اۋىل شارۋاشىلىعى ءمينيسترى ايداربەك ساپاروۆ توكيو گۋبەرناتورى كويكە يۋريكومەن كەزدەستى. تاراپتار اگروونەركاسىپتىك كەشەن سالاسىنداعى ەكىجاقتى ىنتىماقتاستىقتى كەڭەيتۋ كوكجيەگىن تالقىلاپ, ينۆەستيتسيالىق ارىپتەستىك پەن اكۆاشارۋاشىلىق باعىتتارىن دامىتۋعا ەرەكشە نازار اۋداردى, دەپ حابارلايدى Egemen.kz
مينيستر اتاپ وتكەندەي, قازاقستان پرەزيدەنتىنىڭ بىلتىرعى جىلعى جەلتوقسانداعى جاپونياعا ساپارى ەكى ەل اراسىنداعى ستراتەگيالىق سەرىكتەستىكتىڭ دامۋىنا تىڭ سەرپىن بەردى. بيىل العاشقى توقساندا قازاقستان مەن جاپونيا اراسىنداعى اۋىل شارۋاشىلىعى ونىمدەرىنىڭ تاۋار اينالىمى 75%-عا ارتتى.
ايداربەك ساپاروۆ وتاندىق وندىرۋشىلەردىڭ جاپون نارىعىنا ءونىم ەكسپورتىن ۇلعايتۋعا ىنتالى ەكەنىن ايتتى.
ء«بىزدىڭ ەلىمىزدىڭ ەكسپورتتىق الەۋەتى زور جانە ەكولوگيالىق تازا ءارى جوعارى ساپالى ءونىم جەتكىزۋ كولەمىن ارتتىرۋعا دايىن. جاپونياعا ەكسپورتتالاتىن ءونىم تۇرلەرىن كەڭەيتۋگە دەگەن قىزىعىۋشىلىعىمىز زور. ونىڭ ىشىندە بال, ءسۇت ونىمدەرى, قۇس ەتى, سيىر ەتى, قوي ەتى جانە تەرەڭ وڭدەلگەن ونىمدەر بار. اگرارلىق سالاداعى ىقپالداستىقتى نىعايتۋ ەلدەرىمىزدىڭ ازىق-ت ۇلىك قاۋىپسىزدىگى مەن تۇراقتى دامۋىن قامتاماسىز ەتۋدەگى ماڭىزدى فاكتور بولاتىنىنا سەنىمدىمىن», – دەدى مينيستر.
كەلىسسوزدەر بارىسىندا جىلقى ەتىن ەكسپورتتاۋ ماسەلەسىنە ەرەكشە كوڭىل ءبولىندى. قازىرگى تاڭدا ەكى ەل اراسىندا ۆەتەريناريالىق-سانيتاريالىق تالاپتار مەن ۆەتەريناريالىق سەرتيفيكات نىسانى كەلىسىلگەن. سونداي-اق جاپونيا ەكسپورتتاۋشىلارىنىڭ تىزىلىمىنە قازاقستاننىڭ 47 كومپانياسى ەنگىزىلگەن.
«جابياك ۆ ي ك» سەرىكتەستىگى مەن جاپوندىق Senko Farm كومپانياسى اراسىندا قول قويىلعان ىنتىماقتاستىق تۋرالى مەموراندۋم اياسىندا جاپونياعا اي سايىن 100 باس جىلقىنى تىرىدەي جانە ەت ونىمدەرى تۇرىندە ەكسپورتتاۋ جوسپارلانىپ وتىر. قازىرگى ۋاقىتتا ءتىرى جىلقىلار مەن وزگە دە ەت ونىمدەرىن ەكسپورتتاۋعا قويىلاتىن تالاپتاردى كەلىسۋ جۇمىستارى جۇرگىزىلۋدە.
مينيستر جاپون نارىعىنا رەسەيدىڭ تەڭىز پورتتارى ارقىلى لوگيستيكالىق باعىتتاردى پايدالانا وتىرىپ, قازاقستاندىق جوعارى ساپالى استىق پەن ۇن جەتكىزۋدىڭ مۇمكىندىگى جوعارى ەكەنىن دە اتاپ ءوتتى.
