باتىس قازاقستان وبلىسىنىڭ اكىمى عالي ەسقاليەۆ بىرىككەن اراب امىرلىكتەرى مەن تۇركياعا بارىپ, بىرنەشە ىسكەرلىك كەزدەسۋ وتكىزدى. اتالعان ەلدەردەگى قازاقستان ەلشىلىكتەرىنىڭ قولداۋىمەن وتكەن كەزدەسۋلەردىڭ ماقساتى – وڭىردە ينۆەستيتسيالىق جوبالاردى جۇزەگە اسىرۋ.
عالي ەسقاليەۆتىڭ ايتۋىنشا, بۇل كەزدەسۋلەر الدىن الا جوسپارلانعان.
«تەرەكتى اۋدانىنداعى مۇناي وڭدەۋ زاۋىتى جوباسىنا ينۆەستور بولىپ تابىلاتىن ءابۋ-دابي امىرلىگىنىڭ شەيحىمەن زاۋىت قۇرىلىسى كەزىندە تۋىنداعان كەيبىر ماسەلەلەردى تالقىلادىق. ءبىز جوبانى جەدەل تۇردە جۇزەگە اسىرۋ بويىنشا سۇراقتاردى تالقىلاپ, مىندەتتەردى ايقىندادىق. ينۆەستور جوعارى ونىمدىلىگى بار مۇناي ونىمدەرىن وڭدەيتىن جانە قىزمەتكەرلەرىنە (200-گە جۋىق قىزمەتكەر) ەڭبەك ەتۋ مەن دەمالۋعا ىڭعايلى, جاقسى جاعداي جاسالعان زاماناۋي زاۋىت سالۋدى كوزدەپ وتىر» دەدى عالي ەسقاليەۆ ساپار قورىتىندىسى تۋرالى.
ايتا كەتەيىك, ەلىمىزدەگى ءتورتىنشى مۇناي وڭدەۋ زاۋىتى باتىس قازاقستان وبلىسى تەرەكتى اۋدانىنىڭ العاباس اۋىلىنا جاقىن جەردە سالىناتىنى جونىندە 2019 جىلى حابارلانعان ەدى. جوبا قۇنى - 420 ميلليون اقش دوللارى بولاتىنى, جاڭا مۇناي وڭدەۋ زاۋىتىنا شيكىزاتى قاراشىعاناق مۇناي-گاز كوندەنساتى كەن ورنىنان جەتكىزىلەتىنى بەلگىلى بولعان. زاۋىت ينۆەستورلارى جوبانى جۇزەگە اسىرۋعا ەكى جىل ۋاقىت كەرەكتىگىن, ول 2020 جىلدىڭ سوڭىنا دەيىن ىسكە قوسىلۋى كەرەكتىگىن ايتقانىمەن, ول جوسپار جۇزەگە اسپاي قالعان.
بقو اكىمى وسى ساپارىندا شەتەلدىك ينۆەستورلارمەن قوي ەتىن ءوندىرۋ جوباسى جانە اراب ەلدەرىنە ارنالعان سەلەكتسيالىق جۇمىستار باعىتىن تالقىلاعان. جاقىن ارادا اراب ينۆەستورلارىنىڭ ماماندار توبى باتىس قازقستان وبلىسىنا كەلمەك.
عالي ەسقاليەۆ سونىمەن بىرگە ىستامبۇل قالاسىندا ورال ارقىلى اۋە جۇك تاسىمالى كولەمىن ارتتىرۋعا, مال تەرىسىن وڭدەيتىن زاۋىتتى قالپىنا كەلتىرۋگە, سونداي-اق ورال قالاسىندا سالىنىپ جاتقان 4 جۇلدىزدى قوناقۇيدى باسقارۋعا نيەت بىلدىرگەن كومپانيالار جەتەكشىلەرىمەن كەزدەستى. ءوڭىر باسشىسى ىقتيمال ينۆەستورلاردىڭ قارجىسىنان گورى ولاردىڭ وسى سالاداعى كوپجىلدىق تاجىريبەلەرى ماڭىزدى ەكەنىن ايتادى.
«اراب جانە تۇرىك كاسىپكەرلەرى ءبىزدىڭ ەلمەن وتە جاقسى تانىس. قازاقستان حالقىنا اسقان قۇرمەتپەن قارايتىنىنا كوز جەتكىزدىم. مۇنى پايدالانۋ كەرەك. ويتكەنى الەم ەلدەرى ينۆەستيتسيا تارتۋ ءۇشىن بار كۇشتەرىن سالۋدا. الداعى ءبىر-ەكى ايدا ءبىز بۇل كەزدەسۋلەردىڭ العاشقى ناتيجەلەرىن كورەتىن بولامىز. بۇل كەزدەسۋلەر باتىس قازاقستان وبلىسىنىڭ دامۋىنا وڭ سەرپىلىس بەرەتىنىنە سەنىمدىمىن» دەپ جازدى عالي ەسقاليەۆ ءوزىنىڭ الەۋمەتتىك جەلىدەگى پاراعىندا.
باتىس قازاقستان