بيلەۋشى پارتيانىڭ اتقارۋشى حاتشىسى اسحات ورالوۆ پارتيانىڭ جاڭا اتاۋىن ءتۇسىندىردى, دەپ حابارلايدى Egemen.kz.
«بۇگىن ونلاين رەجيمدە ءبىزدىڭ پارتيانىڭ كەزەكتەن تىس 22-ءشى سەزى ءوتتى, وعان ەلىمىزدىڭ بارلىق وڭىرلەرىنەن 393 دەلەگات قاتىستى.
بۇگىن ءبىز پارتيا توراعاسىنىڭ تاپسىرماسى بويىنشا دايىندالعان پارتيانى جاڭعىرتۋ باعدارلاماسىن تالقىلادىق. سەزد دەلەگاتتارى مەن تانىستىرعان باعدارلامانى ءبىراۋىزدان قولدادى. جاڭعىرتۋ اياسىندا پارلامەنت ماجىلىسىندەگى «Nur Otan» فراكتسياسىنىڭ جەتەكشىسى ەرلان جاقان ۇلى قوشانوۆ پارتياعا «AMANAT» جاڭا اتاۋىن ۇسىندى. پرەزيدەنت, پارتيا توراعاسى قاسىم-جومارت كەمەل ۇلى ءوز سوزىندە بۇل باستامانى قولدادى. سەزد دەلەگاتتارى دا تولىق قولداۋ ءبىلدىردى. وسىنى ەسكەرە وتىرىپ, سەزد پارتيا جارعىسىن وزگەرتۋ تۋرالى شەشىم قابىلدادى, جاڭعىرتۋ باعدارلاماسىن, پارتيانىڭ جاڭا اتاۋى مەن لوگوتيپىن بەكىتتى», دەپ جازدى اسحات ورالوۆ Facebook-تە.
اسحات ورالوۆ پارتياعا نەلىكتەن «AMANAT» اتاۋى بەرىلگەنىن ءتۇسىندىردى.
«بىرىنشىدەن, «AMANAT» - مەملەكەتتىڭ مۇددەسىن قورعايتىن جانە ەلدىڭ دامۋى ءۇشىن تاريحي جاۋاپكەرشىلىكتى ءوز موينىنا العان پارتيا. تاۋەلسىز قازاقستاننىڭ وراسان زور اۋماعى مەن بەرىك مەملەكەتتىلىكتى بىزگە اتا-بابالارىمىز مۇرا ەتىپ قالدىرعان. بۇل ەجەلدەن قازاقتار اراسىندا امانات دەپ اتالعان قاسيەتتى قۇندىلىق. ونى ساقتاۋ جانە بولاشاق ۇرپاققا جەتكىزۋ – بۇل ەلىمىزدىڭ باسقارۋشى پارتياسىنا جۇكتەلگەن زور جاۋاپكەرشىلىك.
ەكىنشىدەن, «AMANAT» پارتياسى – حالىقتىڭ تاريحي-مادەني مۇراسىن ساقتاۋشى. ءبىزدىڭ ۇلتتىق مادەنيەتىمىز, ءتىلىمىز جانە عاسىرلار بويى قالىپتاسقان سالت-داستۇرلەرىمىز دە بىزگە امانات رەتىندە جەتكەن. سوندىقتان, ءبىز بۇل مۇرانى ساقتايمىز جانە دامىتامىز. ۇلتتىق قۇندىلىقتارىمىزدى ەل يگىلىگى ءۇشىن كوزدىڭ قاراشىعىنداي قورعاۋ, ۇلتتىق جانە مادەني بايلىعىمىزدى باعا جەتپەس سىي رەتىندە, بىرلىگىمىزدىڭ نەگىزى رەتىندە ساقتاۋ – پارتيانىڭ باستى مىندەتتەرىنىڭ ءبىرى.
ۇشىنشىدەن, «AMANAT» - مەملەكەت مۇددەسىنە ادال جانە قوعام يگىلىگى ءۇشىن قىزمەت ەتەتىن پارتيا. حالىق «اماناتقا قيانات جاسالمايدى» دەيدى. بۇل ەڭ الدىمەن ادال بولۋ دەگەندى بىلدىرەدى. ءبىزدىڭ پارتيالىقتار – ءوز ەلىنىڭ ادال پاتريوتتارى, ءبىرىنشى كەزەكتە حالىق پەن مەملەكەتتىڭ مۇددەسىنە ادال جاندار.
