استانا قالاي اجارلانىپ كەلەدى: جاڭا گۇلزارلار مەن اباتتاندىرۋ جۇمىستارى قاي اۋدانداردا جۇرگىزىلىپ جاتىر

ەلوردانىڭ بارلىق اۋدانىندا جايلى قالالىق ورتانى قۇرۋ بويىنشا اۋقىمدى جانە جەرگىلىكتى جوبالاردى ىسكە اسىرۋ جالعاسادى, دەپ حابارلايدى ەلوردا اكىمدىگىنىڭ رەسمي سايتى.

نەگىزگى جوبالاردىڭ قاتارىندا «مىڭجىلدىق» اللەياسىنداعى ءۇش نىساندى ىسكە اسىرۋ, Greenline جاياۋ جۇرگىنشىلەر بۋلۆارىنىڭ ەكىنشى كەزەڭىنىڭ قۇرىلىسىن جالعاستىرۋ, سونداي-اق جەرگىلىكتى قوعامدىق كەڭىستىكتەردى دامىتۋ بار. جاڭا قالالىق كەڭىستىكتەر, گۇلزارلار مەن پرومەنادتار ەلوردا تۇرعىندارى مەن قوناقتارى ءۇشىن قوسىمشا تارتىمدى ورتالىقتارى مەن دەمالىس ورىندارىنا اينالادى.

سارىارقا اۋدانىندا بوس جاتقان جەرلەردىڭ, بۇزىلعان گاراجدار مەن ەسكى ۇيلەردىڭ ورنىندا 4 جاڭا گۇلزار اشىلادى. ءىرى جوبالاردىڭ ءبىرى ا. ء ۇلىمجى ۇلى كوشەسىنىڭ بويىندا ىسكك اسىپ جاتىر, وندا لاندشافتىق ديزاينى بار زاماناۋي دەمالىس ايماعى قۇرىلىپ جاتىر. سونداي-اق 11 اۋلا اۋماعىندا جۇمىس جۇرگىزىلۋدە, ال جالپى وسى ماۋسىمدا 30-عا جۋىق اۋلانى كۇردەلى جوندەۋدەن وتكىزۋ جوسپارلانعان. سونىمەن قاتار كەنەسارى كوشەسىن قايتا جاڭارتۋ جۇمىسى قىزۋ ءجۇرىپ جاتىر.

الماتى اۋدانىندا نەگىزگى نازار ب. مومىش ۇلى, ش. قۇدايبەردى ۇلى داڭعىلدارىن جانە شارل دە گولل كوشەسىن قايتا جاڭارتۋعا قويىلعان. بۇل جەرلەردە جاڭا گۇلزارلار, سپورتتىق كەڭىستىكتەر مەن جاسىل ايماقتار اشىلادى. سونداي-اق «الما» جانە «جالايىري» گۇلزارلارى, تەمىرجولشىلار تۇرعىن الابىنداعى اۋماقتار جاڭارتىلادى. «حالىق قاتىساتىن بيۋدجەت» باعدارلاماسى بويىنشا 9 اۋلا مودەرنيزاتسيالانادى. 28 اۋلادا جوندەۋ-قالپىنا كەلتىرۋ جۇمىسى جۇرگىزىلدى, جالپى اۋداندا 50 اۋلا اۋماعىن جاڭارتۋ جوسپارلانىپ وتىر.

ەسىل اۋدانىندا «حالىق قاتىساتىن بيۋدجەت» باعدارلاماسى بويىنشا بەس تۇرعىن ءۇي كەشەنىنىڭ اۋلاسى جاڭارتىلادى: «ادينا», «ۆەنسكي كۆارتال», «ارمان قالا 4», «ارمان قالا 5» جانە «لازۋرنىي كۆارتال». بۇل جەرلەردە زاماناۋي بالالار جانە سپورت الاڭدارى, جارىقتاندىرۋ, ورىندىقتار ورناتىلىپ, كوگالداندىرۋ جۇمىسى جۇرگىزىلەدى.

بايقوڭىر اۋدانىندا بيىل 70 اۋلا اباتتاندىرىلادى. ونىڭ ىشىندە 20 اۋماق ويىن كەشەندەرىن, ترەناجەرلەر مەن دەمالىس ايماقتارىن ورناتا وتىرىپ, كەشەندى مودەرنيزاتسيالاۋدان وتەدى. بۇل جوبالاردىڭ باسىم بولىگى 12 اۋلا «حالىق قاتىساتىن بيۋدجەت» باعدارلاماسى ارقىلى تۇرعىنداردىڭ ءوز باستاماسىمەن ىسكە اسىرىلىپ جاتقانىن اتاپ وتكەن ءجون. تاعى 50 اۋلا جوندەۋ جۇمىستارىمەن قامتىلعان. العاشقى 6 جاڭارتىلعان اۋلا مامىر مەرەكەلەرىنە قاراي اشىلىپ ۇلگەردى.

نۇرا اۋدانىندا ەكوورتانى جانە جاياۋ جۇرگىنشىلەر ينفراقۇرىلىمىن دامىتۋ نەگىزگى باعىت بولىپ وتىر. ەكوپاركتە بەلسەندى جۇمىس جۇرگىزىلۋدە: دايىندىق كەزەڭى اياقتالىپ, قۇرىلىس-مونتاجداۋ جۇمىسى باستالدى. Greenline جەلەكجولىنىڭ ەكىنشى كەزەڭىن ىسكە اسىرۋ جالعاسۋدا, استانالىق تسيركىنىڭ اۋماعى مەن جاڭا قوعامدىق كەڭىستىكتەر اباتتاندىرىلىپ جاتىر. جاڭا نىسانداردىڭ ءبىرى «قازمۇنايگاز» گۇلزارى بولماق. سونداي-اق «التىن شار-1», «مادريد» جانە «كوپەنگاگەن» تۇرعىن ءۇي كەشەندەرىنىڭ ماڭىندا جۇمىستار جۇرگىزىلۋدە. «حالىق قاتىساتىن بيۋدجەت» باعدارلاماسى بويىنشا اۋداندا 6 اۋلا جاڭارتىلادى.

سارايشىق اۋدانىندا ر. قوشقارباەۆ داڭعىلىن اباتتاندىرۋ جالعاسۋدا, وندا زاماناۋي پرومەناد قۇرىلىپ جاتىر. مۇندا ءىرى اعاشتار مەن گۇلدەيتىن بۇتالار وتىرعىزىلادى, سونداي-اق اۋماقتى جارىقتاندىرۋ جۇمىسى جۇرگىزىلۋدە. «حالىق قاتىساتىن بيۋدجەت» باعدارلاماسى بويىنشا كەشەندى اباتتاندىرۋمەن 13 اۋلانى قامتۋ, سونىمەن قاتار 30 اۋلادا اعىمداعى جوندەۋ جۇمىسىن جۇرگىزۋ جوسپارلانىپ وتىر.

سونداي-اق اۋداندا ەسكەرتكىشتەردىڭ ماڭىندا, پاركتىك ايماقتاردا جانە كونتەينەرلىك الاڭداردا قالپىنا كەلتىرۋ جۇمىسى جۇرگىزىلىپ جاتىر.

وسىلايشا, ەلوردادا جايلى قوعامدىق كەڭىستىكتەر قۇرۋ, كوگالداندىرۋ جانە زاماناۋي قالالىق ينفراقۇرىلىمدى دامىتۋ بويىنشا جۇيەلى جۇمىس ءجۇرىپ جاتىر.