تاراپتار سونداي-اق پرەزيدەنت قاسىم-جومارت توقاەۆتىڭ توكيودا وتكەن «ورتالىق ازيا – جاپونيا» سامميتىندە كوتەرگەن باستامالارىن جۇزەگە اسىرۋ ماسەلەلەرىن تالقىلادى.
اتاپ ايتقاندا, قازاقستاننىڭ اۋىل شارۋاشىلىعى مينيسترلىگى جاپونيا ەلشىلىگىمەن بىرلەسىپ, قازاق ۇلتتىق اگرارلىق زەرتتەۋ ۋنيۆەرسيتەتى جانىنداعى قازاقستان-جاپون يننوۆاتسيالىق ورتالىعى بازاسىندا تۇراقتى اۋىل شارۋاشىلىعى جونىندەگى زەرتتەۋ پلاتفورماسىن قۇرۋدى پىسىقتاۋعا كىرىستى.
ءوز كەزەگىندە كويكە يۋريكو جاپونيا تاراپىنىڭ قازاقستانمەن اگرارلىق سالاداعى ارىپتەستىكتى نىعايتۋعا, ءوزارا ساۋدانى كەڭەيتۋگە جانە تەحنولوگيالىق ىنتىماقتاستىقتى دامىتۋعا قىزىعۋشىلىق تانىتىپ وتىرعانىن جەتكىزدى.
«جاپونيا قازاقستاننىڭ اكۆامادەنيەت سالاسىن دامىتۋ تاجىريبەسىن مۇقيات زەردەلەۋدە. ءبىز بىرلەسكەن جوبالاردى جۇزەگە اسىرۋ, تەحنولوگيالار مەن عىلىمي ازىرلەمەلەر الماسۋ ماڭىزدى ەكەنىن كورىپ وتىرمىز. وسى باعىتتاعى ارىپتەستىك ەلدەرىمىز اراسىنداعى ءوزارا ءىس-قيمىلدى جاڭا ساپالى دەڭگەيگە كوتەرەتىنىنە سەنىمدىمىن», – دەدى توكيو گۋبەرناتورى.
ايداربەك ساپاروۆ دەلەگاتسيا مۇشەلەرىنە وسى سالانى قولداۋ شارالارى تۋرالى اقپارات بەردى. اتاپ ايتقاندا, سۋبسيديالاۋ, جەڭىلدەتىلگەن نەسيەلەۋ, سالىقتىق جەڭىلدىكتەر جانە قارجىلىق ەمەس قولداۋ قۇرالدارى بار.
«جۇيەلى جۇمىستىڭ ارقاسىندا ەلىمىزدەگى بالىق ءوسىرۋ شارۋاشىلىقتارىنىڭ سانى 2,5 ەسەدەن استام ءوسىپ, 700-گە جەتتى. بالىق ءوسىرۋ كولەمى جىلىنا 9 مىڭ توننادان 26 مىڭ تونناعا دەيىن ارتتى, سونداي-اق سالاعا تارتىلاتىن جەكە ينۆەستيتسيالار كولەمى ەداۋىر ۇلعايدى. ءبىز بەكىرە ءوسىرۋ جانە بالىق ونىمدەرىن تەرەڭ وڭدەۋ سالالارىنداعى تاجىريبەلەرمەن, تەحنولوگيالارمەن بولىسۋگە دايىنبىز», – دەپ اتاپ ءوتتى مينيستر.
كەزدەسۋ سوڭىندا ايداربەك ساپاروۆ قازاقستان ۇكىمەتى ينۆەستورلار ءۇشىن بارىنشا قولايلى جاعداي جاساۋعا دايىن ەكەنىن جانە اگرارلىق سالاداعى بىرلەسكەن جوبالار ەكى مەملەكەت اراسىنداعى ەكونوميكالىق بايلانىستار مەن ازىق-ت ۇلىك قاۋىپسىزدىگىن نىعايتۋعا ىقپال ەتەتىنىنە سەنىم ءبىلدىردى.