تورتىنشىدەن, «AMANAT» - حالىقتىڭ داۋىسىن ەستيتىن پارتيا. سايلاۋ كەزىندە سايلاۋشىلاردىڭ قالاۋى مەن تىلەكتەرى - حالىقتىڭ داۋىسى. ولار سايلاۋالدى باعدارلامانىڭ نەگىزىن قالايدى. سايلاۋشىلاردىڭ وتىنىشتەرىن نەمەسە اماناتتارىن ورىنداي وتىرىپ, پارتيا حالىقتىڭ ەركىن ورىندايدى. قوعامدىق قابىلداۋلار مەن قوعامدىق كەڭەستەر ارقىلى پارتيا حالىقتىڭ ماسەلەسىن تىڭدايدى, ولاردى بيلىككە جەتكىزەدى جانە ولاردى شەشۋ جولىندا پراكتيكالىق قادامدارعا قول جەتكىزەدى.
بەسىنشىدەن, «AMANAT» - قوعامداعى الەۋمەتتىك ادىلەتتىلىكتى جانە بارلىق ازاماتتار ءۇشىن تەڭ مۇمكىندىكتەر جاساۋدى جاقتايتىن پارتيا. ءبىز ءوزارا كومەك يدەياسىن, السىزدەرگە قولداۋ كورسەتۋدى ىلگەرىلەتەمىز, قوعامنىڭ وسال توپتارىنىڭ مۇددەلەرىن قورعايمىز. وسىلايشا, پارتيا تاتۋ كورشىلىك, سەنىم مەن مەيىرىمدىلىك ورناعان, سونداي-اق حالىقتىڭ ءال-اۋقاتى ءوسىپ كەلە جاتقان ءادىل قوعامنىڭ قالىپتاسۋىنا ىقپال ەتەدى.
التىنشىدان, «AMANAT» - وتباسى جانە قوعامنىڭ بىرلىگى سياقتى ءداستۇرلى قۇندىلىقتاردى ناسيحاتتايتىن پارتيا. جاس ۇرپاقتى تاربيەلەۋ – ەلدىڭ تاۋەلسىزدىگى مەن مۇددەلەرىنىڭ ەرتەڭگى قورعاۋشىلارى, بارلىق ادامگەرشىلىك, پروگرەسسيۆتى جانە جاسامپازدىقتىڭ تاسىمالداۋشىلارى - اتا-انالارعا, قوعام مەن مەملەكەتكە جۇكتەلگەن جالپىعا ورتاق امانات. سوندىقتان پارتيا وتباسى ينستيتۋتىن نىعايتۋعا, بالالاردى تاربيەلەۋ جۇيەسىن جەتىلدىرۋگە, ەلدەگى انا مەن بالا قۇقىقتارىن قورعاۋعا ەرەكشە كوڭىل بولەدى.
جەتىنشىدەن, «AMANAT» - بۇل حالىقتىڭ مەملەكەتتى باسقارۋداعى سەنىمى. پارلامەنت پەن ءماسليحاتتاردا كونستيتۋتسيالىق كوپشىلىگى بار, ۇكىمەتتى قۇراتىن بيلەۋشى پارتيا رەتىندە ءبىزدىڭ پارتيا ازاماتتاردىڭ ءومىرىن جاقسارتۋ, ەلدىڭ وركەندەۋى جانە دامىعان ەلدەردىڭ قاتارىنا كىرۋ ءۇشىن بارلىق جاعدايدى جاسايدى. بۇل جولدا ءبىز پرەزيدەنتتىڭ مەملەكەتتىك باعىتىن جانە ونىڭ باستاماسىمەن قولعا الىنعان قوعامدىق-ساياسي جانە الەۋمەتتىك-ەكونوميكالىق رەفورمالاردى تولىق قولدايمىز. ءوز سايلاۋشىلارىنىڭ سەنىمىن جەڭىپ الۋ, ساقتاۋ جانە اقتاۋ – ءبىز ءۇشىن امانات.
بۇدان باسقا, «AMANAT» تەرمينى قازاق, ورىس, اعىلشىن جانە باسقا دا تىلدەردە بىردەي وڭاي وقىلادى, ەڭ باستىسى, ونىڭ كيەلى ءمانى بار. «AMANAT» - تاريحي جانە ساياسي ساباقتاستىقتىڭ سيمۆولى رەتىندە, ەڭ الدىمەن وزگەرىستەر مەن جاڭارۋدى بىلدىرەتىن مۇلدەم جاڭا باستاما. جاڭارتىلعان پارتيا جاڭا اتاۋعا ساي كەلەتىنىنە سەنىمدىمىن.
بارشاڭىزدى العىس ايتۋ كۇنىمەن قۇتتىقتايمىن! حالىق پەن مەملەكەت يگىلىگى جولىنداعى ەڭبەكتەرىڭىز ءۇشىن راحمەت!», دەپ جازدى اسحات ورالوۆ.