شال اقىن اۋدانىنىڭ اۋماعى نەگىزىنەن ەسىل وزەنىنىڭ بويىندا ورنالاسقان. بىراق سوعان قاراماستان تازا اۋىز سۋعا ءالى دە قول جەتكىزە الماي وتىرعان اۋىلدار بار. ماسەلەن, ستۋپينكا, سەميپولكا اۋىلدارىنا اۋىز سۋ جەتەدى دەگەن اڭگىمە كوپتەن ايتىلعانىمەن ءالى دە شەشىلمەدى. ەڭ باستىسى, جوبالىق-سمەتالىق قۇجاتتارى الدەقاشان دايىن بولعان, بىراق سونى ىسكە اسىراتىن قارجى بولىنبەگەن.
جۋىردا وبلىس اكىمى ق.اقساقالوۆ Nur Otan پارتياسى وبلىستىق فيليالىنىڭ توراعاسى رەتىندە تۇرعىندارمەن كەزدەسكەندە وسى ماسەلە الدىنان شىعىپ, اۋىلدىقتار پرەسنوۆ توپتىق سۋ قۇبىرىنا وسى اۋىلدار قاشان كىرەدى دەپ سۇرادى. سويتسە بۇل جوبانى ىسكە اسىرۋ ءۇشىن 2 ملرد تەڭگە قاراجات كەرەك ەكەن. ونداي قاراجات بولماعان سوڭ اۋىل تۇرعىندارى تازا اۋىز سۋعا قول جەتكىزە المايدى. كەزدەسۋگە قاتىسقان وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعىنىڭ باسشىسى پاۆەل شيلوۆ جوبانىڭ ورتالىق مەملەكەتتىك ورگاندارعا جىبەرىلەتىنىن ايتتى. «2023 جىلدىڭ ناۋرىز ايىنا قاراي ءبىز قاراجاتقا تاپسىرىس بەرەمىز», دەدى ول.
جسق دايىن بولسا, نەگە وسى ۋاقىتقا دەيىن ونىڭ ورتالىق مەملەكەتتىك ورگانداردىڭ قاراۋىنا بەرىلمەي جاتقانى تۇسىنىكسىز. وسىنىڭ وزىنەن سىلبىرلىق كورىنىپ تۇر. تازا اۋىز سۋ ماسەلەسىن شەشۋ – باسىم جوبالار بولۋ كەرەكتىگى جونىندە مەملەكەت باسشىسى تالاي ايتقانىمەن جۇرىسكە شابان شەنەۋنىكتەر ءبارىن دە ەرتەڭگە ىسىرا بەرەتىن سەكىلدى...
سونىمەن قاتار وبلىس اكىمىمەن كەزدەسۋگە كەلگەندەر سەرگەەۆكا قالاسىنىڭ ىشىندەگى جولداردىڭ ساپاسىزدىعى تۋرالى ايتتى. اۋدان ورتالىعى سانالاتىن شاعىن قالاعا كىرەبەرىس جولداردىڭ ءوزى جايراپ جاتىر. تەك بىلتىر عانا جەتى شاقىرىمدىق جول جوندەلگەن. ال بىرنەشە باستى كوشەنىڭ جولدارىن جوندەۋگە جسق ازىرلەنگەنىمەن ول دا ۇزىن ارقان, كەڭ تۇساۋمەن ءالى كۇنگە ىسكە اسپاي تۇرعان كورىنەدى. وبلىس اكىمى قۇمار اقساقالوۆ بۇل ماسەلەنىڭ ءمانىسى تەرەڭدە ەكەنىن ايتتى. «قازىر ءبىزدىڭ اۋىلدارداعى ۇلكەن جوندەۋ جۇمىستارى «اۋىل – ەل بەسىگى» باعدارلاماسىنىڭ شەڭبەرىندە ىسكە اسىرىلۋدا. ال سەرگەەۆكا قالاسى قالا مارتەبەسى بولعان سوڭ بۇل باعدارلاماعا كىرمەيدى. بىراق ماسەلە شەشۋسىز قالماۋى كەرەك. وعان «ايماقتاردىڭ دامۋى» باعدارلاماسىنىڭ شەڭبەرىندە قاراجات قاراستىرامىز. بىراق ءبىر جىلدا جسق-داعى 4 ملرد تەڭگەنى ءبىر-اق بولەمىز دەپ ايتا المايمىن. دەگەنمەن مۇمكىن بولعان جاعدايدى قاراستىرامىز», دەپ جاۋاپ بەردى.
ال جۋىردا وڭىرگە ءماجىلىس دەپۋتاتتارى كەلىپ, شەشىلمەگەن كوپتەگەن پروبلەما بارىنا كوز جەتكىزدى. ماسەلەن, دەپۋتات ەرلىك تايجانوۆ وبلىستا كومىر تاپشىلىعىن شەشۋگە بۇرىن اتسالىسقانىن بايانداي كەلىپ ايىرتاۋ اۋدانىنداعى ءبىر توپ اۋىلدىڭ جەر پايدالانۋ ۇلەسىنەن ايرىلىپ قالعانى تۋرالى ايتتى. «مەن وسى اۋىلدارعا بارىپ, حالىقپەن كەزدەسىپ, وسى پروبلەمانى قالاي شەشۋ كەرەكتىگىن زەرتتەيمىن», دەدى دەپۋتات.
حالىق قىسىلعاندا قورعانىشى بولىپ تابىلىپ جاتقان اكىم-قارالار مەن دەپۋتاتتاردىڭ بولعانى دا جاقسى-اۋ.
سولتۇستىك قازاقستان وبلىسى