ءوندىرىستى جاڭعىرتۋ, زياندى قالدىقتاردى ازايتۋ, زاماناۋي تازارتۋ سۇزگىلەرىن ورناتۋ, «جاسىل بەلدەۋ» قۇرۋ – ەكولوگيانى جاقسارتۋدا باسىمدىق بەرىلەتىن باعىت. بۇل رەتتە «ارسەلورميتتال تەمىرتاۋ» بىرقاتار ءىس-شارانى جۇزەگە اسىرۋدا. تەمىرتاۋ اكىمدىگىندە وتكەن كەزدەسۋدە وسى باعدارلامانىڭ تيىمدىلىگى تالقىلاندى.
نەگىزىنەن, قالدىقتاردىڭ كوبى اگلومەراتسيالىق وندىرىسكە تيەسىلى. «ارسەلور ميتتال تەمىرتاۋ» اق ەكولوگيا جونىندەگى ديرەكتورى مادينا قۋانتاەۆانىڭ ايتۋىنشا, زياندى شىعارىندىلاردى ازايتۋ ءۇشىن تازارتۋ قۇرىلىستارىن قايتا جاڭارتۋ جۇرگىزىلۋدە. مىسالى, اگلومەرات كورپۋسى بويىنشا جوبا 100% ورىندالدى. ەكولوگيالىق اسەر – 2021 جىلدىڭ ەكىنشى جارتىجىلدىعىندا نىسان ەنگىزىلگەن ساتتەن باستاپ شاڭ شىعارىندىلارىن 200 تونناعا ازايتۋ.
تازارتۋ قۇرىلىستارى بىرقاتار نىسان دا جاڭعىرتىلعان. №5 اگلومەراتسيادا ەلەكترسۇزگىشتى ورناتۋ ەسەبىنەن شاڭ شىعارىندىلارى الدىڭعى وسىنداي كەزەڭمەن سالىستىرعاندا 500 تونناعا تومەندەدى. وسىعان ۇقساس قوندىرعىلار تاعى ەكى اگلومەراتسيادا سالىنادى. سونداي-اق گازواناليتيكالىق جابدىقتار تولىق ورناتىلعان.
سونىمەن قاتار ەلەكتر سۇزگىلەرى اكتاستى كۇيدىرۋ تسەحىنا ورناتىلادى. اۆتوماتتى مونيتورينگ قۇرالدارى گاز بەن شاڭ شىعارىندىلارى تۋرالى دەرەكتەردى تىركەيدى.
قازاندىق تسەحتارىنداعى كۇردەلى جانە اعىمداعى جوندەۋلەردى ورىنداۋ ەسەبىنەن شاڭنىڭ 300 توننادان اسا تومەندەۋى سەكىلدى ەكولوگيالىق اسەرى بايقالعان.
مادينا قۋانتاەۆا كومپانيانىڭ باسقا بولىمشەلەرىندەگى ەكولوگيالىق جوبالار تۋرالى دا ايتىپ بەردى. كوكس-حيميا وندىرىسىندە ءتۇتىن قۇبىرى, 242 گاز شىعاراتىن كوتەرگىش جانە باسقا قۇرىلىمدار اۋىستىرىلدى. قازىرگى ۋاقىتتا كوكس گازىن تازارتۋ جۇيەسى مەن تازارتۋ قوندىرعىلارىن قايتا قۇرۋ جۇمىستارى جۇرگىزىلۋدە. حيميالىق ونىمدەردى اۋلايتىن جاڭا تسەح سالىنادى.
بۇل رەتتە 2020 جىلمەن سالىستىرعاندا لاستاۋشى زاتتاردىڭ جالپى شىعارىندىسىنىڭ 2 300 تونناعا تومەندەۋى كەزىندە وندىرىستىك ەكولوگيالىق باقىلاۋ ناتيجەلەرى بويىنشا كاسىپورىننىڭ ونىمدىلىگى ارتتى. بۇل 2021 جىلى ورىندالعان ءىس-شارالار تيىمدىلىگىنىڭ جاقسى كورسەتكىشى.
بيىل كوكس تسەحىنىڭ اسپيراتسيالىق قوندىرعىلارىن, ۆاگون اۋدارعىشتاردىڭ شاڭ تازالاۋ جابدىقتارىن قايتا قۇرۋ بويىنشا جوبالار جوسپارلانعان. كومپانيا كوكس گازىن كۇكىرتسۋتەكتەن تازارتۋدىڭ تولىق تسيكلىن ەنگىزۋ تۋرالى شەشىم قابىلدادى.
دومنالىق ءوندىرىستى جاڭعىرتۋ بويىنشا ءىرى جوبا كوزدەلگەن. ونى ىسكە اسىرۋ 2024 جىلعا بەلگىلەنگەن. جاڭارتۋ ەنەرگەتيكالىق وندىرىستە دە جۇرگىزىلەدى.
«تابيعي گازدى پايدالانۋعا كوشۋ – ماڭىزدى اسپەكت. بۇل سالادا جوبالاۋ جۇمىستارى جۇرگىزىلۋدە. كومپانيانىڭ بولات دەپارتامەنتىنە وسى ماقساتقا 300 ملن تەكشە مەتر تابيعي گاز ءبولىندى. گاز قۇبىرىن ىسكە قوسۋ 2022 جىلدىڭ ءتورتىنشى توقسانىنا جوسپارلانعان. گاز جەو-ءبۇس, تميتس-1 جانە دومنا تسەحىنا بەرىلەدى, گازعا كوشۋ نىسانداردا كەزەڭ-كەزەڭىمەن جۇرگىزىلەدى», دەپ ءتۇسىندىردى كومپانيانىڭ ەكولوگيا جونىندەگى ديرەكتورى م.قۋانتاەۆا.
كومپانيا تەمىرتاۋدى كوگالداندىرۋعا دا قاتىسادى. كومبينات اۋماعىندا 5 مىڭنان استام اعاش, قالانىڭ ورتالىق داڭعىلدارىنىڭ ءبىرى – مەتاللۋرگتەر داڭعىلىندا 6 مىڭعا جۋىق اعاش وتىرعىزىلدى. «ارسەلورميتتال تەمىرتاۋ» اق «جاسىل بەلدەۋ» اكتسياسى اياسىندا ۇيىمدار مەن ەكوەرىكتىلەرگە 3مىڭنان استام كوشەت ۇسىندى.
كاسىپورىننىڭ سانيتارلىق-قورعاۋ ايماعىنىڭ شەكاراسىنداعى اۋا ساپاسى تۋرالى اقپارات اشىق تۇردە جاريالانادى. اتموسفەرالىق اۋانىڭ جاعدايى تۋرالى مالىمەتتەر «ارسەلورميتتال تەمىرتاۋ» سايتىندا بار, سونداي-اق مەتاللۋرگيا كومبيناتىنىڭ ورتالىق وتكەلى الدىنداعى مونيتوردا كورسەتىلەدى.