پرەزيدەنت قاسىم-جومارت توقاەۆ توراعالىق ەتكەن ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ مەملەكەتتىڭ بارلىق الەۋمەتتىك مىندەتتەمەلەرى تولىق كولەمدە ورىندالىپ جاتقانىن مالىمدەدى. سونىمەن قاتار اتاۋلى الەۋمەتتىك كومەك پەن وزگە دە الەۋمەتتىك تولەمدەردى تاعايىنداۋداعى جۇيەسىزدىك پەن باقىلاۋدىڭ السىزدىگى بيۋدجەت شىعىندارىنىڭ نەگىزسىز وسۋىنە اسەر ەتكەنى ايتىلدى, دەپ جازادى Egemen.kz.
ۇكىمەت باسشىسىنىڭ سوزىنشە, الەۋمەتتىك تولەم تۇرلەرىنىڭ شامادان تىس كوپ بولۋى, ءبىرىزدى جۇيەنىڭ جوقتىعى جانە ءتيىمدى قاداعالاۋ تەتىكتەرىنىڭ السىزدىگى قارجىنىڭ ءتيىمسىز جۇمسالۋىنا, جەكەلەگەن جاعدايلاردا جىمقىرىلۋىنا جول بەرگەن. الايدا سوڭعى جىلدارى قابىلدانعان شارالار ناقتى ناتيجە كورسەتتى.
«اتقارىلعان جۇمىستاردىڭ ارقاسىندا سوڭعى ەكى جىلدىڭ وزىندە شامامەن 288 ملرد تەڭگەنىڭ ءتيىمسىز يگەرىلۋىنە توسقاۋىل قويىلدى. ءسىزدىڭ Turkistan گازەتىنە بەرگەن سۇحباتىڭىزدا جانە ۇلتتىق قۇرىلتايدىڭ بەسىنشى وتىرىسىندا ايتىلعانداي, بۇكىل سالا رەفورمالاۋدى قاجەت ەتەدى. وسى ورايدا الەۋمەتتىك كومەك تۇرلەرىن بىرىكتىرۋ جانە ءبىرىزدى جۇيەگە كەلتىرۋ پروتسەسى جۇرگىزىلۋدە. ءبىلىم بەرۋ قىزمەتتەرى تسيفرلاندىرىلىپ جاتىر, بۇل نىسانداردى سالۋدان باستاپ جان باسىنا سايكەس قارجىلاندىرۋعا دەيىنگى بارلىق كەزەڭدى قامتيدى. سونداي-اق الەۋمەتتىك مەديتسينالىق ساقتاندىرۋ قورىنىڭ قىزمەتى قارجى مينيسترلىگىنىڭ اقپاراتتىق جۇيەلەرىمەن ينتەگراتسيالاۋ ارقىلى قايتا قارالۋدا», دەدى ولجاس بەكتەنوۆ.
الەۋمەتتىك كومەك الۋشىلاردى تەكسەرۋ كۇشەيەدى
ەل مۇددەسىنە ساي جاڭا كوشى-قون ساياساتى
الەۋمەتتىك ساياساتتاعى تاسىلدەردى قايتا قاراۋ كوشى-قون سالاسىنا دا اسەر ەتكەن. وتىرىستا كوشى-قون زاڭناماسىنداعى جانە يمميگرانتتاردىڭ جەكەلەگەن ساناتتارىن الەۋمەتتىك قولداۋ تەتىكتەرىندەگى ولقىلىقتار ماسىلدىق پيعىلدىڭ قالىپتاسۋىنا ىقپال ەتكەنى اتاپ ءوتىلدى. وسىعان بايلانىستى بيىلدان باستاپ جەڭىلدىكتەر مەن قولداۋ باعدارلامالارى ىرىكتەلىپ, ولار تەك جۇمىس كۇشى تاپشى وڭىرلەرگە قونىس اۋداراتىن ازاماتتارعا عانا بەرىلەتىن بولدى.
الەۋمەتتىك كومەك مايشەلپەك ەمەس
پرەمەر-مينيستر مەملەكەتتىك ساياساتتىڭ نەگىزگى الەۋمەتتىك سالالارداعى ترانسفورماتسياسى بيۋدجەتتىك ءتارتىپتى كۇشەيتۋگە مۇمكىندىك بەرەتىنىن جەتكىزدى. ءبىلىم بەرۋ, دەنساۋلىق ساقتاۋ, الەۋمەتتىك قورعاۋ, مادەنيەت جانە سپورت باعىتتارىنا جىل سايىن شامامەن 18 ترلن تەڭگە بولىنەدى.
«بۇل وزگەرىستەر مەملەكەتتىك بيۋدجەتتەن قوماقتى قارجى بولىنەتىن سالالاردا ءتارتىپ ورناتۋعا مۇمكىندىك بەرەدى. ۇكىمەت «شىنايى مۇقتاج ادامدارعا عانا كومەك» قاعيداتىن قاتاڭ ۇستانادى», دەدى ولجاس بەكتەنوۆ.