندا اتقارۋ جاس ازاماتتار ءۇشىن مىقتى ەرلىك مەكتەبى بولادى, ولار مۇندا ءوزىنىڭ ومىرلىك جولىنا قاجەتتى ماڭىزدى داعدىلارعا ۇيرەنەدى. جاستار ءۇشىن بۇل كەزەڭ ارى قارايعى مانساپ جولىن جالعاستىرۋعا قاجەتتى الەۋمەتتىك ليفت بولۋى مۇمكىن. مەرزىمدى اسكەري قىزمەتتى اياقتاعاندار قالاۋى بويىنشا قىزمەتتى كەلىسىمشارت نەگىزىندە جالعاستىرا الادى, ودان ءارى ولاردىڭ ارناۋلى مەملەكەتتىك ورگاننىڭ قىزمەتكەرى جانە وفيتسەرى بولىپ, كۇزەتىلەتىن تۇلعالار مەن وبەكتىلەردىڭ قاۋىپسىزدىگىن قامتاماسىز ەتۋ بويىنشا مىندەتتەردى اتقارۋ مۇمكىندىگى بار.
سونىمەن قاتار قر مكق مەرزىمدى قىزمەت ساربازدارىنا مەرزىمدى اسكەري قىزمەت اتقارعان ازاماتتاردى الەۋمەتتىك قولداۋ بويىنشا قازاقستان رەسپۋبليكاسىندا بەلگىلەنگەن بارلىق جەڭىلدىكتەر (مىسالى, “سروچنيكي 2.0” باعدارلاماسىنا قاتىسۋ) جاسالادى.
بۇعان دەيىن قازاقستاندا اسكەري وقۋ ورىندارىنىڭ ۇزدىك تۇلەكتەرىنە «اعا لەيتەنانت» اتاعى بەرىلەتىنى تۋرالى جازدىق.